People in Court vector illustration. Cartoon flat advocate barrister and accused character standing in front of judge and jury on legal defence process or court tribunal, courtroom interior background
Dalam Tusun Ke-14 ti dibacha kitai minggu dulu nyin kemari, Dia Cherpan Lalau Pendiau: Raja Sebaginda Bujang Seduai Anak Chuik Keramatnyerita pasal Raja Sebaginda Bujang seduai Anak Chuik Keramat dilepaska ari rumah tutup nitihka perintah Baginda Raja Merom. Dalam minggu tu alai kitai tentu deka macha cherpan tu kujung ke agi. Nama enda kini kelikuh ti nyadi ba Tusun Ke-15 tu, aram sama-sama mih kitai macha cherpan tu nyentuk ngagai pengujung Tusun Ke-15 tu.
“Au, nuan nya tadi, Raja Muda?” Ati Raja Sebaginda Bujang bisi rawang diberi Anak Chuik Keramat. Iya lalu ngulurka jari, nabi Raja Muda. Raja Muda enda tepantup pengauk ati, tak lalu nyengkauk iya laban udah abis ati ninga berita tudah tuai deka dibunuh Raja Merom.
“Raja Besai, ah, iya tu lah menyadi tengah tua. Nama iya Raja Sebaginda Bujang. Iya diau di menua ulu,” ku Raja Muda.
“Memang betul, Raja Merom. Aku tu mih Raja Sebaginda Bujang ari Panggau Libau. Nyadi iya tu dikumbai Raja Muda, laban iya pengkuan ke kitai tiga diri menyadi. Nuan tuai pemali nama ke kitai tiga. Apai kitai Raja Meru.” Tak tau selubang utai ti disebut Raja Sebaginda Bujang seduai Raja Muda. Seduai sama diberi Anak Chuik Keramat rawang dalam ati.
“Nadai lah niang apai menya kala madahka aku iya nya aku bisi menyadi bukai. Semina utai ti kala dipadahka iya, aku tu anak tunggal, endang nadai menyadi bukai,” ku Raja Merom, laban ati iya apin bisi beamatka penemu Raja Sebaginda Bujang seduai Raja Muda.
“Sigi apai tepeselak runding, enda tepadahka pekara tu ngagai nuan,” timbal Raja Muda. “Nya kebuah kami duai Raja Sebaginda Bujang datai kitu beentudi pangan, nepat nuan laban deka ngerapatka kaul enggau kempit kitai diri menyadi ke endang sedarah segetah. Agi ga kedua, kami duai rembus ba mengeri nuan laban deka mai nuan ngatur utas enggau lebas reta enggau pesaka tuai kitai ti lalu apin dipedua nyentuk ke seharitu. Nya alai, penatai kami duai tu, mai nuan bedua reta tuai kitai.”
Raja Sebaginda Bujang pen lalu nangkir jaku Raja Muda. Ungkup pesaka diletak iya baka tu enggi sida tiga diri menyadi:
Raja Merom bepemaika pintu gemuru mas laban iya tuai ke sida tiga lalu patut mai lanting apai sida. Lalu reta enggau pesaka ti bukai dipuar seduai iya magang ke ungkup seduai iya Raja Muda.
Raja Merom enda besetuju enggau atur nya, laban semua reta tengkira ti ditinggalka Raja Meru parai, endang ungkup iya kediri lalu nadai nemu orang bukai ke patut enggau iya bebagi.
“Enda patut apai enda udah meri nuan reta enti nuan endang amat anak iya ke tinggal di Panggau Libau. Lalu pia mega nuan, Raja Muda, tentu mega udah diungkupka apai pesaka lebuh iya ninggalka nuan di Mengeri Sedinang Indu. Nya alai, nadai pematut seduai agi deka ngerebut pesaka apai ti endang udah diletak iya ke aku, kelebih agi, apai mati endang ba bilik aku tu,” ku Raja Merom. Mua iya berupai enda lantang.
“Pasal apai ke mati ba bilik nuan, kami tu enda nyangkal, laban iya ga sebilik enggau nuan. Nya mih kebuah aku ngeletak nuan beempuka pintu gemuru mas, laban nya endang lanting apai dibai iya ari bilik lama kitai. Tang pesaka bukai nuan enda tau beempuka, semadi pengasih kami meri, laban kami duai apin bisi ungkup reta tengkira,” pia ku talat Raja Sebaginda Bujang. Runding iya beseling bendar lebuh mansutka jaku ketegal bisi peransang keramat ti diberi Anak Chuik.
Raja Merom senganging madahka diri enggai magi reta tengkira enggau Raja Sebaginda Bujang seduai Raja Muda, laban iya enda bechaya sekali-kali ka seduai nya apin bulih bagi enti seduai endang amat anak Raja Meru baka iya-empu.
“Nya alai, enti penemu nuan udah munyi nya, Raja Merom,” ku Raja Sebaginda Bujang, “enggai-enggai pen belaya ga kitai tiga diri menyadi ka reta tengkira ti apin dibagi nya, ketegal nuan amu lalu enggai magi kami duai. Nya alai, nadai ku enda bechara kitai tiga – kami duai Raja Muda ngelaban nuan. Tang enti kitai tiga bechara, nama kitai tiga ke nyadi anak raja enggai nyadi enda kamah didinga orang kiba kanan. Kati ku enggau ga dih, ga nuan milih jalai chara. Enggai bedua reta nya enggau rurus enggau alus.”
“Bechara, bechara sih, enda mih aku bedua enggau seduai reta tengkira ti endang diaris aku ari apai,” ku Raja Merom. “Nyadi enti kitai tiga bechara, nyadi kuasa aku lah milih hakim ngaduka pechara, laban kitai ga bechara ba mengeri aku.”
“Uuuu, enda sekali-kali aku besetujuka nuan milih hakim pechara, laban enti kitai ngambi sebarang hakim ke agi idup ngatur pechara tu, pemutus enggau atur iya tau bemata, tau besiping. Nya alai, ngena kitai bechara ba mua orang ke udah parai, iya nya ba apai kitai-empu, Raja Meru, ba mekam iya,” ku Raja Sebaginda Bujang sepengudah iya bulih rawang ari Anak Chuik Keramat.
“Oh, balat mapap penemu nuan nya! Kati ku apai tau mendingka pechara kitai bah! Nyanggang iya udah parai. Mina rangkah iya ke agi bisi dalam mekam nya dia. Kati ku rangkah iya tau ngatur pechara kitai bah! Nya penemu lap!” ku Raja Merom merak Raja Sebaginda Bujang. Ati iya nyau semakin berangat.
“Rangkah iya betul agi atur. Enda besiping, laban orang ke udah mati enda nemu ngaga pemula,” ku Raja Sebaginda Bujang nalat.
Kepuas-puas sida bebelitka jaku, Raja Merom pan besetuju ga bechara. Iya mai Sebaginda Bujang seduai Raja Muda bechara ba mekam apai iya, Raja Meru, urung pukul semilan pagi siti ke nangkanka nya.
BETAMPUNG