BALA Anak Mensia endang semampai diketakutka bala jelu.
JELU Mirah seduai Jelu Padi Baru sama irau ati pasal indai Kera ti deka berubat ba Manang Balie. Nya alai randau seduai mengkang pasal jalai Manang nya ke ngubat orang sebedau nya.
“Kira ke ukai gerai laban ubat iya orang ke gerai nya,” pia ku Jelu Mirah nimbal jaku Jelu Padi Baru.
“Nya meh ku aku punggal. Aku irauka indai Kera nya dilumai iya. Tudah indai Kera nya endang ngiga orang ti nemu berubat, laban iya ke selalu pedis isi. Gamal aya Manang nya serap endar. Pala dikempuk, jari diperuk, tunjuk dibatak, kechiak disilak, perus diuntus, dada dipurus. Tegu di kuyu enggau dada, keremuk di rusuk, jungka punggung, tangkap di rakat, enjungka patung, sagamka kanan, gamaka kiba, enda jena tudah indai Kera nya lagi asai ke pangkaka bena, tangkap karan,” pia ku Jelu Padi Baru.
“Enda tentu endar orang tuai nya. Perasa kitai meda gamal tak diau diri,” ku Jelu Mirah.
ANANG PERASA
“Anang perasa, punggal. Nya ke dikumbai orang ‘makai di dalam’. Peda nuan, iya semampai ngias diri. Pekayan empat-lima kali betukar dalam sehari. Agi regas aya Manang nya, anang saru,” ku Jelu Padi Baru.
“Peda nuan, iya ngerandau ibu indai Kera nya makin lama, makin rapat. Jaku kitai tiga tadi agi mekang-mekang, lalu apin temu tunga. Ka tak ensaraka randau seduai, enggai nyadi ga laban enda nemu utai dikejakuka orang orang,” ku iya.
Nyadi sekumbang Jelu Mirah seduai Jelu Padi Baru ke berandau ba ujung dan, Manang Balie seduai indai Kera ngeringak begama, laban tudah indai Kera endang lama udah ngiga orang ke nemu berubat. Jari begama, mulut bejaku. Nyadi ku Manang: “Aku enda tau ngarau begama wai. Enggai ngudahka orang ke ngasuh. Ukai nyamai natka pemedis, nya alai enggai ngayahka pangan,” pia ku Manang Balie.
“Nya meh utai ti digiga wai. Mayuh orang begama semina nechalka tunjuk aja, tak semina ngudahka kitai ke ngasuh. Bakanya ga orang ke nemu beurut-urut ku jaku, tang semina ngempuk kulit aja, enda tegigaka sebarang utai ke patut diurut,” pia ku indai Kera.
“Aku enda pia wai, enggai ngayahka pangan. Enti enggai, tak enda sekali. Beduan pangan sigi enda, nya pantang kami ke nyadi manang,” ku Manang Balie nimbal jaku indai Kera.
Iya pan lalu majakka pengawa diri ke ngubat indai orang nya. Indai Kera nya tak sebarang ku iya ngatur, ama tingkap, ama telentang lakak-lakak natka iya ti ngurut. “Lama udah pemedis nuan tu wai, enda ulih berumban enti deka berubat amat-amat,” ku Manang.
“Barang ku nuan meh wai, sigi lama udah ngiga orang ke landik berubat. Nasip endar ga betemu enggau nuan saritu,” ku indai Kera.
“Nya meh gaya utai ti semitan tak baka ke besemaya,” ku Manang.
Jari ngurut-mengurut, mulut kulap-kulap muchau. Indai nyau nyempekang-bangang nejuka iya ngenjing kenanas baka ke ngambi ulih ba indai orang nya. Belayan tudah Manang Balie endang enda besai, nya alai tak nadai tentu berasai indai Kera nya dienjun iya tubuh. Nyau kepuas ke meruk pala, engkechit ga iya ngagai pala patung indai Kera ke nyerungkung. Kelama ke bepusin meruk pala patung, terejun ga iya ngagai dada siku nya. Kena tinggang iya ke terejun nya baru bisi berasai mimit ba indai Kera.
NYAMAI DIURUT
“Nakal endar nuan wai, nyamai endar diurut,” ku Manang nganu indai Kera.
“Nadai ngawa nya wai bagas balat ari nya utai ke nating, tang nadai berasai kitai teleba gawa berat. Ubat dia meh, anang irauka aku enda nakal. Pedis tatka meh, isa ga gerai,” ku tudah indai Kera.
Nyau kepuas ke gila diri sebelah atas belakang, sebelah atas dada indai Kera, dia Manang Balie bejaku dalam ati diri. “Hah, ngumba bendar indai orang tu ngaga diri. Seduai nya enggai mindah-mindah ga ari nya. Nama utai kerandauka ngelama nya dia,” ku iya mutap dalam ati diri.
Nyadi sekumbang Manang ke berubat nya, Jelu Mirah seduai Jelu Padi Baru semampai nyeling ngagai tunga seduai sambil ke berandau. Nya alai seduai meda gaya pengawa enggau ulah Manang Balie ti ngubat indai Kera nya. Nya alai ku Jelu Mirah: “Balat jamah aya Manang Balie, tak baka ke ngenjun utai ngapa ngaga tudah indai Kera. Engka tak berasai nyamai iya nya kini, nama tak enda engkebut ditepan aya Manang,” pia ku Jelu Mirah.
“Eh nadai nya tentu nyamai deh punggal, tang ngenyadika diri ke gerai laban Manang nya ukai mudah muji diri landik berubat,” ku Jelu Padi Baru nimbal.
“Engka nya amat ga kini. Jalai berubat ukai nya sama. Lain guru, lain ga jalai. Bisi ga orang ke amat bisa, enggai ngayanka diri. Bisi penemu, padahka nadai. Bisi pengering enda dibantai. Tang sekeda orang ke nemu berubat ku jaku endang bedagangka penemu. Endang digiga orang ke sakit. Lebuh begama, macham utai ke temu ba tubuh orang ke sakit. Paku lawang meh utai ke dichabut ari pala patung. Bulu Landak dibatak ari punggung. Batu meh utai ke temu sebelah tubuh orang ke enda dapat nya. Tang orang ke diubat nya tak jarang bendar ke gerai, lalu mengkang kangai-kangai ngumbai diri lesi bebadi laya pumpung,” bakanya ku jaku Jelu Mirah.
“Amat ku nuan punggal. Manang Balie nya pan nadai meh udah nyengala ditemu bisa. Nama indai Ringin ke dibuat iya pagi tadi tak mengkang kalai-kalai nya dia enda tau angkat,” pia ku Jelu Padi Baru.
“Engka laban pengawa ke berubat nya apin tembu, laban indai Ringin nya ke rari enggai digama iya lubang seput. Tang tu lagi baru temu bendar, laban seduai iya indai Kera lama endar udah berubat. Tentu dabiska iya magang semua penemu ke dikena berubat,” ku Jelu Mirah.
BERASAI GELEDI
Nyadi sekumbang seduai ke berandau nya, Manang Balie endang majak ngurut tubuh indai Kera. Kepuas ke diperuk iya, indai Kera nyau berasai geledi lalu lekik-lekik ketawa, tang enda inggar enggaika seduai di ujung dan nya ninga. Lebuh ninga indai orang nya ketawa, dia Manang Balie makin ransing agi ngurut iya. Ngejangka berang, jari aya Manang, ensurukka rusuk, pautka perut mansa kanda lalu melelatka pusat. Datai dia, enda ulih tatka indai Kera agi tegal kelalu geledi. Enda berasai jari iya nipas jari Manang Balie ti lama nyinuk ba pusat nya. Jari sepiak ke bepegai nya lalu tebelengka ari dan kayu. Seduai iya Manang Balie lalu sama bela labuh be tisi midan mengkang bepakap ba pangan. Indai Kera lalu luput laban pala iya tepangka ba bandir di tisi midan nya.
Midan nya penuh laban bala mayuh ke datai deka mendingka aum. Tekenyit endar orang meda indai Kera seduai Manang Balie tak beberap labuh ari puchuk kayu. Sida laiu begau kia ngidupka indai Kera ke luput.
“Nama utai dipelayaka seduai di puchuk kayu dia tadi?” pia ku Tekura. Tudah Tekura nya tadi tinduk ba tisi midan, kesal bendar ati laban nyau deka kena tinggang seduai ke labuh nya. Indai Kera apin ngeleda, nya alai Manang Balie nyaut Tekura.
“Ukai belaya kami duai tu tadi Buat…berubat. Tang lebuh iyang aku datai, indai orang tu tekenyit lau luput tegal kelalu kesal ati. Meda iya luput lalu diberap aku. Nya kebuah kami duai tadi tak beberap peda kita,” pia ku Manang Balie.
Nyau kelama sida ke ngidupka iya, nya baru indai Kera ngeleda. Taja udah ngeleda, tang lama enda tau bejaku. Bini Manang Balie pan sama enggau orang begau kia. Apin seduai nya ke labuh, iya enda nemu Manang nya ngubat indai Kera di puchuk kayu din meda lupung iya enda dibai. Nya alai iya lalu nanya: “Kati ku nuan berubat, lupung enda dibai. Nama utai ke dikena barubat?” ku iya.
“Ukai nya semina dalam lupung utai ke dikena berubat. Semadi belian, nya baru begunaka utai ke bisi dalam lupung,” pia ku iya nyaut bini diri.
Nyadi kitai ngelengka cherita aum jelu naka tu dulu.
Oleh TELESA EMPERAN