![](https://utusansarawak.com.my/wp-content/uploads/2020/08/Harden-Radau1.jpg)
![](https://www.utusansarawak.com.my/wp-content/uploads/2020/08/Harden-Radau1-1024x768.jpg)
SRI AMAN: Momentum pemansang positif ke dikemujurka perintah dipegai Gabungan Parti Sarawak (GPS) ba nengeri tu ngasuh parti penyakal enggau naka ulih mujuk rayat ngambika nyukung sida iya.
Penulung Menteri Pengelantang Komuniti Datuk Francis Harden Hollis madahka, pekara ke bisi dipeda lebuh penyakal nyau majak mutar sereta melitka fakta dikena ngurangka sukung rayat ngagai Perintah Sarawak ke dipegai GPS.
“Kunsil Nengeri (DUN) Simanggang mega enda tinggal ari dikachau bala penyakal sebedau tu ke ngumbai nadai pemansang ba kandang Batu Lintang, Undop. .
“Nemuka enda sida iya senentang pengawa ngemujurka projek bekal ai menua pesisir, ngaga jalai kampung, jematan konkrit, bekal eletrik, balai mayuh guna enggau iya ke bukai ba Batu Lintang, Undop?” ku iya.
Lebuh bejaku maya Sesyen Randau Adat Iban 1993 ba Rumah Sigan Anggeh, Radau, Ulu Paku iya madahka, semina orang ke buta mata enggau ati aja enda nemu senentang projek pemansang ke bisi ba kandang nya nyentukka sehari tu.
Ku iya, projek fizikal ke dikemujurka ba Batu Lintang, Undop meri empas besai laban bisi mayuh bengkah jalai raya enggau jematan ulih ditengah rayat dikena ngelawa kandang tanah baru ke bedau dipungkar.
Iya mega madahka, projek fizikal nya udah mayuh amat muka peluang ngagai rayat nyadi entrepreneur betanam betupi sereta ngemansangka tanah diri empu ngena mayuh bengkah pengawa betanam betupi chara moden baka ke diatu.
“Enti tanah nya dikemansangka ngena chara nengkeman, rayat ke diau ba kandang nya ulih nyadi entrepreneur betanam betupi ke ulih ngasuh sida iya pansut ari kena tanchang penyeranta jemah ila.
“Nya kebuah aku ngarapka rayat DUN Simanggang lebih agi ba Batu Lintang, Undop enda ulih kena tipu ngena jaku asut penyakal senentang pekara nya ke tau meri pengerugi ngagai sida iya jemah ila,” ku iya.
Dulu ari nya bisi 23 iku Tuai Mensia Mayuh enggau Tuai Raban Bansa (KMKK) ari sitak DUN Simanggang biisi datai ngagai Rumah Radau sama bela enggau nyereta Program Sesyen Randau Adat Iban 1993.
Tuju program ke diatur Gerempung Tuai Raban Bansa Iban (PKMI) Pelilih Sri Aman nya dikena nyerungkai mayuh bengkah seksyen bekaul enggau pengawa sereta tanggungjawap KMKK nitihka undang-undang baka ke bisi disebut dalam Adat Iban 1993.
Nya program keterubah diatur PKMI Pelilih Sri Aman ke alai chairman gerempung nya Temenggong Dato Samuel Lawen nerangka mayuh bengkah seksyen dalam bup Adat Iban 1993.
Oleh Valentine Ngumbang