Tuai Begulai Enggau Rayat.
MARUD: Taja pan Kunsil Nengeri Negeri (DUN) udah diketuka, tang pengingin ati deka mantu rayat tetap diteruska.
Orang ke ngempu kerusi Mulu ti mega Sapit Speaker DUN Sarawak Dato Gerawat Gala madahka, pengawa numbuhka Ijinsi Pemansang Tinggi (HDA ) ba DUN nya meri empas ke manah ngagai pemansang kandang Mulu.
“Perintah Gabungan Parti Sarawak (GPS) terus deka mai lebuh mayuh agi pemansang ngagai kandang Mulu enggau Baram ngena HAD,” ku iya lebuh bejaku maya Pengerami Tuai Begulai Enggau Rayat ba Rumah Asong Jaban, Linai Bukit ke diatur Komiti Pemaju enggau Pengelikun Kampung (JKKK).
Ku Gerawat, lima buah rumah panajai ba kandang Mulu deka bulih penguntung ari projek ai beresi ke ngena ungkus RM5 juta dikemujurka ngena Projek HAD berengkah ba taun dudi nyin ila.
Ku iya, antara projek bukai ke dikemujurka ngena HDA nya ngaga jalai ari Marudi ngelawa Long Terawan Renggat 1, iya nya berengkah ari Rumah Entika, Sungai Poyut nyentukka ngagai Kuala Linei.
Projek nya agi benung dikemujurka lalu enti udah tembu ila iya meri penguntung ngagai peranak ba endur nya.
Kelimpah ari nya ku iya, pengawa ngaga legit telekomunikasi ke beguna amat benung diperatika laban sistem belajar enggau ngajar ngena norma baru kelimpah ari dikena berkomunikasyen.
Lebuh ngenang senentang Pengawa Bepilih Besai Nengeri Ke-12 (PRN-12), Gerawat madahka kerusi DUN ungkup Orang Ulu patut ditanka dikena nentuka pemansang ba kandang menua nya diteruska.
Ba DUN Mulu bidi 11 bengkah raban bansa ke alai Bisaya siti raban bansa bukai ke bisi ba endur nya.
Ku Gerawat, laban sida raban bansa ke minit, sida patut bekerejsama enggau GPS ke lebih besai dikena nyamin pengelantang enggau penyenang pengidup sida iya empu jemah ila.
Lebuh ngenang senentang pekara bukai, Gerawat mega bisi nyebut senentang pandemik Covid-19, lalu iya mega madahka Perintah Nengeri Sarawak ulih napi gaya ke baka nya ngena mayuh bengkah bantu diberi ngagai rayat.
Ku iya, agih penyampau RM10 bilion udah disediaka dalam bajet ninting taun lalu nya ngayanka nengeri tu enda bankrap baka ke bisi disebut bala penyakal sebedau tu.
Peranak Rumah Asong, Linai Bukit ke bisi 41 pintu madahka diri nyukung Dato Gerawat Gala maya PRN-12 ke deka datai lalu Gerawat ngarapka peranak rumah panjai nya ulih meri pemenang bulih majoriti besai ngagai GPS.
Oleh JIKU JUGUONG