![](https://utusansarawak.com.my/wp-content/uploads/2021/01/7.-The_Rolling_Stones_Summerfest_in_Milwaukee_-_2015.jpg)
![](https://www.utusansarawak.com.my/wp-content/uploads/2021/01/7.-The_Rolling_Stones_Summerfest_in_Milwaukee_-_2015.jpg)
PENGERINDU ninga, masang lalu kelebih agi diperindang enggau merindang ngena music udah ditemu ulih ngerapitka kaul mayuh mensia sedunya tu.
Baka lumba enggau main, musik mudah nyadi jematan kena mensia sedunya begusung ngagai dunya pangan diri. Tau dikumbai musik nya meraka dunya nadai entara. Iya ngaul semua mensia enda ngira bansa, menua, chura kulit, adat, penempa, pengaya, penyuntuk sereta semua utai bukai.
Musik tau mai pengelikun, penyerakup enggau pengerindu sereta utai bukai ti manah dalam pengidup semua mensia. Orang ti sama rindu ka musik ti sebaka, sama rindu bemain sereta belagu ka lagu enggau nebah musik ti sebaka endang jampat ulih bekelala sereta bepangan enggau diri sama diri taja pan umur jauh takah enggau pangan tauka chura kulit enda sebaka sereta jaku ti jauh nyelaie ari pangan diri.
Sida tu mudah sereta jampat ngaul pangan nyadi bakih tauka kaban laban ti sebaka pengerindu dalam musik. Enda ngira nuan ari menua tasik – diatu mudah ulih bekelala laban mayuh ruai social di Internet – tauka di Malaysia empu, nuan sigi mudah deka nangkirka pemesai serangkung pukat social diri, ngena pengerindu dalam musik.
Ngena awak tu aku deka nempalai pemesai kuasa musik enggau lagu Raja Rock and Roll Elvis Aaron Presley ti disebut mudah ngena nama Elvis aja.
Penulis milih Elvis laban iya meh penanyi ti pemadu dikerinduka mensia mayuh sedunya tu. Lalu tambah mega Minggu Elvis tauka Elvis Week baru abis di menua Amerika ti berengkah dipejalaika seminggu sebedau pengada Elvis ti manggai 86 taun kena 8 hb Januari tu tadi.
BEKUNSI PENGERINDU
Nitih cherita seiku kaban penulis ti nusui iya bisi ngagai menua Bangkok dalam taun 1977 kelia, iya madah diri mujur betemu enggau Elvis menua Thailand penama Elvisoot Thungarat lebuh iya bisi ngetu ngagai Kelab Elvis Menua Thailand ba indu menggeri sida. Amat meh Elvisoot enda tentu nemu jaku English tang seduai sama ulih bekunsi pengerindu ninga lagu Elvis ti maya nya mina dalam tep kaset aja. Ku iya seduai iya uchak nya ulih ga bejaku mimit ngena English mudah. Elvisoot pan bisi meri iya siti kaset iya empu mai lagu Elvis. Manah ku iya taja pan sekeda sebut bisi kakul mimit.
Maya nya baru dua bulan udah ninggalka dunya injau kitai tu mansang ngagai menua Batang Mandai. Nitihka jaku tundi sida Girl Missi, Bunyau enggau Mujap ba WaiFM, maya nya Elvis baru check-in ba Mandai Inn. Taja ari menua bukai sereta enda kala betemu seduai pan mudah bekelala. Nya meh pengelebih musik enggau lagu Elvis.
Cherita pasal pemesai kuasa musik Elvis tu meh siti ari legasi pemadu besai ba dunya. Iya ukai mina naka musik enggau lagu aja, tang tau meh iya dikumbai siti lanting pesaka dunya ti dikunsi bejuta-juta mensia, ukai mina di menua asal Elvis, iya nya di Amerika Sarikat tang di serata dunya, nyengkaum ba teluk kampung Pulau Borneo kitai tu. Bala sida ibu, sida aya di rumah panjai enda ngelala sapa Elvis tang udah sida meda siku dua penunda Elvis belagu merindang sida nya baru sida nemu sapa iya. Sida mega lalu rindu meda ngepan orang ti belagu nunda Elvis sereta lalu ngaul iya nyadi pangan sida. Tu meh kuasa musik enggau lagu Elvis.
Di menua Thailand, Pilipin (the Philippines), Jipun enggau Korea Selatan endang mayuh penunda Elvis tauka Elvis Tribute Artistes (ETA) nyengkaum sida ti beridup belagu lagu Elvis ba kelab malam, ba endur orang makai tauka ba sebarang alai endur bukai. Nya alai enti maya hari ngintu pengada Elvis kena 8 haribulan Januari enggau hari ngingat pemati iya kena 16 haribulan Ogos ninting taun, dia kitai bisi meda mayuh bala mensia, indu lelaki enggau anak mit ngena ngepan Elvis. Tu meh siti legasi Elvis ti parai kena 16 haribulan Ogos, 1977 lebuh umur iya baru manggai 42 taun.
DUA IKU BESAPIT
Elvis ada kena 8 haribulan Januari 1935 di Tupelo, Mississippi, Amerika Sarikat tumu pagi ba rumah bepangking dua iti aja. Indai Elvis, Gladys Presley ngadaka anak lelaki dua iku besapit. Terubah iya ngadaka Jesse Garon tang tudah tu ada agu, iya nya udah parai dalam perut din. Elvis ti ada nangkanka nya idup lalu nyadi anak tunggal Gladys seduai laki iya Vernon Presley.
Terubah Elvis belagu ba bala mayuh nya maya umur iya baru 10 taun. Iya bediri ba kerusi awakka peninggi iya mudah ngena microphone. Lagu ‘Old Shep’ iya mina ngujungka iya bulih lumur lima sereta bulih prais nepan mayuh bengkah utai ba funfair nya ungkus $5 aja.
Nyadi lebuh umur iya manggai 12 taun, Elvis keran bendar ka siti ensikal tang apai enggau indai iya enda tebelika ensikal nya ti ngujungka seduai mina ulih meli siti gitar rega $12.95 ka pemeri hari pengada iya. Kena 6 haribulan Sebelas taun 1948 Elvis nebah gitar iya mai lagu “Leaf on a Tree” ka bala sida sekelas ba Milam Junior High di Tupelo ungkup kena beserara enggau sida. Kebuah pia, laban Elvis enggau sida sebilik udah tu lalu pindah ngagai Memphis, Tennessee laban deka ngiga pengidup ti manah agi.
Semua penusah enggau penyuntuk sida sebilik nyadi sejarah aja udah bekau Elvis bulih kontrak belagu ba mayuh kompeni ka tambah mega kontrak ngaga wayang enggau MGM. Udah ensepi pengidup nyamai agi iya lalu nirika ruang bilik jadi enggau Priscilla Beaulieu kena 1 haribulan Mei, 1967 di Las Vegas.
Graceland nyadi ka rumah sida Elvis sebilik taja pan indai iya enda lama diau dia laban parai dalam taun 1958. Ba endur dikumbai Meditation Garden, dia meh alai kubur tauka sempar Elvis empu, apai, indai enggau ini iya. Bisi mega batu mit siti kena ngingatka menyadi sapit iya Garon Jesse ti ada agu. Anak Elvis Lisa Marie ti ada kena 1 haribulan Dua taun 1968 nyual 85 peratus Graceland nya dalam taun 2005 ti diatu nyadi rumah muzium lalu dibuka ngagai mensia mayuh kena 7 haribulan Jun, 1982.
Diatu bisi 600,000 iku temuai ngagai Graceland genap taun.
Nyadi bala kitai di menua Sarawak tu ti nyadi ETA mina kaban aku Ges ak Barundang @ Elges Presley ti udah ampit enggau orang nyenguk sereta lalu bemalam ba Heartbreak Hotel dalam kandang Graceland dalam taun 2004 suba.
MENGKANG REGAS MERINDANG
Di menua Bumi Kenyalang tu mayuh ga ETA ti mengkang regas merindang taja pan tiga iku bala kitai menua tu udah begulai enggau Elvis empu di menua Serega din. Sida tiga tu iya nya niang Reynolds Gregory (Elrey) niang Alex Ting (El Alex) ari Miri enggau niang John Sia ti ngena nama John Siaz de King ari Sibu. Bala ti agi mengkang regas merindang nyengkaum Wilfred Vincent Ragam (Elvince) ti dua kali bulih gelar Elvis Presley Sarawak (1964 & 1965), Eskandar Eyaw @ Elkanda (Elvis Presley Sarawak 1966), Ges ak Barundang @ Elges Presley (Elvis Kuching 2002), TS Valentine @ Elval (Elvis Borneo 2000, Mr. Curled Lips of Penang 1978), Azmi Jahidi @ Elaz (Elvis SEDC), Christy Duin Tanggi @ Elchris (Simunjan Elvis), Sebastian Elbongo Bong (Elvis Miri) enggau Adrian David Junior @ Eladrian (Elvis Bau). Ka tambah tu agi ga bisi siku dua bala bukai ti nemu belagu Elvis tang jarang enggau merindang ba bala maya mayuh baka Alex Ling, Big Al enggau Lord Ed.
Laban ti sama rindu ka Elvis, nya alai bala raban ETA di Sarawak mega semampai bisi bekunsi pengerindu merindang enggau bala di Malaya sereta mega di Sabah tajapan di Sabah mina Chris Gomez (Elvis Sabah) ti regas. Sida ari Semenanjung ti kala begulai merindang enggau bala di Sarawak nya baka Eddie Francis (Elvis Malaya 1959, Elvis Malaysia 1976); Frankie Fong (KL Elvis), Paul Lee (Elvis Penang), Sunny Tai @ Elsunny (Selangor Elvis) enggau Elvis Jo.
Ketegal Elvis mega meh bisi seiku kaban penulis ditu bulih pangan di dunya ribai din baka enggau Mark Anthony ari Amerika Sarikat (US), El Gamble – ari Australia dikumbai sida Oz’s voice of the King, Max Pelliciano, Johnny Earle (US), Greg Miller (US), Billy Lambert (US), Elvis indu She is the King Jacqueline Feilich ari Las Vegas, US.
Nyadi kaul mensia serata dunya ngena musik ukai mina ba musik enggau lagu Elvis aja. Kebuah pia, laban bisi bejuta-juta mega mensia sedunya bekelala sereta bekaul enggau pangan diri ngena musik sida The Beatles, The Rolling Stones, Sir Cliff Richard, Sir David Dwight @ Elton John, Sir Tom Jones, Engelbert Humperdinck, Michael Jackson, Jimi Hendrix, Bob Marley, Celline Dion, Whitney Huston, Michael Learns to Rock (MLTR), Bee Gees, Hollies, Bad Company, Led Zeppelin, Grand Funk Rail Road, Black Sabbath, Scorpion enggau mayuh agi raban musik tauka penanyi bukai.
ELVIS PRESLEY FAN CLUB SARAWAK
Diatu di Kuching ditu bala ETA enggau sekeda peminat Elvis udah mujur numbuhka sereta ngerejista kelab ti dikumbai Elvis Presley Fan Club Sarawak (EPFCS). Tuju kelab tu ngena ngempung semua orang ti rinduka lagu enggau musik Elvis di Sarawak ditu. Kelab tu betuaika Elges Presley lalu penyanding penemu iya Tan Sri Dato Sri William Mawan Ikom ti mengkang nyadi Kaban Kunsil Nengeri Pakan. Sebedau tu iya nyadi Menteri Kanan sereta Menteri Pemansang Raban Bansa menua Sarawak enggau MP Sarataok. EPFCS nyadi siti perabung kena ngempung semua bala peminat enggau penunda Elvis.
Oleh TELESA EMPERAN