MANUK labang ke dikena bebiau maya miring tauka bedara bisi reti kediri empu.
Oleh JANANG ENSIRING
Tusun Ke-31
SELAMAT kitai betemu baru ba dada keretas surat-kabar UTUSAN SARAWAK (SADA), lalu dalam minggu tu kitai betemu ba Tusun Ke-31, ke alai penulis mai bala pemacha macha, belemati sereta lalu ngupas beberapa pekara ti nyengala agi ti bisi diundan segenteran sada bebuah ti diberi nama “Peratika Manah-manah.”
PERATIKA MANAH-MANAH
Uji kitai nenung penyumbung jaku
Selulut ribut angin puting beliung,
Ngumbai diri tepumpungka mulung
Nuduk di punggung, ngupih timba.
Uji kitai nyagam penajam jaku
Selulut ribut angin selatan,
Ngumbai diri tetingkarka dan Rian Keban
Bebuah berebinan, nempala kera.
Uji kitai ngenang penunggang jaku
Selulut ribut biau banjang, angin kenchang,
Ke ngumbai diri lantang tetumbangka batang pinang
Ke baru nengkuang, bemayang sala.
Uji jayak kitai beratika
Kaban engkatak, bala reringkak,
Kachuh riuh, bepakrak, kelalu ragak,
Meda mua hari nyadi, ayap belili langit sepiak,
Tang ujan lalu ga enda nelian labuh beteratak,
Semina memesi, ngemi kak,
Nyampau sedak panching empangau.
Uji kitai beratika
Pendiau bala reringkak, raban lelenggak
Kachuh riuh, kelalu ragak, balat ikak
Ninga berita bala runtu deka nyaru, ngempas di lupak
Tang banta yan enda nyadi ngaban
Mina ngempas di kerangan, sengaki rantau.
Uji kitai beratika
Pendiau manuk indu, karap kelabu,
Kachuh, riuh da baruh, sekayu rumah merundu,
Gaga ngadaka keratu sigi telu;
Ke tau nyadi telu matu, bau abu
Enda dikesayauka, terus ditikau.
Aram kitai mega beratika
Setangkai sempuli padi enchangan, pulut Beketan,
Nadai kitai ninga iya kachuh riuh, enda melawan,
Tang semakin hari, niap malam
Tangkai padi enchangan, pulut Beketan
Semakin lentur laur tetensam
Igi iya berisi, tandan iya meruan
Tau diketam, diketau mansau.
Aram kitai beratika pengisuk, pendiau sampuk,
Diau-diau, bepelam-pelam, setengah betapuk
Nadai sida bepagahka dilah,
Mengkukuk bekerauk munyi manuk,
Enda sida bepakrak, kelalu ragak,
Munyi kaban reringkak, bala engkatak
Ke diau di engkebuk, ai meduk,
Tang tekerit, tetebuk sida ka pun
Medang puguk, purang mengkuk,
Dinga tak rebah berikuk, tumbang teduduk
Merembam ke pulau, nuju kembayau.
Uji kitai beratika pemama pipit banda,
Betubuh mit mesai kunchit,
Tang berati melisa baka burung geruna,
Nguji mencuba nelan kemantan, embawang lanja.
Taja nya, enda ulih iya
Tang bisi mega ke sempama, lalau pendiau.
Uji kitai beratika pemama semut,
Ditanya, enda nyaut,
Dipeda, baka ke enda engkebut,
Bejalai kimut-kimut, kin-kitu kitut-kitut, mansang surut;
Tang mih, enti sida udah belabuh berangkut,
Sida enda takut, mali riput, nadai surut,
Ngeli diketup, ngangkut but, bangkai kerebau.
Chukup mih pengengkah, naka mih pemanah,
Enti mensia bejaku enda seredah, mantaika pemangah;
Bejaku memanah baka selanjau ijau manuk pagah
Manuk pemiau gawai nikah, gawai tuah:
Iya ke begela’ Bujang Tuyu Nangkin Duku nadai sentagai,
Bujang Nelap Panjai Iku Sirat irit bejalai.
Lelaki orang nya nadai kala nusi diri berani
Tang teleba ga sida ngeringka antu pala;
Indu orang nya, nadai kala muji diri pandai tau,
Palik ke bilik peda betebejur langgur pua.
Lelaki nadai kala beberitaka diri mayuh padi,
Tang pagi lemai bekumbai makai;
Indu nadai kala beberitak diri pandai bejaku,
Tang enda nemu leju, merengu pansut pelandai.
Nya tadi leka sada bebuah ti diberi penulis nama Peratika Manah-manah. Diatu baru penulis nguji meri kupas ke sada bebuah nya tadi.
Rentayan Ke-1, Ke-2 enggau Ke-3 sada bebuah nyebut:
Uji kitai nenung penyumbung jaku
Selulut ribut angin puting beliung,
Ngumbai diri tepumpungka mulung
Nuduk di punggung, ngupih timba.
Uji kitai nyagam penajam jaku
Selulut ribut angin selatan,
Ngumbai diri tetingkarka dan Rian Keban
Bebuah berebinan, nempala kera.
Uji kitai ngenang penunggang jaku
Selulut ribut biau banjang, angin kenchang,
Ke ngumbai diri lantang tetumbangka batang pinang
Ke baru nengkuang, bemayang sala.
Dalam Rentayan Ke-1, Ke-2 enggau Ke-3 sada bebuah “Peratika Manah-manah” nyebut pasal sikap enggau tebiat sekeda mensia ti ngelabuhka jaku ti sumbung, kelambang, renjan, tajam enggau tunggang nadai begampang. Sida bejaku tak sepeneka mansut nitihka ati diri-empu ti berindik ari pengeringat, pemanchar enggau penyumbung, lalu nadai sekali-kali ngira pengasai ati peninga. Anangka sida nemu bejaku besidir enggau besebar. Anangka sida nemu nguna adat penyiru bejaku. Kada-kadaka sida tu ampit nemu sekeda jaku dalam kitai Iban ti bisi kaul enggau penyumbung lebuh bejaku ti suah dikena orang ke tuai lebuh bejaku ti munyi tu: Kesatu, “Bejaku nyilup remang, kaki enggai nyingkang”; kedua, “Telasur perau ulih diundur, telasur jaku enda ulih diinsur”; ketiga, “Bejaku ngelambung langit, tunjuk jari ngachuk lubang burit”; enggau keempat, “Kukuk rauk-rauk, iku bekipi dibalut tai.”
Orang ke sumbung bejaku enggau kelambang mansutka penemu patut ngambi jaku dalam ti munyi tu ke batu pegai dikena ngimpun penyiru diri-empu bejaku: “Lebuh bejalai beratika singkang, lebuh bejaku beratika amang.” Bekal ti diberi jaku dalam tu, iya nya siku-siku mensia mesti selalu bejimat dalam semua pekara, kelebih agi lebuh kitai bejaku enggaika jaku ti dipansutka kitai nya tau ngasuh ati peninga enda lantang sekalika ngasuh ati sida ensiban, tauka ngasuh sida ringat. Pia mega, lebuh kitai ngaga sebengkah kereja, tauka betindak, tentuka dulu pengawa ti dikereja nuan nya, tauka tindak ti diambi nuan nya enda ngemedis sekalika ngerusak orang bukai ti bisi kaul enggau kereja tauka tindak nuan nya. Lalu tentuka mega tindak pengawa ti diambi nuan nya enda ngemedis sekalika ngerusak tauka ngemaluka kitai-empu.
BETAMPUNG