![](https://utusansarawak.com.my/wp-content/uploads/2022/10/6.-JELU-PADI-BARU-1024x576.jpg)
JELU Padi Baru bebendar kimpinka Rasung nyadi Tuai aum.
JELU MIRAH ENGGAU JELU PADI BARU
KITAI nikal mimit sebedau nampung cherita. Tu belabuh ari Jelu Mirah ti bejaku enggau Jelu Padi Baru.
Ku Jelu Mirah, “Nuan ti betanyaka runding lalu mai besukungka penemu ke deka betuaika Rasung nya nadai salah punggal. Semua utai ti ku nuan nya tadi, pasal gamal iya ke sigat, iya ga besai, tubuh tegap. Nya enda bula, kitai ga meda jamah iya kin-kitu bisi buah pengerindang ati. Pengering iya endang bisi ngipakka pemesai gamal. Enti gamal ngemesai nya, agi ga bela pengering enggau kitai ti mit tu, nadai reti nyadi Tuai, tau enda ibuh kering tulang. Gamal enda milih penyigat. Tubuh enda milih pemesai.”
Lama Jelu Padi Baru enda bemunyi. Udah nya baru iya nyaut. “Enti enggai enda milih orang ke chukup ngembuan semua utai ke ku nuan nya tadi, punggal, aum kitai tu enda nyadi. Nadai endur kitai tulihka Tuai ke bansa nya. Kera Gitang nya pen nadai meh ngembuan semua utai ke disebut nuan nya tadi,” pia ku Jelu Padi baru.
“Enti kitai enda tulihka orang ke ngembuan penau enggau pemanah ulah munyi ku aku nya tadi, manah agi kitai enda betuai. Reti Tuai nya endur kitai ngadapka semua penyuntuk enggau penusah, alu endur betanyaka semua utai ti patut ditanyaka ngagai sida ke Tuai. Enti iya tak nadai penemu, kati ku iya tau nuduhka runding ngagai kitai. Enti bala nembiak charut tauka beserekang penemu enggau pangan ketegal Tuai enda nemu mutarka runding nembiak, nya pulaika pengerusak rayat, lalu pulaika penyai nama menua kitai,” ku Jelu Mirah.
Lama endar seduai betalatka jaku nya, ati Jelu Padi Baru nyau mansang angat ninga jaku Jelu Mirah tak ngelipak bendar ari penemu iya. Udah nya baru iya bejaku baru.
“Enti nuan enda enggau ngundi, nadai Tuai lalu nadi pengari meh nuan dalam pulau kitai tu,” ku iya nganu Jelu Mirah.
Taja Jelu Padi Baru ke mansutka jaku nya enggau ati ti ringat bendar, enggau jaku ti kasar, tang Jelu Mirah nyaut iya enggau jaku ke lembut, tang nebak tungkul ati.
Ku Jelu Mirah nyaut timbal jaku nya: “Orang ke nyadi pengari nya ukai semina ngarika orang ke ngundi iya, tang ngarika sitak bagi menua ke alai sida bediri minta pilih. Sebarang menang dalam sitak nya, nya meh ngarika semua orang dalam bagi menua nya, baikka orang nya ngundi iya tauka enda.”
BESEREKANG PENEMU
Kebendar iya jaku Jelu Mirah nya ngasuh ati Jelu Padi Baru pedis agi. Enda tentu tantika jaku Jelu Mirah nya abis, iya lalu nyaut.
“Ku penemu aku, enti orang enda ngundi, nadai pengari meh nya, laban iya enda milih pengari diri. Orang ke menang ari pilih orang bukai, ni jalai iya ngumbai nya pengari iya,” pia ku Jelu Padi Baru nimbal jaku siku nya. Nyau mirah leka mata iya empa pemedis ati.
Jelu Mirah mansang semak agi ngagai tunga iya lalu bejaku. “Lapa mata nuan nyau mirah punggal? Kada enda kena pedis mata nuan tu? Jampat endar penyakit pedis mata ngerampit ngagai orang ke mit,” bakanya ku jaku Jelu Mirah nyaut iya.
“Anang ngelimpangka jaku. Ukai mata nya utai ti dikejakuka kitai. Pengari ke diperundingka tu,” ku Jelu Padi Baru bejaku ngeransi.
“Nemu meh aku pasal kitai ke ngiga pengari. Tang nadai ngasuh tak bebelitka penemu ga nya, laban sebarang orang ti kena pilih nya meh nyadi pengari kitai. Enti sekiraka aya kitai Kera Gitang nya kena pilih, iya ukai semina nyadika pengari raban sida ke bansa Kera aja, tang nyadika pengari semua kitai ke dalam kandang menua tu, baikka orang nya ngundi iya tauka enda. Pasal orang ke kin-kitu madahka diri ngundi orang ke menang nya, penemu nya mar dikarapka kitai laban genap iku orang ke ngundi nya sama nyunting undi kediri empu.
Jelu Padi Baru lalu bediri nyaut iya. “Anang nuan munyi nya. Aku tu puas meda orang menua bukai bepilih. Nadai lurus pengawa bepilih tu punggal. Macham-macham jalai ngakal. Duit enda tau mimit. Penemu enda tau suntuk. Jaku enda tau kurang,” ku Jelu Padi Baru ngenang diri ke selalu meda orang bepilih di menua bukai lebuh ke bejalai ngagai menua orang.
Ninga utai bangat ngemayuh nya enda tau dikenadai, Jelu Mirah pan lalu majak nanya. “Nama kebuah ngemayuh nya utai dipeguna lebuh bepilih deh punggal?” tanya Jelu Mirah.
CHALUN KE PATUT DIPILIH
“Enti enda bakanya, kitai kelalu nadai seregah peda orang. Jalai kedekut enda tau dibantaika lebuh kitai ngulihka ati orang. Nadai orang deka ngundi kitai, enti kitai bangat enda tebelika orang sepuchung ‘chap langkau’. Jaku baka nya ga, mimit utai ke bendar, angin enda tau nadai. Semaya tu semaya nya. Macham utai dipadahka deka digaga enti kitai menang. Nyadi orang ke ninga meseti tekuing ati ninga penemu nya. Lembau pan ati sida, deka ga ngundi ninga jaku kitai chukup ngena,” baka nya ku Jelu Padi Baru nyaut Jelu Mirah.
Seduai lalu majak betimbal saut. Ati sama mansang angat seangat. Jaku pan makin lama, makin inggar. Jelu Mirah bejaku baru.
Ku iya: “Enti munyi penemu orang ke ditusui nuan nya punggal, mayuh endar meh orang ke bediri nya tak menang laban angin enggau chap langkau. Nadai reti utai ke bendar enggau penemu ke lurus kena kebuka angin nya, enti nya utai ke tau ngasuh menang munyi ku penemu nuan nya.”
“Ukai ga semina nya utai ke tau ngasuh menang. Mayuh utai bukai ke enda taju dikenadai nambah nya. Munyi ku aku tadi, duit enda tau kurang, laban nya endang pun utai dipeguna lebuh orang bepilih ngiga pengari ke ngarika rayat. Aku, laban ke lama sebelah menua orang kenyau ari agi bujang biak menya, nya alai suah bendar meda gaya orang ke bepilih. Mayuh bebunuh orang ketegal ngiga jalai diri menang. Orang ti kimpin suah belaya nyentukka berekak ketegal enggai alah jaku laban pangan,” ku Jelu Padi Baru nyaut.
Jelu Mirah nakin ngansak semak agi ninga Jelu Pai Baru madahka orang bepilih nya nyentukka nyau bebunuh ketegal enggai alah.
Iya pan nyaut. “Nadai reri bendar berantuka nyawa ketegal ke deka ngarika rayat. Ukai nya nyamai ngereja pengawa ngarika mensia mayuh. Bini/anak pedis nupi ti asai diri tu. Enti semina mulut aja ke besemaya, tang lebuh udah menang nadai ibuhka orang ti udah ngundi, nya ukai deka ngarika rayat ga nama. Aku enti orang ke minta pilih tu ila mai runding ti bansa nya, endang enda ngelengka undi ngagai orang ke bakanya. Isa aku enda ngundi,” ku Jelu Mirah nibar jaku.
“Enda tau bakanya penemu punggal. Enggai nyadi kitai nadai pengari, nadai ngenataika serebana kitai ngagai orang ke megai perintah,” ku Jelu Padi Baru.
Kelama seduai ke besaut-saut betimbal jaku, dia indai tuai Kera siku ke sama enggau orang begau deka mendingka aum besai sida nya mansa Jelu Mirah seduai Jelu Padi Baru ke berandau dia. Meda seduai nya rapat gamal penuduk ari nya indai tuai Kera nya lalu nanya seduai.
“Nama utai dikerandauka seduai lama endar udah peda aku sepagi pagi tu?” pia ku indai Kera.
Saut seduai deka ditampung dudi ila.
Oleh TELESA EMPERAN