BINTULU: Penyilap dalam milih perintah deka mai pengerugi besai ngagai rayat.
Pengempu penuduk Sitak Kunsil Negeri (DUN) Kakus, Datuk John Sikie madahka, iya terang mandangka peranak enggai enda pan nanggung pengerugi pengudah pekara ke nyadi dalam Pengawa Bepilih Besai ke-14 (PRU-14).
“Anang salah pilih perintah baka ba PRU-14 lepas ke ngujung kitai rugi lalu patut belajar ari penyilap ke udah.
“Ketegal salah pilih pengari Parlimen di sitak tu (Selangau) ke enda sama enggau perintah ke megai diatu, kitai rugi ari sukut agih sekurang-kurang nya 60 juta mungkur projek baka Projek Mit Luar Bandar (MRP) enggau ke buka , ari Kaban Parlimen.
Iya mansutka pekara tu ba program Kimpin Komponen Injin Gabungan Parti Sarawak (GPS) Kakus di sebuah rumah panjai di DUN nya bedau lama ke udah.
Indah ku iya, maya Pakatan Harapan (PH) nyadi perintah ungkup timpuh 22 bulan, pan mengkang nadai projek dipejalaika maya nya.
“Diatu pan kitai nemu iya (Baru Bian) ke alai iya ukai orang sitak ditu.
“Tu ajar ngagai kitai ngambika kitai enda milih pengari parti ke salah,” ku iya.
Ba Pengawa Bepilih Besai Negeri ke-12 sekali tu, Sikie ngarika Gabungan Parti Sarawak (GPS) besatup enggau chalun Parti Keadilan Rakyat (PKR), Joshua Jabeng; Parti Bumi Kenyalang (PBK), Peter Kelanang Diung; Parti Sarawak Bersatu (PSB), Peter Tuan enggau dua chalun ngatika diri, Ugik Selipeh enggau Tiun Kanun.