![](https://utusansarawak.com.my/wp-content/uploads/2020/08/sape-1-1.jpg)
![](https://www.utusansarawak.com.my/wp-content/uploads/2020/08/sape-1-1.jpg)
SAPE tu sebansa kereban ke amat sinonim enggau raban bansa Kayan enggau Kenyah di Sarawak. Emang Wan, 66, ari Uma Bawang, Baram sekeda orang ke ngaga sape dikelala orang mayuh ba orang ke rinduka kereban musik asal sape.
Bebekalka pengelandik betukang enggau asil seni, iya meranika diri empu nguji ngasilka sape.
“Runding begagaka sape tu datai lebuh berundingka langgur pengawa ba sentang pekara ke deka dijual lebuh udah ngetu gawa lalu beratika barang ke deka dijual.
“Nyadi berengkah ari nya aku berunding begagaka sape,” ku iya sebedau tu betukang ngaga rumah orang.
Kelimpah ari ti landik ngaga sape, Emang mega ngaga asil pengelandik jari bukai nyengkaum terabai.
Ku iya, semua asil pengelandik jari iya mayuh dijual lebuh ngambi bagi dalam pemandang tauka pengerami ke diatur ngelingi Miri, Bintulu enggau Kuching.
PROSES NGAGA SAPE
Milih kayu ke bekualiti kena ngaga sape mega patut dikemeratka ketegal semakin manah kayu, semakin manah sereta nyaris bunyi ke deka diasilka.
Sape betuku nyau deka sebaka enggau perau. Ba muak ke mua dirata, seraya muak ke belakang nya ditebuk lubang ke panjai lalu enda tentu dalam.
Emang madahka, proses ngaga sape bisi mar mimit kelebih agi lebuh milih kayu kena ngenukuka iya tan lama sereta ulih ngasilka bunyi ke nyaris sereta manah.
Nundaku iya, ngelama lebih 10 taun iya ngaga sape, kelalu mayuh pekara ke udah dipelajar iya, kelebih agi milih kayu ke nengkeman.
“Pilih kayu ke udah tuai ketegal iya dijamin tan lama, kelimpah ari bunyi ke nyaris sereta manah didinga lebih ditebah.
“Kelimpah nya, maya enggau musim ke ngipak kena ngempat sereta nebang kayu mega beguna amat. Nyema digaga ari kayu sengapa, kadang-kadang dalam tiga bulan udah bisi sampuk makai kayu nya. Enti kitai ngempat kayu nya nitihka maya enggau musim, sampai bepuluh-puluh taun pan nadai sampuk deka makai,” ku iya.
Antara kayu ke manah kena ngaga sape nya kayu tapang, kayu medang enggau merebau.
Nerangka panjai agi, Emang madahka, proses nangkanka tu nya melah dua kayu ke dipilih ngena chinso kena nempa lumpung kayu ke nengkeman enggau pemesai sereta ngipak siti sape.
“Udah proses nebuk kena nempa langkar sereta pala sape. Udah nya baru ngukir langkar Sape, ukir baka tukuh burung kenyalang, tukuh Orang Ulu tauka sebarang tukuh ke manah nitihka peneka ati,” ku iya.
Proses ke penudi ngaga sape nya ngelekatka fret enggau masang tali ginti bansa ‘steel’.
Emang madahka ambis nadai nya tiga sampai empat hari kena iya nembuka siti sape bepanggai ba tukuh enggau pemesai.
Rega siti sape djual iya bisi manggai ngagai lebih RM1,000 bepanggai ba pemanah kayu enggau tukuh.
ENDA RANGKA BEKUNSI PENEMU
Udah nyadika pengandal Emang ngambika mayuh agi orang kelebih agi nembiak baru sama ngambi bagi dalam pengawa begagaka sape ngambika enda lenyau ulih pemoden muzik jeman ke diatu.
Emang madahka, naka ke diatu nadai anak tauka bala uchu iya nitihka singkang kaki iya begagaka sape, tan iya enda luki meri peluang ngagai barang sapa ke bisi pengerindu deka ngaga sape datai ke rumah nya belajar handikraf tu.
Nundaku iya, sebedau tu iya kala ngajar siku nembiak universiti ngaga kereban musik tu.
“Aku enda minta iya mayar apa-apa, chukup iya mantu mantaika sape ke udah diasilka aku udah nya mai orang datai meli iya.
“Tu sebengkah ari pengawa aku kena mantai sereta ngetanka kereban musik asal ngambika enda lenyau,” ku Emang ke mega landik nebah sape.