Tusun Ke-19
DULU tu kitai deka macha tampung sada bebuah ti bejuluk ‘Pengajar Tukang Tempa’ ti udah dichelak dalam Tusun Ke-18 minggu dulu tu kemari ba surat-kabar UTUSAN SARAWAK sentang ruang ti dikumbai SADA.
PENGAJAR TUKANG TEMPA
Pengawa pengajar ukai pengawa seina-ina’, ngerindang hari,
Nurun nyungkap sebun ambun pagi,
Pulai nyau lama lemai, silau hari,
Tulang dipasang magang,
Peluh nengkujuh nelusur daie;
Ai dituntum, lauk dikulum,
Asi dipanggum pakai bediri;
Ngetu bediri, ngeju berenti pantang mali,
Nadai beduli engkadah hari,
Nganjung ati, ngepung mimpi,
Nangkap niat, mulung penguji,
Ngansau biau, ngamatka mimpi,
Ngichaka techiri, sedura nama;
Niri negika Rukunegara,
Ngenyataka Filosofi Pelajar Bansa Malaysia;
Nguluka mensia beserakup ati,
Nyapai ekonomi ngulihka pengaya;
Nyeridika generasi ke rebak dudi
Ngerak pengelandik jari, pemandai ati
Ngereja pengawa besekula,
Ngambika semua bela di mua
Lintang rata, nadai pengerunggang.
Ni Presiden Raja dunya,
Ni menteri pemegai mensia,
Ni hakim pemutus pechara,
Ni pengarang untak begeliga,
Ni saintis penerebai ke singkamiga,
Ni panglima penyaga menua,
Ni polis penerit kuasa,
Ni lutur penampung nyawa,
Ni paderi ketuai agama
Semua belajar nulis, ngira enggau macha
Ditarak pengajar di sekula,
Ngasuh mensia rata nyadi orang,
Pansut ari pemetang, nuju penerang.
Ku orang, enti siku pengajar nyau nurun tumu,
Sempama retung pandung, tibang penemu;
Lesap mih surat enda temu tuju;
Nyaya mih litaricha, lenyau beribu buku;
Kekutang likang tali penemu bansa baru,
Tengelam bunsu,
Tau pungkang pengawa pemansang nempa orang.
Enti siku pengajar ngejangka perua, ninggalka dunya
Sempama angus setibang penemu menyana, daya berega,
Lanting dunya, pesaka menua, pemai bansa;
Munka pengawa nyurat tesat kekalat,
Pengawa macha rabut kekapa,
Meri bansa nyadi papa cherita, lus litaricha,
Kurang pengadang, chundung penyakang.
Pengajar “tukang tempa” enda mudah mutap, lubah ringat
Sigi iya teleba sebarang alai nempat:
Baikka iya dianjung ke tuchung Bukit Santubong
Sekalika ke kaki Bukit Bangat,
Baikka di ujung Tanjung Kidurong
Tauka ari ulu Nanga Gat,
Baikka bekereja ba rumah sekula sementara
Tauka rumah tegap beringkat-ringkat;
Nya ngasuh jasa iya lebih dipebasa,
Ngereja pengawa semakin penapat-inat,
Kereja iya semakin dipeguna,
Budi iya dipuji belipat-lipat;
Pejuluk iya “Cikgu”, ensumbar iya “Guru” meruan dikeingat,
“Pengajar” kangau keramat.
“Pengajar” pakar, raja penyurat!
Terima kasih, Cikgu!
PEMESAI TANGGUNGJAWAP PENGAJAR
Nya tadi sada bebuah ti bejuluk ‘Pengajar Tukang Tempa’. Dia alai penulis nguji ngibai bansa, perangai, sikap, tebiat enggau peneleba mensia ti dikumbai ‘Pengajar’, sereta pemesai tanggungjawap enggau kereja ti dipanggaika apai-indai nembiak sekula (ke jadika pemegai entaruh) ba bau sida, awakka sida nempa enggau nyepuh nembiak sekula (ke ada ke dunya tu semina bebekalka untak ti masih puang nyelambang ke disebut dalam Jaku Latin tabula rasa) nyadi anak menua ke menyana berega.
Pengarap lama kitai Iban nyebut iya nya Selempeta, mega dikumbai Selempetuh, mega disebut Selempandai ti nempa kitai mensia lebuh kitai ap[in ada ari perut indai. Udah nya Selempandai lalu nyepuh kitai mensia. Dulang ti alai iya nyepuh mensia enda sama, kenu ku kena sebut dalam leka main sanggah-dilah kitai Iban.
Orang ke buruk disepuh Selempandai semina tunjuk lakka sida nya semina tinduk langa-langa. Orang ke bula sepuh lengka awakka ampa betusui rita. Orang ke bagas disepuh iya ba dulang teras, lakka pas ngiga kereja/belanja. Lalu orang ke berani disepuh iya dalam dulang besi, awakka tajam ati berambunka nyawa.
Tang lebuh mensia udah ada, maya umur nyau tau besekula, iya dianjung ke sekula lalu diserahka apai-indai iya ngagai pengajar, iya nya ‘tukang tempa’ mensia ke nyengenda ruga idup di dunya tu, ngambika anak sida iya nya diiri pengajar enggau penemu, pengelandik enggau pemandai besekula sereta lalu dilatih, diajar sereta disikap pengajar enggau adat, basa, ulah, jaku, jalai pendiau enggau disipelin ti tuchi beresi, menyana mulia.
Ambi ke bisi ke tenggau ke seliau bala kitai pemacha, uji kitai berati sereta belematika penemu sekeda orang ke begeliga runding pasal pengajar: (1) They say winners are made, not born. But who makes them? The instructors, trainers, and the teachers – the ones who are there at the beginning, during failures, and after successes. The reason champions never give up is because their teachers didn’t give up on them. (Ku sida, orang ke menang nya ulih ngaga/nempa, ukai dibai ada. Tang sapa ke nempa sida? Bala penguro, pelatih, enggau pengajar – ke meruan bisi dia kenyau ari pun, maya pengelingkup, enggau sepengudah bulih pemujur. Kebuah alai sida ke champian nya enda mudah nyerah alah laban pengajar sida mega enda nyerah alah ngaduka sida). (2) Mustafa Kemal Ataturk says, “A good teacher is like a candle – it consumes itself to light the way for others”. (Pengajar ke manah sempama sebatang dian – iya nunu diri-empu ketegal meri penampak ngagai orang bukai). (3) William A. Ward says, “The mediocre teacher tells. The good teacher explains. The superior teacher demonstrates. The great teacher inspires”. (Pengajar ti numbas pemanah madah. Pengajar ti manah nerang. Pengajar ke tinggi pemanah nerang sereta nunjuk chara. Pengajar tebangkar meransang).
Sepengudah kitai ngibai bansa, perangai, sikap, tebiat enggau peneleba mensia ti dikumbai ‘Pengajar’, sereta pemesai tanggungjawap enggau kereja ti dirinan bansa mensia ke dikumbai ‘pengajar’, sereta enggau jasa sida ngagai raban raban bansa enggau menua, kitai diatu ngilaska perening enggau tinjau kitai ngagai dunya tu empu, ngambika kitai lalu beratika gaya pemaik enggau pengelikun dunya ke diani kitai jam ti diatu, bemalinka leka sada bebuah ti bejuluk “Nuju Pemaik Dunya Pengelikun Perua.”
NUJU PEMAIK DUNYA PENGELIKUN PERUA
Pemaik dunya udah retak-retak,
Sebarang maya tau belah melekang,
Enti enda diseruri enggau pemendar ati;
Perangai ulah mensia semakin ruyak suyak,
Berindik ari ati udu bekejang balat beserekang,
Bai prinsip polisi nadai segaji, enda sekunsi,
Tebererak, temera, bai Lucifer.
Penusah, penyarut, pengachau
Ngererai di sebarang alai;
Kapal selam, bilun pengebum,
Senyata bisa kena begagai,
Tambahka pemanga, gila kuasa sekeda tuai;
Ngasuh pengelikun tau tebantun,
Pemaik mudah terunsai,
Idup nadai penyamai,
Penyenang pengelantang seruran digadai
Nyawa mensia semampai kekalai madai,
Asai ke kena kerekai, seru, serarai api neraka.
Pengelikun perua semakin beguyang,
Dirimba penemu selebubu-iru, balat beserekang;
Ditum sebun bum, dang-dang didiang perang,
Seput enggau nyawa semua uchu Awa,
Bekekutang begitang di ujung pedang,
puting senapang,
Nambahka ai ke bebali jai,
Angin ngeledin, ozon sawang,
Penyuntuk pemakai ngundang enda belanggang,
Ekonomi, dagang benta tulang, surut ke belakang,
Semakin renggang dih taur dunya,
Semakin meranggang dih jaul mensia.
BETAMPUNG