![](https://utusansarawak.com.my/wp-content/uploads/2022/08/image-8-1024x640.png)
ENDANG amat mayuh cherita pasal jelu, pasal burung enggau utai idup bukai ti ngiri ajar, ngiri lalau enggau penemu ngagai bala kitai mensia, kelebih agi bala nembiak ti benung mansang.
Maya lebuh agi mit suba kami bala nembiak gagit bendar begulu ba ruai ninga orang tuai bensera maya lemai hari. Tu chukup manah kena ngemandakka lemai jeman dulu menya ka tambah mega tau meri ajar ngagai bala peninga mayuh ti mending tusui ensera nya.
Ukai nembiak aja tang bala rayat bukai rumah panjai sigi selalu bedijir ba ruai ninga ensera, tauka beperindang enggau sida lemambang ke duduk ba atas wa ngangau segenteran dua renung sebedau mata ke deka tinduk.
CHUKUP DIKERINDU
Siti ari ensera ke endang balat dikerindu bala nembiak enggai orang besai tuai maya nya, nadai lebih ari ensera Pelanduk seduai Tekura ti semampai ngasuh ketawa lalu bisi mega nambah penemu enggau lalau ngagai bala mayuh, kelebih agi sida nembiak. Tu endang tandu cherita tang bala pemacha mayuh minta penulis nyerita baru.
‘Sambi’ enggau ‘Jui’ tu perembian Pelanduk seduai Tekura. Kekadang bisi ga jelu bukai ngangau seduai ngena nama Sambi mega. Seduai endang selalu besulu, lalu nadai tau jauh ari pangan diri; Jui nya perembian entara seduai iya aja.
Nyadi sekali seduai iya begulai ngiga pemakai. Keleju-leju seduai ke bejalai ngiga pemakai, dia seduai lalu tepedaka Sawa tinduk.
“Apu Jui, peda nuan Sawa benung tinduk,” pia ku Pelanduk madah ngagai Tekura.
“Manah tua ngibun, meda pengelama iya tinduk,” pia ku Pelanduk.
“Barang ku iya meh Jui, ti ibun ku nuan, ibun ga,” pia ku saut Tekura. Seduai lalu dugau-dugau ngemataka Sawa tinduk. Nyau kelama kebangai utai, seduai dia ngemata Sawa tinduk, alai lalu mansa Jugam.
“Eh, nama pengawa seduai dia Sambi,” pia ku tanya Jugam – bisi sekeda menua ngumbai Jugam tu ngena nama Makup.
“Eh, anang inggar, kami duai tu diasuh Raja ngibun sementing (tau mega dikumbai labung) iya, ti ditinggal iya ditu. Raja udah bejalai kin, enggau bala iya,” pia ku Pelanduk.
“Ni sementing Raja ti diwan seduai?” ku Jugam nanya.
“Nyin iya deh Sambi, peda nuan ari tu,” ku Pelanduk.
MALIK NGAGAI SAWA
Jugam lalu malik tunga ngagai Sawa ti nyengkilung tinduk.
“Apu, amat manah sementing Raja nya Sambi, ngenjing belikau-likau, bemau-mau. Aku nguji ngerasuk ngena iya Sambi,” pia ku Jugam.
“Oh, ni tau. Kami duai pan enda diasuh Raja negu. Keba iya ngasuh kami duai ngibun ditu enggaika iya dikachau orang,” ku Plandok.
“Akai dai Sambi, keran amat asai ati tu deka nguji ngena sementing Raja,” ku Jugam.
“Nganti kami duai Sambi tu nanya ngagai Raja dulu. Ti Raja ngasuh, baru nuan ulih tau ngena iya, lalu enti enda, anang nuan negu sementing iya, enggaika kitai dianu Raja,” pia ku Pelanduk.
“Nganti ditu dulu nuan, kami duai Sambi tu nanya ngagai Raja dulu,” ku Pelandok.
“Au, pia meh Sambi. Tanya jampat ngagai Raja, keran amat aku tu deka nguji ngena sementing Raja nya,” pia ku Jugam.
“Ama keduai madah tau ila, baru nuan tau nguji iya, ama keduai Sambi madah anang, anang ga nuan nguji iya enggaika kitai dianu Raja,” pia ku Pelanduk.
Udah nya Pelanduk seduai Tekura lalu nyau ngeluluka diri mupuk beguai-guai mupuk nanya Raja. Iya pan udah nyau jauh, kira agi didinga kangau, Pelanduk lalu ngangau madah, “Tau, Sambi tau ku Raja, kena meh dia”.
Ninga kangau Pelanduk madah tau, Jugam enda chechamang lalu narit Sawa dibelit ambika sementing tauka nyadi labung tang Sawa nya lalu tedani ari ke tinduk sereta lalu melit merekuh Jugam. Nama agi deh, nyau rap-rap nyawa Jugam berekak ngelaban Sawa.
Pelanduk lalu ngangau ari jauh, ninga nyawa Jugam ti nyau rap rap berekak belaban enggau Sawa, “Kena meh Sambi tang anang bangat kelalu udu nuan ngena sementing Raja”. Tudah Jugam dini bisi hari nyaut, nyau deka alit seput diperekuhka Sawa.
Nyau kelama ti bibat bebelat dia, baru Jugam tetemuka pala Sawa, lalu dikekah kunyah iya. Nya baru Sawa lalu parai, tudah Jugam pan nyau deka alit seput, nyau deka luput bekau kena belit Sawa. Nyau udah badu ikak lelak dibai bibat bebelat ngelaban Sawa, Jugam lalu berunding deka nitih Pelanduk seduai Tekura ti udah beduan ngayahka iya.
“Lagi sepi asai seduai,” ku chakap Jugam. “Aku tu ti dikemula seduai madah nya sementing Raja,” pia ku Jugam bejaku dalam ati diri empu. “Lagi seduai ensepi asai, mensa seduai nya,” ku chakap Jugam dalam ati diri empu.
Iya lalu bejalai nitih Pelanduk seduai Tekura. Tudah Tekura tu ukai nya laju, nya alai nyau kelama, nyau didinga munyi nyawa Jugam. Diatu iya nyau bejaku kediri, nyakap seduai nya madah, ila ensepi asai enti betemu baru enggau iya.
“Endai, kati ku aku tu deh Sambi, parai aku tu ila jamah Jugam nya,” pia ku Tekura.
“Ditu meh Sambi,” ku Pelanduk sereta marukka Tekura ngagai baruh batang.
Burit Tekura lalu didejal Pelanduk ngena buah kundung mansau. Udah nya Pelanduk lalu rari belanda takut ditemu Jugam.
NINGA CHAKAP JUGAM
Dinga munyi nyawa Jugam nyau semak sesemak. Lagi seduai ensepi asai, ku iya sepanjai jalai nyakap seduai nya. Sigi amat deka dijamah iya senaka ulih enti seduai nya ditemu iya, pia ku ati Jugam.
Dinga Tekura nyawa Jugam nyau semak. Dia iya lalu ngangau Jugam ngena nyawa rapas-rapas, “Tulung, tulung, kasih ka aku tu. Tulung aku tu,” pia ku Tekura. Burit iya tak tetungging kitau iya katas.
Jugam lalu kia. “Tulung apa, tulung nama, aku tu nyau ka parai diayah seduai,” pia ku Jugam.
“Endai Sambi, dini aku bisi ngayahka nuan, diri empu tu nyau ka parai dtinggang batang tu. Tiga hari tu aku udah ditu, enda ulih pansut, enda ulih engkebut. Ti nuan sinu ka aku, ulih meh aku tu ari baruh batang tu,” pia ku Tekura.
“Aku tu Sambi udah diayahka Pelanduk seduai Tekura, keba aku deka bebalas. Pelanduk deka aku renyuk, Tekura deka aku pangka, awakka seduai sama parai,” pia ku Jugam.
“Eh anang pia Sambi, anang sebarang. Kami Tekura tu mayuh bansa, bisi tekura tambit, tekura pudu, tekura ai, tekura umang, tekura jaung. Nyangka tekura jaung nya ti jai ngayahka orang. Aku tu tekura apa ku nuan. Ti baka aku tu dini bisi hari ngayahka orang, diri empu deh nyau deka parai”. Lalu malik Jugam ngagai burit Tekura, peda iya chechinang deka pansut tai.
“Apu amat meh nya Sambi, kasih amat ga aku meda nuan tinggang batang,” ku Jugam sereta lalu nyeging batang, ngasuh iya bebaring. Udah bebaring batang, nya baru Tekura ulih pansut, lalu nyintakka seput.
“Ti bakatu, idup meh aku tu Sambi, nyin langit, tu tanah,” pia ku Tekura ngeluluka diri gaga ati idup baru.
“Bisi nuan meda orang mansa menua ditu Sambi?” ku Jugam nanya.
“Bisi meh Sambi, patut meh seduai nya tadi enggai ngetu ngagai aku ti minta sah, engka seduai nya meh ke ngayahka nuan. Lebuh Jugam nanya, kini tunga jalai seduai nya, Tekura lalu nunjuk ngagai tunga bukai.
Jugam lalu madah diri mupuk deka nitih seduai nya tadi, laban iya apin tembu ati enti bedau nginsah seduai bebalas. Iya ngelalau Tekura ngasuh bejimat enggaika tinggang batang baru. Tekura ngasuh iya beguai nitihka seduai nya tadi lalu meransang ngasuh iya nginsah seduai nya naka penapat inat. Jugam lalu mupuk nitih nyidi nengah jalai salah ke ditunjuk Tekura.
Ti bakatu, idup meh, pia ku ati Tekura. Enda lama udah nya, peda junuk-junuk Pelanduk datai ngagai Tekura. Iya lalu nyapa, “Kati ku deh Sambi, nadai apa nama nuan?”
“Nadai Sambi, diidupka iya keba aku,” ku Tekura nyaut. Seduai lalu sama rakah-rakah ketawaka diri ti udah beduan Jugam. Nyadi tudah Jugam pan nya mejuh diri bejalai dalam kampung kin.
Iya mengkang kutap-kutap kediri nyakap Pelanduk seduai Tekura ti udah beduan iya madah ular Sawa nya labung Raja.
AJAR ARI ENSERA TU
Anang kelalu beguai deka nguji ngena tauka megai utai manah laban takutka utai nya tau nganu tauka meri penusah ngagai nuan. Jugam tetap enda ulih keduan seduai dua iku nya enti iya meresa enggau manah sengkilung Sawa nya sebedau ngerasukka iya nyadi labung.
Oleh TELESA EMPERAN