![](https://utusansarawak.com.my/wp-content/uploads/2020/07/IBAN-1.jpg)
![](https://www.utusansarawak.com.my/wp-content/uploads/2020/07/IBAN-1.jpg)
Tusun Ke-27
NGENANG pasal Dayak ‘Ibanic Group’ ti keterubah datai di menua Sarawak iya nya endang Dayak Iban (Remun). Sebedau nya, menua pesisir, ulu sungai, kampung jerung endang agi diuan, mayuh macham bansa jelu, antu, kelimpah ari bansa Baketan, Seru, Beliun, Lusum, Lugat enggau iya ti bukai. Tuai bansa Iban Remun benama Numpi mih pun telesak sekeda ari bansa Dayak (Bidayuh), Iban Sebuyau, Iban Skrang, Saribas, enggau bukai. Taja pia, sebedau nya Dayak ti bejaku ngena jaku Iban tu, apin disebut nama Iban.
Peturun Tindin “Pimpin Bragah Ngindang” ngadaka mayuh Tuai Iban menua Saribas.
Menyadi indu Uyut “Bedilang Besi” ti benama Beremas belaki jadi enggau Blaki lalu beranakka Tur “Bayang Kain”, Ugap enggau Lada. Sida tu diau mendam sereta bumai betaun di Tanjong Kundong sama enggau menyadi Blaki ke benama Jimbai, Jelema, Umar, Buma enggau Kadir. Maya nya bala Dayak Iban di menua nya udu amai dikachau bansa Seru ti datai ari Bukit Tengkalat.
Kayau Anak Bala Seru
Maya nya bala Seru bejalaika kayau anak ngulu Melupa melunggang ke Rimbas lalu ngili Keribau lalu nujah Batang Rimbas lalu ngulu Sungai Ulai. Datai ba Bukit Tampak Panas raban bansa Seru nya nengah Tinting Kara lalu rembus ba Sungai Engkaru di Sungai Paku. Datai ba Nanga Engkaru sida ngili Sungai Paku lalu datai ba Nanga Samu. Dia mih seraban bala Seru betemu enggau bala nembiak Belaki ke mansang ngetau sama enggau indu lelaki nengah jalai umai. Bala Seru pan enda chamang-chamang lalu nyerang sida. Tiga iku sida ke parai maya nya iya nya Blaki seduai bini iya Beremas enggau Kadir. Ninga penusah tu Jimbai, Umar, Buma enggau Jelema sereta sida serumah bukai begau deka bebalas.
Jimbai Malas Kayau Seru
“Apuu…, amai deka beambu munsuh enggau kitai Iban mih bansa Seru nya! Alauuu…kita bebalas,” pia ku Jimbai. Sida pan beguai-guai bedarat nitihka bala Seru nya. Datai ba nanga Samu, Jimbai pan merejuk ai Sungai Samu ba nanga lalu terengkah ba tebing seberai lalu majak nitihka bekau bala Seru nya. Datai ba tuchung Bukit Tampak Panas, Jimbai ke dulu pan tepeda sereta betemu enggau munsuh ti benung niki buah engkeranji padi. Seiku ari sida ti nguan ba ai sungai benung ngantuk duduk. Jimbai manchak munsuh nya ngena sangkuh. Dua iku bala Seru ti datai deka bebalas tang nyadi dengah Jimbai mega. Meda baka nya bala Seru pan berumban ngerarika diri. Jimbai enggau bala iya pan seruran ngagai munsuh sida nya . Enda lama udah nya sida pan betemu enggau munsuh. Bendar sida bamuk enggau bala Seru ti nguji deka ngetanka diri; tang laban ti udah tulah dulu mungkar Dayak Iban nya, bala Seru pan alah. Pala Blaki, Beremas enggau Kadir ti udah didengah Seru ba Nanga Samu pan dirampas sida. Bala munsuh ti agi idup rari tang Jimbai enggau bala iya enda nitihka sida nya laban udah lelak bendar.
Pala sida tiga ti dirampas sida Jimbai tadi enda dibai pulai lalu ditumbakka sida ba sepun kayu tapang.
“Tapang tu lalu diempu kitai ke ngelaban Seru nya. Anak uchu Uyut enda enggau bempu tapang tu laban iya nadai enggau kitai nitihka munsuh,” pia ku Jimbai bejaku.
Maya nya Uyut “Bedilang Besi” amat enda enggau sida Jimbai laban nadai ninga rita pasal penusah nya, ukai iya enggai. Tambah mega iya endang jauh diau di ili Batang Paku di Nanga Selamui udah ke bebini nguaika Nangku anak Saang seduai Selaka.
Dayak Iban Bemunsuh Enggau Seru
Berengkah ari nya mih Dayak Iban serata menua Batang Paku sereta peturun anak telasak Tindin bemunsuh enggau bansa Seru. Udah penyarut nya, bansa Seru nyau majak deka ngelaban bala Dayak Iban di sebelah Ulu Paku. Sida mega minta bantu bansa Baketan enggau Beliun. Meda baka nya sida Jimbai enda berani diau ba tebing ai Sungai Paku agi. Sida pan rari ke Ulu Sungai Samu lalu berumah ba Nanga Meluang.
Lebuh sida diau ba Nanga Meluang, tuai Iban seiku ke benama Awan ari Padeh bisi ninga rita penusah orang Batang Paku ke mayuh bendar munsuh ti selalu ngayau sida Jimbai semenua. Nya alai iya pan nemuai ngagai rumah Jimbai di Nanga Meluang.
“Penatai aku ke menua kita ditu, ukai penemuai semina rindu ati aja tang bisi kebuah, bisi tuju. Aku sinu sereta muras amai ninga rita bansa Iban di menua kita ditu udu amai dikayau munsuh. Sapa munsuh kitai Iban ditu, unggal?” pia ku Awan ngepunka randau sida.
“Bansa Seru nya mih, unggal. Tang diatu nyau mayuh semayuh bala Baketan enggau bala Beliun mantu sida nya. Udah menyadi tuai kami ti benama Belaki seduai bini sereta menyadi kami empu dibunuh sida Seru suba, nya mih pun kami di Batang Paku ditu beambu munsuh enggau sida nya. Sida ti dulu mungkar nanjar munuh kami dulu. Kami ukai kala bisi uti bunuh enggau sida nya,” pia ku saut Jimbai.
Awan Mantu Jimbai Ngelaban Seru
“Ngelama tu kumbai aku manah-manah mih sida Seru, Baketan enggau Beliun nya diau semenua enggau kita di Paku ditu. Diatu sida udah deka bemunsuh enggau kitai Iban nadai ku enggau mih. Nya alai aku deka nguluka kitai Iban ari Padeh mantu bansa kitai Iban di Batang Paku ditu munaska nya,” pia ku timbal Awan baru. Gaga amai sida Jimbai semenua ninga jaku Awan nya. Sida nemu Awan nya endang seiku ari tuai bujang berani Iban di Padeh.
“Ngelama tu kami enda berani ngelaban munsuh kediri laban kami enda mayuh tubuh. Tu manah bendar nuan datai deka mantu kami. Sayauka menua Batang Paku tu enti enda ulih diempu kitai Iban. Munsuh makin mayuh bendar, kenyau ari ulu Paku nyentuk ke Julau enggau Kanowit lalu nyentuk ke Batang Rajang; bansa Seru, Baketan, Beliun, Segalang enggau bansa Rajang nya endang nyadi munsuh kita Dayak Iban magang laban sida nya udah dulu ngachau sereta munuh bala kitai Iban sebelah umai, sebelah kebun,” ku Jimbai nimbal Awan baru.
“Nya alai berengkah ari diatu, aku minta semua kita lelaki nyediaka diri bebalas sereta muru munsuh nya. Kati kita udah sedia deka enggau aku ngayau?”
“Sedia. Alaauuu…, kitai ngayau diatu!”
Ninga munyi nya, Awan pan ngaga perambu begulai enggau Jimbai nguluka bala Iban ngayau bala Seru enggau Baketan di ulu Layar laban agi bisi munsuh tedai dengah Awan. Udah sida nyendiaka bekal enggau perengka kayau ti bukai, sida pan nurun ke ulu Layar. Ba kayau tu, balat amai munsuh tasah ditachahka bala Awan enggau bala Jimbai. Udah nya sida ngayau ngalahka bala Baketan di ulu Anyut. Udah munsuh di ulu Sungai Anyut nya alah, semua bansa Seru enggau Baketan di menua Paku enda berani agi begulai pendiau enggau Iban Batang Paku lalu rari ke Julau enggau Kanowit.
Awan Dipadu Nyadi Tuai Menua
Udah bala Dayak Iban mujur muru munsuh sida ari Batang Paku, Awan pan madahka diri deka jadi enggau Lada; iya nya anak indu Belaki seduai Beremas. Udah Awan ngisi peminta derian palit mata, Awan seduai Lada pan jadi melaki bini.
Udah Awan jadi enggau Lada, Awan pan dipaduka sida semenua megai menua ari Nanga Samu lalu ngulu Batang Paku. Menua Paku ili enggau Sungai Anyut dipegai Uyut “Bedilang Besi” anak Busu, menantu Saang seduai Selaka.
Udah munsuh nyau nadai agi, Awan nguluka sida Jimbai mansutka diri ari ulu Samu ke Batang Paku baru. Angkat sida ari Nanga Meluang, sida pan diau mendam di sungai Labi agi dalam Sungai Samu mega. Udah nya sida pan pindah baru ngagai tanah antara Sungai Samu enggau Batang Paku. Lebuh diau dia, Awan pan ngatur bala sida ti patut bempu temuda nebing ai Batang Paku ke udah diperimba bansa Baketan ke diau dia dulu ari bansa Iban di Batang Paku.
Angkat ari menua antara Sungai Samu enggau Sungai Paku, sida pan pindah lalu diau bumai betaun di Tembawai Engkabang, Nanga Sengiam, Tembawai Nunggie enggau Sungai Mengeris. Lebuh sida diau di Sungai Mengeris, sida lalu ngatur baru samoa rimba ari ulu enggau ari ili Sungai Mengeris baka tu:-
(Betampung ba Tusun Ke-28 minggu nyin ila)
Nya mih pun penatai nama bansa Dayak ti bejaku ngena jaku Iban di Sarawak sepengudah sida belaya enggau bansa Baketan di menua Paku. Udah peturun anak telesak Numpi di besaruk enggau bansa Baketan di menua Paku. Bansa Iban majak berumpang menua ukai deka ngiga munsuh tauka nyadi “headhunters” munyi ku penulis bansa bukai. Sida deka ngiga menua baru ti tau diperumpang sida endur bumai betaun. Terima kasih ngagai kaban FB ti udah ngirumka mayuh gambar bansa Dayak Borneo.
Ditulis Harry Usup Umbar (B.Sc Hons. Human Development, UPM)