![](https://utusansarawak.com.my/wp-content/uploads/2020/08/hutan-belantara.jpg)
![](https://www.utusansarawak.com.my/wp-content/uploads/2020/08/hutan-belantara.jpg)
TUSUN KEDUA
TUKANG PENEMPA BUAH
MEDA baka nya, petara penguasa tanah, Raja Sempulang Gana, ke diau di menua ke dikumbai Letung Jalung Temaga, masih irau ati.
“Nadai penyadi ti lalu beketu pendiau sida utai tanam tu, bekayu, berandau bisi tang bebunga bebuah lalu nadai. Nama dih ke diempa anakmensia dih!” ku putap iya. Nya alai Raja Sempulang Gana lalu berunding dalam-dalam, begiga chara mutarka penusah nya. “Manah enti aku mesan Burung Kung Kapung, laban iya nya ke udah ditemu rita pandai nempa buah mayuh bansa kayu, babas enggau randau ke alai bala jelu, burung, ikan beridup.”
Lepas nya, Raja Sempulang Gana, ke suah mega dikangauka orang Rangkang Kirai, lalu mesanka Burung Kung Kapung. Burung Kung Kapung pen datai ke rumah Raja Sempulang Gana, nelusur leka pesan.
Lebuh seduai betunga berandau, dia Raja Sempulang Gana madahka pengirau ati diri meda bansa utai ditanam di umai bisi ngapa, tang mih lalu nadai mansutka bunga enggau buah sida ke pemakai anakmensia.
“Ari nya, aku madu nuan nyadi tukang penempa bunga enggau buah kayu, laban aku nemu nuan bisi pengelandik tunga kia, awakka pengawa nuan tulin nempa bunga kayu enggau utai tanam ke ba umai anakmensia ngambika nyadi buah ke pengidup anakmensia.”
“Nuan ga bechayaka aku, Raja Sempulang Gana, nya alai, nguji mega aku, ni dih nyadi anakmensia nadai pemakai ti ke pun pengidup. Timpang penyadi dunya!”
Burung Kung Kapung pen lalu terebai pulai ke menua iya-empu di Bukit Tekam Sengayan Sepiak Piam Nyilup Remang, Tatai Lantar Pendawan Tutuk Telian Ujan Sayang.
RAJA SEMPULANG GANA
Nya alai, kenyau ari sehari nya, udah bekau kena panah Raja Sempulang Gana, Burung Kung Kapung lalu berengkah nempa bungai enggau buah padi enggau semua utai tanam ke ditanam anakmensia ba umai. Semua buah utai tanam ti ditempa iya maya hari panas manis sereta lemak diempa; semua ke ditempa iya ngelaban ujan, buah nya masam tauka kelat diempa. [Kenyau ari cherita tu ke nyadi kelia nyentuk ke seharitu, pengarap Iban lama sigi ngumbai Burung Kung Kapung mih siku-siku nya burung penempa bunga enggau buah kayu enggau utai bukai ti ditanam anakmensia. Nya alai nyentuk ke seharitu, enti Iban bejarit ninga nyawa Burung Kung Kapung dalam taun nya, sida andal amat ati, laban nya ke tanda kayu buah deka bebuah raya, lalu Iban ke bumai nyadang diri bulih padi].
Berita pasal pengelandik Burung Kung Kapung ke nempa buah nyadi nyau sedura di baruh hari. Nama iya tebilang amat ditemu semua orang. Ketegal iya ke tebilang ditemu orang, kelimpah ari ngembuan baga idup ti ditemu manah, dia kemayuh agi bala binatang, nyengkaum sida Ketupung sebiras, lalu milih iya nyadi Tuai, nganti Menaul ke udah rari ari menua sida di Ranyai Ngeledi.
Sekumbang iya udah dipilih nyadi Tuai, dia pengawa iya ke nempa buah semina dikereja iya main besambil aja, laban iya nyau mekuh enggau ngemeranka pengawa nyadi Tuai megai semua bansa binatang di menua Ranyai Ngeledi nya. urung. Sekumbang udah dipegai iya, dia nembiak redak nyau belinsur lantang senang dalam pengidup, laban madu bunga kayu sepenegar nuchung, buah kayu penegar nyawa makai. Iya enggai enda nguna pemandai enggau pengelandik, pengeliat enggau penyikar, pengelurus enggau pemanah diri megai daun, ngempung bala laban iya enggai kena rinding sempama tuai ti nyebut “Pengkalan enda tau alai bemalam, enda umbas selebuan langkan perau; langkau palan enda ulih endur pereman, enda umbas alai nganyam selebuan gadang semambu.” [Dituduh nyadi Tuai deka tang udah nya enda teiringka nembiak redak ngereja pengawa begigaka penyenang enggau pengelantang].
KENA PETENAH
Nya kenu, nyau keleju kebangai utai bala burung ke dipegai Kung Kapung, dia alai bala burung ke besai-besai gamal enggau ke kering, baka sida geruna, kenyalang, ruai, tajai, menaul, beruie enggau kejakuh tumbuh tak kepapas ati ke Kung Kapung ke nyadi tuai sida. Burung Kejakuh dulu naburka jaku petenah, madahka tuai sida, Burung Kung Kapung bisi salah pengawa enggau Burung Tungguk, iya nya rambang Bulan. Lalu Burung Kung Kapung empu nyangkal. Bini Burung Kung Kapung mega nyangkal senaka iya laban iya-empu nadai nemu laki diri bisi beleman enggau Burung Tungguk. Lalu Burung Tungguk nyangkal enggau sabak-sabak.