![](https://utusansarawak.com.my/wp-content/uploads/2021/01/Bekayuh-make-perau.jpg)
![](https://www.utusansarawak.com.my/wp-content/uploads/2021/01/Bekayuh-make-perau-1024x768.jpg)
Tusun Kedua
AKU jampat pansut ari dalam ai lalu berati sekalika orang bisi ninggalka sengayuh di pendai. Nasit bendar bisi. Aku enda masau jam; nadai berundingka ngiga orang alai betanya nginjau perau. Ada aku buka tali luan perau lalu belabuh aku enggau naka pengering aku bekayuh mudik nebing sungai apin aku ngelayang ke seberai nuju endur anak perengka aku.
Nasit hari nadai ujan jam nya. Laban ba kira aku ai bah nya laban ujan di ulu din. Aku ambi jampat anak ma alai perengka aku lalu nyau aku bekayuh ngerambing tebing ke ulu baka aku ke deka ngelayang mansang tadi. Udah dikira aku chukup bansi, baru aku mutarka perau awakka ngelayang. Ngayuh sereta ngemudika perau nya balat agi nguna pengering. Taja enda tent begamal, pengering aku chukup dikena aku ngidupka diri. Puji Tuhan, aku datai di pengakalan sida enggau selamat. Enggau nya, tembu cherita aku ngidupka diri ngelaban bah taja pan nya ukai nyelamatka diri ampuh rumah.
PENGAJAR SEMENTARA
Cherita ampuh rumah lalu pindah ngagai endur ngenduh bisi disepi aku ba taun 1964, maya aku udah badu sekula lalu ngajar sementara di Sekula Local Authority, Nanga Budu, pegai Saratok, sebedau aku masuk belatih di Batu Lintang Training College. Belabuh ngajar di sekula nya ba pun taun, nya alai hari belunggur amat ujan. Kami dua pengajar siku, Pengajar Embuyan begulai bilik di belakang Kedai Gerempung (Cooperative Shop) di Nanga Budu. Rumah nya didirika ba tebing ai muak ke Sungai Budu. Endur nya baruh agi ari rumah bukai ti alai rumah alai berubat, dispensari enggau bilik kelas. Bilik alai kami dua nya ba belakang kedai lalu melasar tanah. Ba mua nya ari sepiak kiba enggau kanan nya bilik alai barang ti dijual. Ba kedai nya mayuh macham barang ti diguna maya nya baka beras, gula, pemakai dalam tin (sadin), bemacham-macham ruti, ikan masin, pusu, bawang enggau sekeda perengka dapur.
ENDA KALA BAH
Di sepiak, bisi kedai baju enggau tanchut lalu bisi stor alai nyimpan getah ti dibeli lalu bedau diundur awakka dijual ngagai tuke di Saratok. Dia mega bisi rengka berumah baka atap sing, tukul, paku lawang, sandak etbu ti bukai.
Ba pun lemai, hari enda ngetu ujan tang enda tentu bangat. Nyau muak ke tengah malam, hari lalu bangat-sebangat. Bala kami nyengkaum kami dua Pengajar Embuyan tak sedia enda-enda laban bah ke udah dulu ari nya ba menua dia, enda kala ngampuhka rumah kedai. Taja pia, kami dua pengajar enda ulih tinduk; selalu nenggau ngagai tunga batang ai. Urung pukul 1.00 dini hari, paras ai udah niki. Kami dua besedia pindah mai sebarang utai ke beguna bendar kelebih agi gari kami dua. Barang nya dipindah kami dua ngagai sadau rumah nya, ti dikena nyadi opis.
Seninjik kami dua jampat pinda laban enda datai sepuluh minit ai udah ngampuhka bilik kami dua. Kami dua beguai-guai ninggalka rumah nya nuju rumah bilik kelas. Jam kami dua pansut ai udah tuntun patung. Arus ai deras lalu hari majak ujan sereta guntur enggau kilat ti nyelar baka pechik lampu letrik di langit. Nambahka nya, ribut bepuput. Jam nya siku deriba sempat ngambi dua buah injin sepit ti disimpan ba bilik setor ari ulu rumah kedai lalu besedia enggau sebuah perau. Tuai kami madahka kami enda ibuh nguji ngapuh barang ba kedai enti ai majak besai. Dalam petang enggau penyelap dini hari nya bala kami sebuat bela beengkerendut dada; chelap naka iya.
GAGA ATI
Nasit bendar urung pukul dua dini hari, ujan belinsur teduh. Gamal ai pan nadai agi mansang. Ati kami gaga laban kami ngadang diri ngemataka barang dalam kedai balat agi rusak. Kami ngadang dinding tau tebabak diteruju ai ti ngujungka barang bekelepung anyut. Hari enda berasai nyau teringkas siang. Ai pan bisi tanda deka surut. Lebuh hari siang kami beguai-guai ngabas barang dalam kedai. Mujur nadai mayuh utai rusak laban utai ke lempung-lempung udah dipanggaika ba sengkan dulu rinya. Semina kelapis getah ti udah diikat udu basah tang enda tekusai. Ari bekau ti lekat di dinding, kami nemu ai ngampuhka kedai urung tuntun punggung. Nasit bendar semina naka nya. Langkar tauka dinding rumah nadai rusak. Semina geladak semin ti nyau latak laban luchak dibai ai.
Bah di menua ulu baka nya nadai lama. Tambah mega ai enda tak kelalu besai baka bah kemaya hari tu datai ke ngampuhka perabung rumah tauka ngeruntuh sereta nganyutka jematan tauka rumah ke enda tegap. Kelia jarang bendar ninga orang besebutka orang dipindahka ngagai Palan Pengenduh lalu nadai mega kala ninga Komiti Penyangga Penusah Ngenyit ditumbuhka baka kemaya hari tu. Nambahka nya, jarang bendar ninga orang mayuh bebadi nyawa. Nyelai amat. Kenu ku pansik bala scientis ke pandai, ai udu bah besai kemaya hari tu laban kayu kampung di ulu sungai nyau abis ditebang lalu nadai agi nyekat ai ujan ti labuh. Dunya nyau berubah nyadi angat lalu nganchurka beluku ais di menua chelap, Artic enggau Antarctic. Tu ti ngasuh paras ai di dunya nyau niki ti ngujungka menua tau ampuh lebuh pasang raya nyadi. Lebih ari semua, mayuh orang belaba ka dunya diatu nyau kudi, nya alai mayuh macham utai ti enda disadang nyadi lalu mayuh macham penyakit pansut lalu berampit di serata dunya lalu munuh bejuta-juta mensia.
Oleh JANTAN UMBAT