![](https://utusansarawak.com.my/wp-content/uploads/2021/01/Kapal-karam.jpg)
![](https://www.utusansarawak.com.my/wp-content/uploads/2021/01/Kapal-karam.jpg)
Tusun Ke-4
JAM nya Joshua ke dalam pejalai iya ari Betong ngagai Pantai Alit dibai anak iya nyau nuntung di endur ke dituju iya. Sepun pedada bejerangku urat ti alai iya ngeleda kelia, nya ti digagai iya. Pun pedada nya meruan lalu agi dikelala iya. Pun kayu nya nyau jauh besai lalu udah mayuh pun pedada bukai tumbuh ngimbai iya. Antara pun pedada nya enggau tasik nya anchau pasir burak. Maya penusah nya jadi kelia, nyangka pasir nya ampuh pasang kini alai Joshua tak tedampar lalu tepanggai dia. Lebuh iya ngeleda menya, iya tedingaka sangap orang begau. Deru bilun engkabang mega bisi didinga. Maya nya baru iya nemu diri agi idup.
ASAI KE BEMIMPI
Tadi pengingat iya di serantu jalai asai ke mimpi. Seduai menyanak iya nadai berandau di serantu jalai. Jalai ari Betong ngagai Kabong mansa mayuh simpang; baka simpang Debak, Simpang Pusa, Simpang Saratok terus ke Simpang Roban lalu ngagai Kabong jauh udah manah ari maya MV Pulau Kidjang karam suba, Taja pan apin tembu, Pan Borneo benung digaga lalu arung jalai mayuh dipejuruska. Taja mayuh jalai benung digaga, iya nadai luchak lalu nadai alai lekat. Jalai nya ulih ditengah bas. Empat puluh enam taun udah belalu, dunya udah jauh berubah. Nasit iya agi idup meda pemansang. Nasit..nasit.. ku iya nyebut dalam ati.
Lebuh nuntung di Pantai Alit, Joshua serintak nyabak. Pengingat iya betampung …. Dalam setengah sedar, iya asai ke ditanggung orang. Iya enda nemu endur diri. Iya semina bisi ninga deru bilun ti dikira iya bilun engkabang. Bisi orang bukai digalika semak iya. Iya ngasaika diri balat lembut tulang. Mata rapa, pending enda tampak utai didinga. Kaki jari asai ke mar engkebut; penat sereta kaku. Seninjik idung agi ulih ngembau. Nasit pala agi ulih dikena berunding. Nyau kelama munyi bilun ngetu. Bisi didinga munyi bukai. Munyi ambulance; kiuk-kiuk. “Oh tentu aku ditaban ngagai sepital ku ati Joshua,”. Iya ngasaika rentak kerita nengah jalai darat. Iya nemu diri bisi jalai idup. Puji Tuhan ku ati iya.
Joshua ngasaika diri bisi diachuk orang idung lalu ditangkup orang mua. Bisi asai lengan ditanchum orang ngena jarum. Joshua ngasaika bisi nyamai agi enseput. Bisi asai perut bisi teritik ai. Bisi berasai kenyang mimit. Iya ulih enchelak. Perening iya ke kiba, ke kanan. Mayuh orang bela bekegaring ba katil. Iya nemu diri udah digari sereta dikumbu orang enggau pua tebal. Bau ubat ba kelinik ngaba. Baru iya nemu diri udah diau di sepital.
Lebuh Joshua nyau kering agi pengingat munyi ti ditusui iya ari pun tadi nyau makin terang. Iya nemu diri ditaban sereta diperubatka di Sepital Sarikei. Ba tisi katil dia bisi apai enggau indai iya. Di ujung katil ke tisi mimit bisi orang ke pemadu dikingin deka dipeda iya; Mary sesikuk nyabak. Iya datai ke mua lalu ngenggam rat jari kanan Joshua. Pengangat jari Mary mai pengadang enggau pengarap. Enti iya terus mati ku ati Joshua, tentu orang semina begauka bangkai iya. Lebuh iya nyau regas agi, iya tesedu ninga orang berandauka pasal penusah karam MV Pulau Kidjang. Berita nya ditusui ba surat berita. Gelesi iya ninga orang nyebut 121 iku orang mati lalu semina 38 iku orang agi idup. Seminggu-minggu iya di sepital orang berandauka orang di senebing-nebing tasik kenyau ari Selalang, Gerigat, Sesang, Alit datai ke Kabong orang tetemuka bangkai agi nyengala enggau repik mensia. Orang nadai rajin berikan. Berapa bulan udah nya pan orang agi geli.
SEMINA NYADI SEJARAH
Sebulan-bulan nya orang nyebut pasal penusah nya. Kaban belayan orang ke lenyau diri sebilik dikangau orang magang awakka ngeripot tauka meri penerang ti tau dikena ngelala kaban diri. Laban mayuh tubuh nya enda nyengala agi, nya alai kubur di darat digaga orang begulai mayuh. Siku pengarang berita kiruh besidika cherita orang ke ngapuh enggau nyidi mensia ke mati. Iya beambika gambar lalu betanyaka orang ke lenyau diri sebilik. Asil pansik iya nya lalu digaga iya nyadi bup, “Tenggelamnya MV Pulau Kidjang”. Agi mula-mula suba, agi ulih dipeda kenaya bangkai kapal nya ba tiban Tanjung Jerijih ba Nanga Batang Rajang tang nyau betaun-taun tu ke udah, tentu tusah deka nemu bangkai kapal nya agi.
Pengelama empat puluh enam taun ti ke udah, nadai udah jalai ngangauka bala ke agi idup awakka betemu enggau pangan diri. Joshua ingatka John. Munyi ku cherita iya nadai ditemu tubuh nyengala. Apai enggau indai tuai sereta anak seduai tentu agi mengkang dalam kibin kapal tauka enti ulih pansut tentu nya nadai nyengala agi lalu ditumbak begulai enggau bala mayuh. Joshua enda nemu endur nya. Joshua mujur jadi enggau Mary lalu beranak empat iku. Anak tuai iya mih ke nganjung iya ngagai Pantai Alit awakka iya ulih nyenguk endur iya ditemu lalu diselamatka orang baka ti dikereja iya tiap-tiap taun enda ngelaung. Joshua berasai besukur sereta beterima kasih ngagai Petara laban ulih nyangkung iya. Enti enda pia, nasit iya pan baka enggi orang ke begulai lubang siti kubur. Pama ga enti pansut digumpul orang repik tubuh tang sida ke tepagang, naka mih pengasih sida iya tak midang pia aja, “Sada sida enda didinga, Laya enda Benyawa, Kubur Sida Enda Betanda”. Taja baka nya, Joshua besampika semengat sida tau diau meruan dalam selamat. R.I.P.
Penusah nya semina nyadi sejarah tang enti bisi rejeki Joshua deka ngiga belanja dikena nirika siti tugu pengingat tragedi nya ti ngambi nyawa 121 iku mensia enggau mayuh agi ke lesap ninggalka dunya. Joshua besampika pengawa ke ngaga filem Titanic Sarawak deka mujur awakka nya ila tau nyadi pengingat ti tau pulai ke lalau, ke tenggau enggau ke pelajar orang rebak dudi.
Oleh JANTAN UMBAT