![](https://utusansarawak.com.my/wp-content/uploads/2021/08/7.KCH-crime-roundup-pic-2PIC.jpg)
![](https://www.utusansarawak.com.my/wp-content/uploads/2021/08/7.KCH-crime-roundup-pic-2PIC-1024x768.jpg)
DEKA ngutuk sapa-sapa nadai ga guna, laban urat pengeran bejudi nitih sekeda utai nyadi maya agi mit tauka udah besai tuai.
Ba tudah pangan peneleba bejudi endang kenyau ari umur bebelas taun, iya nya bejudi ngena duit taja pan pasang main ‘tui’ mina sepuluh sen aja ba rumah panjai kami dalam taun 60-an kelia.
Tang main tui nya entudi ulah bejudi bepasang gelik getah, taja pan gelik getah dibeli ngena duit (30 iti agi baru/40 iti udah lama berega 10 sen). Nya meh pun ulah bejudi nyentukka umur udah tuai taja pan diatu bisi diketuka mimit – main lumur tikit aja enda ulih buai.
Kami ba rumah panjai di Saratok belajar ari orang tuai. Niang aki kami bilik sepiak seiku (aku enggai nyebut nama ditu enggaika bala uchu iya ngerijat gidan) meh nyadi pengulu bala nembiak bejudi, berengkah ari bentaruhka leka jagung lalu udah nya ngena gelik getah. Balat dianu sida niang ini menya laban abis jagung salai ba para ambika benung dichuri ambika entaruh.
GIAN ENTARUH GELIK GETAH
Tang utai ti ngasuh gian nya bemain pey (poker) bentaruhka gelik getah. Nyadi maya nya endang bisi dua buah kedai China bebini Iban ba tebing ai kami nyual gelih getah baru (30 iti berega 10 sen). Tang enti udah dikena bemain, iya nya maya bejudi udah tengkerap gelih getah ulih ga meli 40 iti sepuluh sen. Ulah nya meh ngepunka penggian bejudi ukai ngagai aku seiku aja tang mayuh nembiak bukai kami serumah. Balat dianu orang tuai, lebih sida indai enggau ini laban enda tepulaika diri maya makai enda ngira nya tengah hari tauka malam, maya nadai sekula, maya kemisi. Akai rai enda aku nemu agi peneka sereta pengagit bala nembiak mayuh. Tang nyau udah tuai agi sida nadai enggau main tui; mina tudah pangan aja meh kempang duduk ngelaban bala aya, bala aki bemain tui pasang 10 sen sekali pusin. Bisi maya alah, bisi ga maya menang. Nyadi pemacha enda ibuh nanya dini penulis (urung umur 10 ngagai 12 taun) maya nya bulih belanja. Agi sekula ba primari maya nya.
Dia kitai meda pun siti pengerindu ti nyadi penggian bejudi, enda ngira nama bansa main.
Enda iya ngira nuan main daun, nyabung, main kuluk tauka ‘holo’, lumba kuda, main lumur tikit 4D, main ba Internet tauka di casino enggau semua bansa main bukai iya endang tetap jauh ninggal pengerindu bukai. Nya meh dikumbai gian.
Iya tusah deka diketu, tang lama agi semakin nyadi tauka mau agi iya baka api. Tu tau ngujungka orang ti gian bejudi nya lubah sereta tusah ulih ngesaika peneka enggau penggian iya. Tau dikumbai ulah ti enda ulih ubat lalu ngujungka iya nyadi siti penyakit ti enda ulih gerai.
Bisi kaban aku siku madah, “Nyamai agi ngemaduka diri nginsap tang sigi enda ulih badu meli lumur 4D, tikit Toto enggau semua bansa tikit bukai. Seminggu bisi tiga kali buka, enti nuan meli RM10 sekali ambika banding, ganda enggau tiga RM30 udah nya dalam sebulan nuan nadai kurang ari RM120.00 kena melanja penggian meli tikit.”
“Pengerindu sereta pengandal ati nganti lumur nya dibuka berengkah ari pukul tujuh malam endang asai ti baru deka bejalai ngayap dulu menya nyentuk ngagai maya datai ba peninduk indu lalu deka nemu sekalika indu nya deka nerima penatai nuan tauka enggai. Nya meh gaya pengerindu meli lumur ti ngejungka kitai tau nyadi gian mega laban semampai ngarapka bulih duit besai,” ku siku agi lelaki umur 74 taun ti udah pinchin gawa perintah.
Tu ngena banding mit aja, bisi ga sekeda melanja datai empat lima ratus ringgit tauka lebih dalam sebulan kena ngemuaska penggian meli lumur. Bisi ga orang benasit kena besai tang enda lama duit nya pan abis mega pulai ngagai lumur. Ujung iya, nuan endang enda ulih menang nunda ku ati laban penggian nuan ngujungkan nuan enggai badu. Beduduk ari tu, pengawa bejudi tu endang enda tau punas. Anang nyebut punas, diatu udah bisi bemain judi ngena Internet ngasuh bala sekeda indai enggau apai orang nadai ari limpang makai tauka mandi.
BEJUDI MUAI JAM
Pengawa bejudi tu ukai mina muai tauka masau jam nuan, tang mega ngujungka pengawa bukai nuan enda dikereja tauka ditejuka nuan pia aja.
Pengerindu bejudi endang ulah asal dunya nyadi mensia. Ambika banding, nyabung manuk dalam dunya asal bansa Iban endang bepun ari sida Keling di Panggau Libau kelia. Nitih ensera asal bansa Iaban, keterubah pengawa nyabung tu ditemu dipejalaika, iya nya entara manuk Keling Tanah enggau manuk Keling Langit, entaruh seduai ukai mata duit tang seduai bentaruhka Kumang. Sapa empu manuk menang, nya meh bempu Kumang. Ujung cherita nya, manuk biring Keling Tanah meh menang.
Nitih sagam penemu psikoloji, pengerindu bejudi ti ngujungka iya nyadi siti penggian nya bisi sangkut paut enggau‘ego’ asal dunya nyadi mensia, besangkut paut enggau ‘id’ sereta ‘libido’ kitai mensia. Nunda seiku pakar psikologi tebilang Sigmund Freud iya mega bisi sangkut paut enggau ‘adrenalin of fright, flight and fight’ ke mega dikembuan bala anak lelaki enggau sekeda indu. Nya alai, tegal nya, ukai mina lelaki aja ti ngembuan penggian bejudi tang bala orang indu pan bisi ga gian bejudi. Reti nya judi tu dikerindu semua mensia, enda ngira penempa, agama enggau asal bansa sereta menua. Baka nya mega penggian bejudi ke nyadi siti penggian semua mensia.
“Tau mega kitai ngumbai mensia gagit bejudi laban bisi elemen ‘suspense’, bisi elemen ‘ego’, pasal alah enggau menang, kelebih agi dalam main ‘poker’ sereta enggau sekeda main bukai ke alai mensia nguji ‘power over others’ (iya nya bisi kuasa atas orang bukai) ti besangkut paut mega enggau ‘ego’ menang, ‘ego’ bekuasa, iya elemen pelasar dalam semua pengawa judi,” ku siku kaban penulis Dr. Zulwai Kifli Merawi ke kala nyadi pengelicha mata pelajar psikologi ba palan latih pengajar MPR Rajang di Bintangor sama begulai enggau penulis kelia.
Penemu tu endang sigi amat, laban orang bejudi nya ukai mina deka menang duit pangan – tauka sebarang entaruh bukai – tang endang amat bisi elemen deka nguasa tauka ‘control’ pangan baka dalam main poker, main bridge, main ginrami (chap kut), main chapho tauka chut, main sikipoi, main samchung (Russian poker), baccarat, main three pictures, bandat (black jack), mahjong enggau mayuh main judi bukai nyengkaum nyabung enggau holo. deka nguasa pangan diri.
MAIN KUDA
Pengerindu meda kuda belumba tauka mina ninga jaku padah ari ‘commentator’ iya nya orang ti ngerah madah nusui pejalai enggau pelanda lumba kuda mega udah ngujungka mayuh lelaki enggau indu ti muai jam ba palan lumba kuda di serata menua Malaysia enggau endur bukai di dunya tu.
Ukai mina rindu meda kuda belumba tang mega rindu meratika tui tauka entaruh, laban lumba kuda tu nyelaie ari main bukai. Di Malaysia tu siti tikit entaruh lumba kuda berega RM5. Tang enti kuda pilih nuan nya menang, ‘dividen’ iya tau manggai ngagai beratus. Ambika banding penulis empu kala menang mayuh laban kuda pilih penulis menang lalu dividen iya ‘RM230 win/ RM85 place’. Tu tau dikumbai siti dividen chukup tinggi. Orang teleba main kuda nemu reti pekara tu.
Beduduk ari pengerindu enggau pengandal mensia bejudi ti ngujungka penggian meh dunya tu endang enda punas ulah orang bejudi, enda ngira bansa judi. Nya alai orang gian judi endang bisi ditemu ba serata dunya tu.
Tu meh udah ngujungka mayuh mensia udah pechah ruang bilik tegal laya, tegal laki tauka bini masau jam bejudi lalu nadai hari begulai enggau pangan diri, tegal abis reta tengkira kena bejudi.
Taja pia, kitai nadai ulih nagang pengerindu mensia, nyengkaum pengerindu bejudi ti ngujungka orang siku-siku nyau nyadi gian. Jam ke diatu lalu apin bisi tipang ti meruan kena nangkup sereta muai penggian nya.
Jadika judi siti pengerindang aja lalu anang ngelempai pengidup kitai ba pengerindu nya nyentukka iya ngasuh kitai gian. Ngena jalai tu kitai ulih nyelipak sereta ngelaung jalai nuju penggian.
Oleh TELESA EMPERAN