![](https://utusansarawak.com.my/wp-content/uploads/2020/11/7053240d-50c4-4137-9ed7-296e81afa9eb.jpg)
![](https://www.utusansarawak.com.my/wp-content/uploads/2020/11/7053240d-50c4-4137-9ed7-296e81afa9eb-1024x768.jpg)
Tusun Keempat
UDAH polis ngambi report ari Kantan, sida pan lalu deka mupuk. Tudah Ilan dibaiorang ba katil tanggung nya baka bangkai. Tubuh iya digalika nadai penanggul ba ruang perau. Injin distart lalu sida mupuk. Perau bejalai laju laban ai ampuh kerangan lalu nadai irauka alai tepanggai. Nyau lapu-lapu perau polis ninggalka pengakalan sida di Rian Mipau Umbang mai tudah Ilan ngagai alai iya deka dibai ngagai sepital. Nyau kelama sida nyau nadai dipeda agi udah ditelan penyauh.
Orang di rumah panjai berasai lantang agi; nadai irau, nadai begau agi tang sida berasai sinu ati berundingka utai ti udah nyadi. Sida enda nemu nganggapka utai ti nyadi ba Ilan. Sida semina nemu iya dibai ngagai sepital di Batu Tujuh. Sida besampika iya jampat gerai. Maya nya urung taun 1950 menya, nya alai apin bisi perengka telipon baka kemayahari tu. Ketegal nya, seduai menyadi iya tak lesap nadai ditemu berita.
DITAN DI BILIK LOKAP
Seminggu udah nya, Kantan datai, pulai ke rumah panjai mai berita. Iya becherita madahka seduai iya semalam di pasar Saratok; Ilan di bilik lokap di Balai Polis, iya ba sadau towkay sida di pasar. Hari siti seduai iya dibai mupuk ke Kuching. Ilan enda agi dibius tang meruan digelang jari. Sida ngena kapal perintah benama Punai. Tuan DO udah ngemendarka Tuan Polis ngiring seduai sampai ke ngagai Sepital Sakit Jiwa di Kuching.
Nitihka cherita Kantan, lebuh Ilan datai di sepital, iya dilepaska orang begulai enggau orang ke udah dulu masuk. Sepenyempat iya datai, iya lalu dilekaka orang ba padang alai sida bemain. Dia Ilan lalu dipejamahka seraban bala orang ke sama gila. Amat baka kaban manuk sabung ke minsai siku manuk ke baru datai. Indah enda baka ikan ke berebutka dak bala orang besaupka Ilan. Endang dipeda mata Kantan empu iya dipebukut, dipetendang sereta diterajang bala orang ke dulu masuk. Dia Kantan tekenyit meda Ilan angkat ngelaban. Siku ulih tangkap iya lalu diempas iya sereta diendit iya ba dada. Siku nya tak enda angkat. Lebuh udah dikebegauka orang pemesai ke jaga sida netapka tudah nya udah enda benyawa agi.Tudah iya ke dientak Ilan ti benung kering laban baru datai dia, tak pechuma mih nyadi dengah Ilan.
BULIH DENGAH MUDAH
Cherita pasal Ilan ti untung bulih dengah mudah di sepital orang gila nyadi buah mulut enggau batang kenang sida semenua enggau sida sekaban. Berita lebuh Kantan ke selalu ngabas, madahka iya belinsur gerai lalu nadai dipeda sakit. Udah bekau tiga taun di rumah sakit, iya pulai ke menua laban udah suman.
Datai di menua, iya sinu berundingka utai ti udah nyadi. Indai iya meruan. Anak indu ke ditinnggalka iya lebuh nya nyau tau minching labu; udah nemu nyauk minching genuk. Taja pia, iya tekenyit tang enda ngesal laban bini iya udah dipadahka sida sebilik udah pulai ngagai menua sida empu; enda tantika pemulai iya. Iya enda ngutuk bini iya pulai laban ni jalai iya ulih nganti, tambah mega enda nemu iya gerai tauka enda. Iya sinuati enda betemu enggau Kantan ke udah pindah ke Baram. Menyadi sida siku entah nemu entah enda rita iya ke sakit. Menyadi sida siku ke bebini ba rumah bukai tang di menua semak nya bisi ngabas iya. Busut seduai Birai merap iya enggau titik ai mata ngingatka diri ke naka iya pengasar enggau iya suba. Orang rumah panjai gaga meda iya pulai gerai nyamai. Ilan madah ngagai rumah iya deka ngintu diri laban ti udah liar sereta genggam semengat berubat lalu udah gerai. Iya deka nirika gawai ke tanju iya nya Gawai Sandau Hari. Nyelit dalam teluk ati iya, iya ngintu diri laban ti udah bedengah mudah tauka udah basah jari maya iya di sepital. Kelimpah ari nya, iya berasai gagit ati laban iya diatu tau enggau orang Ngirup Jalung lebuh orang bisi Gawai.
Oleh JANTAN Umbat