SENI musik Gendang Pampat nyangka enda tentu ditemu nembiak rebak baru enggau bansa bukai ke diau di mengeri taja pan iya nya sebengkah seni bansa Iban ke nyadi sebengkah bansa pengabis besai nguan Bumi Kenyalang.
Seni musik Gendang Pampat patut dipeturun nyadi sebengkah penyelai main asal ke berega dalam pupu raban bansa Iban lalu patut mega dipandang suah agi ukai semina ngagai temuai indah menga ngagai peranak Sarawak ke datai ari mayuh bengkah bansa.
Sedarka pekara nya enggau ketegal pengerindu ke chukup dalam ba Gendang Pampat, Donald Bada, 48, enda malik ke belakang lebuh iya enggau sekeda bakih ke bukai numbuhka Gerempung Gendang Pampat Sereta Main Asal Iban Kuching (PGPSMAIK).
PGPSMAIK ke ditumbuhka dalam taun 2019 nya sebuah gerempung ke udah direjister enggau Opis Pengerejister Gerempung Bansa tauka ROS ke diraban 32 orang betuaika Donald dibantu Mandal iya Kunyu Mugang seraya Kaban Kunsil Negeri Layar Gerald Rentap Jabu nyadi Patron enggau Nicholl Ragai Lang nyadi penyading penemu gerempung nya.
Ngenang bakani Donald ari Gua Sukat, Sri Aman rinduka seni gendang nya, semua nya berengkah ari pengerindu ke dalam ba Gendang Pampat kenyau ari mit.
Maya begendang lebuh rami di rumah panjai menya nyengkaum gawa diatu nyadi tuju iya ngambi peluang nguji belajar seni tabuh nya.
Taja udah ngembuan pengawa tetap di bandar, Donald nganggap pengerindu iya ba seni Gendang Pampat patut diteruska sereta diangkat ngagai tikas ke lebih tinggi.
PENATAI GENDANG PAMPAT
Bakani palu gendang chara bebala mayuh nya disebut Gendang Pampat? Iya bepun ari pengawa nampar tauka malu kulit gendang ke dikumbai mampat tauka malut ngembuan tuju kena nutup ruang ba semua bunyi palu gendang ke bebida sereta ngambika iya bebunyi chara serebak.
Seni penyelai pemandang tabuh nya bepanggai ba ketebung iya nya sebengkah kereban tabuh asal bansa Iban enggau tabuh nya nyengkaum sekeda bansa tabuh bebida nitihka bengkah pengawa tauka gawa.
“Menya Gendang Pampat suah iya dimain maya gawa baka miring tauka besimah maya rami gawai ke diatur di tanju rumah panjai di perabung enggau di dalam rumah tang diatu di bandar iya dimain nyadika waris seni budaya idup ke patut diidupka baru olih sekeda gerempung tauka agensi .
Palu gendang kena nyambut temuai maya pengerami nya lembut sereta nyamai tang lebuh kena tabuh gawai, ayun palu nya lebih deras sereta kasar indah maya Gawai di tanju bisi sebengkah tabuh ke tau dikereja ba pengerami bukai,” terang Donald bekaul enggau penatai gendang nya.
Penyampau sida ke malu gendang ketebung ba genap sesyen pemandang nya ambis mimit lima iku enggau selebuan setawak, udah nya tujuh enggau selebuan setawak, sembilan enggau selebuan setawak, sebelas enggau selebuan setawak tang orang ke nebah gendang pampat meseti angka ganjil.
BETAMPUNG …