![](https://utusansarawak.com.my/wp-content/uploads/2021/02/rumah-panjang.jpg)
![](https://www.utusansarawak.com.my/wp-content/uploads/2021/02/rumah-panjang.jpg)
Tusun Kesatu
JANA duduk ba empara; mata iya enda engkesap merening ngagai munyi gerup utai ke datai ari seradak ulu lebak dia. Iya nyandih ba batang berangan ti alai empara nya digaga lalu kedua-dua piak kaki iya kekitang ba puting gelegar empara ti digaga ari kelalin anak kayu. Senapang patah iya ti udah diisi seterum dikepit iya urung buluh enggau sayuk, lalu pugu senapang nya disandarka iya di atas pah kanan iya. Senapang nya sedia deka dirais sereta ditujuka ngagai jelu ti diipa iya. Baju kemija luya iya bisi berasai basah laban peluh. Dua tiga kali beberapa iku nyamuk rerengung sereta kekabu mansa mua iya ti lalu ditipas iya.
BURUNG BELABUH RACHUH
Hari udah belabuh ka-ka petang di tengah-tengah kampung ti penuh laban kayu ke bebesai taja pan jam ba dekuan kiba iya nunjukka hari baru pukul 4.00 ngalih hari. Burung udah belabuh rachuh laban nya maya sida deka pulai ngagai penepan sida. Ngingit sereta kang kapung bisi didinga datai ari teluk kampung. Deru guntur bisi mega didinga tang ukai urung langit dia.
Ribut kekesut muput mua iya mai bau iya tunga ke belakang iya. Nya manah ku ati iya laban nya dikira iya tunga ngagai ujung jalai ti disidi jelu ti diipa iya. Bau nyamai bunga kayu babas bisi disium iya. Bisi maya iya tak berasai lain asai tang iya ingatka Jaum ke ngipa ba siti endur bukai jauh ari nya tang dikiraka didinga letup senapang.
Munyi gerup utai nya tak majak semak-sesemak. Jana besedia. Senapang dirais lalu pugu senyata nya ditanam iya entap ba engkapan pun berang ari baruh tulang banga iya. Kaki iya ditarit jampat lalu iya bekuda tegap.
Ujung buluh senapang nya diiching iya tunga ngagai munyi ke datai. Tentu nya babi ku ati iya. Iya nganti. Ketap dada iya makin balat lebuh kenaya jelu bisi dipeda iya. Jelu nya nyau nyengala. Endang babi nyau bekeludas. Peda Jana babi nya bekaban-kaban bejalai betunda udi kira-kira 50 ila ari alai iya. Tusah bendar iya milih ni bagi ti deka ditimbak ku ati iya. Kepuas ke ngiching enggau merening, iya milih jelu ke dulu nya laban iya berupai besai agi ari sida bukai. Diiching Jana bejimat-jimat jelu ke pemanah iya pemesai dipeda iya. Tunjuk antu iya gegetar deka ngachitka senapang. Enda nemu kebuah iya tak kesal asai nya.
“Taaap!” ku letup senapang Jana. Nyau begetar bau iya diterajang senapang. Asap ba ujung buluh senapang nyau berasap mansutka bau berechun. Munyi letup senapang nyau bedauh neresa kampung udah nya lesap ari dinga.
ENDA LEBU
Ditampai Jana jelu ti diselinting iya. Peda tak udah melangui tudah jelu nya.
Jana lalu nurun beguai-guai ari empara nuju bangkai jelu nya, pelanda uduk. Babas dia enda repa, nya alai enda lama iya lalu datai. Babi nya dianggarka iya bisi kira-kira 60 kilo. Babi nya endang udah nadai seput agi.
“Ah. Enda lebu kami dua Jaum nurun bejalai. Bisi ga cherita dikena kendua bekelikuh enti kendua kena tan ila,” ku ati Jana. Iya dulu nginsap semak bangkai babi sambil bekiraka jalai iya ngerinan nya kediri. “Eh, kini penunga Jaum tu. Enda ninga letup senapang iya tu?” ku ati iya.
Ada disepu iya buluh senapang. Nyau terit urat ba urung rekung iya lalu kuyu iya ama kembung ama kempis. Bisi berasai bepetir utai dipeda sekejap laban ti ngesuhka seput. Munyi kesuh buluh senapang nya nyau bedauh neresa kampung.
Sekeda jelu enggau burung bekekerus rari. Jana nganti. Diidup iya telipon bansa lama. Nadai line ba urung nya. Nadai jalai ngangau Jaum ngena telipon. Hahh. bisi endaka Jaum ninga kesuh buluh senapang tauka letup senapang. Enti Jaum nadai datai lagi pama iya ngerinan ngut nya kediri ku ati iya.
Betampung …
Oleh JANTAN UMBAT