Tusun Ke-7
MINGGU dulu tu kemari kitai udah macha sereta belematika segenteran Sada Bebuah ti dikumbai Serebana Siku Ukui Kaka. Lalu minggu tu ruang JAKU IBAN: Sada Bebuah ba dada surat-kabar Utusan Sarawak (SADA) tu diisi ngena genteran Sada Bebuah ti bejuluk Sebilah Rantung Duku.
“SEBILAH RANTUNG DUKU”
Aku tu sebilah duku
Berasal ari besi sulu, baja teradu
Sempiar perapang pedang Buju
Tuai dulu, ke beati tuyu
Mudi ngemeluka orang siku mati merimpu
Makai telu raung bungang.
Aku tu sebilah dajap pemantap, duku pemampat
Berasal ari keresani besi umat
Repik anak perapang pedang Rabung Bat
Tuai dulu, pintar muslihat
Lanchat mepat orang melat
Beupahka sebangkat pepakan upang.
Lebuh aku agi biak, empai bengat tuai menya, Dum
Kala aku diansingka aki nuan
Nasau pulau, melit bukit, ngerampit tatai,
Alai uman iya nanam jeluan padi nubai,
Tak nadai pengakang aku nyimbang batang menuang
Nyelai ragai mikai, galau lelanggai,
Nadai berupai, rebah melempai, tumbang tejula.
Tak ke pendiau, maya ke menya kelia
Mata tajam enggi aku, akan Renggan,
Dikena aki nuan menya, nundan rian
Bebuah berinan nempala kera;
Kala mega aku dianjung aki nuan, Dum Mabung
Mumpung mulung, dilulung nibung
Nuduk di punggung, ngupih timba;
Kala mega aku ditandangka aki nuan, Dum Jang
Nyimbang batang pinang, putus beluntang
Baru beseludang, bemayang sala.
Tang ke tu, lebuh nyau kine rebak,
Ditampung kita ke biak,
Meda mata aku udah simpak
Ulu udah ruyak, sarung udah suyak
Diteju-lak, enda dipeguna.
Meda mata aku udah rabang
Kilum udah renggang, sarung udah meranggang
Enda dibilang, nadai kesayang, badu diperega.
Uji peletuk aku tu, Igat, peletuk
Enggai aku kelalu dipeburukka kita beketu
Tak duduk rungguk-rungguk
Diau matuk-mungguk, changuk-changuk, da teluk
Dibalut apuk, begulai enggau umpuk
Dikerayap ama manuk.
Peletuk aku, Igat, peletuk
Biar pinggang aku bingkuk
Mata aku piluk, kebi jai.
Taja aku dah jadi perantung, baka tu
Enggai ga aku disilung terus diumbung
Apin betegar, udah dipesarung
Apin mati, dulu diperarung,
Pelentung aku, Igat, pelentung
Biar pinggang aku bejengkung
Mata laur belung, simpi tebi.
Enti enda pia,
Uji simpan bejimat, taruh cheremat ga aku, Igat,
Dini nemu, ila lusa, dudi renggat,
Tau aku diambi jamat kita ke pengering semengat,
Penabat umat orang ke bisi besapat,
Jadi mali melaki-bini.
Uji ansah cheremat, kilir bejimat ga aku, Wat,
Dini nemu, kedudi hari, jeman ke apin genap,
Tau aku diasa kita ke sabang ubat,
Penabat jamat kita ke bisi enda dapat
Dipelianka Rechap Manang Menani.
Lalu sebengkah ari pekara ti deka dikenang penulis pasal Sada Bebuah Sebilah Rantung Duku tu, iya nya pasal isi enggau reti sada bebuah nya empu. Lebuh iya ngarang Sada Bebuah tu, dia penulis berundingka reti iya bisi dua pengambi:
(1) Reti sada bebuah tu ti gera-gera’/ngalan/belungkas/nadai belalali (tersurat/extrinsic). Dalam reti iya ti gera-gera’, dia sebilah rantung duku tu nusui:-
• Asal tauka penatai iya – iya dikambuh ari sempiar/repik besi umat ti dikambuh Rabung Bat seduai Buju ke duku kirai.
• Lebuh iya agi baru tembu kambuh, agi tajam menya, iya sigi dikena orang nebas, nasau rimba, lalu mantap tauka nebas enda pilih bansa kayu ke di babas kering sekalika lembut. Iya kala dikena orang ke empu, betajarka batang rian, mulung enggau pinang.
• Tang lebuh iya nyau lama, tegar, simpak, jai mata, jai ulu, jai serangan, dia iya diengkahka pengempu sengapa alai sebelah-belah teluk dinding, enda disimpan, diintu manah-manah.
• Tegal nya, iya berasai enda lantang ati enggau pendiau. Nya kebuah iya majak pengempu iya meletuk iya, ngena iya.
• Enti enda baka nya, taja pen iya udah nyadi rantung, agi mih iya tau bisi guna ke pengempu iya baka ke kering semengat indu enggau lelaki ti disapat di ai tauka bekalih di darat, laban jadi salah serak; tauka ke sabang ubat; sekalika ke upah sida manang sida kejakang, sida mampu sida bindu lebuh belianka pengempu sekalika sida sebilik ke bukai ke bisi sakit lengit, enda gerai enda nyamai.
(2) Reti sada bebuah tu ti besilup/belalai (tersirat/intrinsic), dia sebilah rantung duku tu nyempamaka siku mensia lelaki ke:
• Peturun orang ke manah purih, manah sepuh, kering, tajam ati
• Lebuh iya agi biak, agi benung orang, agi pengerai, agi regas (kering, sikar, bagas, pas) lalu ulih ngereja mayuh macham pengawa (nyengkaum pengawa-pengawa ti sukar ti enggai dikereja orang bukai)
• Tang lebuh iya nyau tuai, nyau enda dapat agi gawa, nyau bepenyakit, dia iya nyau enda dikelala, enda dibasa, enda dikibuhka, kurang dijaga orang ngena penyiru enggau pengasih. Nya kebuah iya nyau berasai balat bendar enda lantang ati, enda lantang pendiau.
• Tang ku iya, taja pen iya nyau tuai, nyau enda sape agi gawa, nyau bepenyakit sereta enda kungang agi ngereja pengawa ngena pengering tulang, orang patut sereta tau ngena iya ke guna bukai. Iya ulih nyanding sida enggau ajar sereta enggau dalam pengawa enggau pendiau, laban iya mayuh udah ngasaika masin/tabar, pait/manis dalam pendiau enggau pengidup. Iya tau magi sida penemu manang penemu lemambang, leka main, jalai basa enggau adat, tusut, tapis pengawa beburung enggau mayuh agi sapar daya idup raban bansa diri empu ti beguna dikena nanka bansa enggau budaya diri empu.
• Tang buku tuju penulis ti ngarang sada bebuah tu, iya nya meransang kitai mayuh tu bela bebasaka sida ke udah tuai umur ke nyau enda kungang agi gawa ke tanah ke rumah, mindah kulu kili, nyau bepenyakit; tang dalam pala enggau tubuh iya mengkang beterumbu, malar masar tujah pengidup, penemu, pengelandik enggau penau ti beguna ke tau nyangga pendiau, nyukung pengidup, nyerarak perangai enggau ulah kitai ke rebak baru ke dikiraka penulis masih rapas dalam semua pekara.
BETAMPUNG
Oleh JANANG ENSIRING