![](https://utusansarawak.com.my/wp-content/uploads/2020/09/Pic4-gambar-lead.jpg)
![](https://www.utusansarawak.com.my/wp-content/uploads/2020/09/Pic4-gambar-lead.jpg)
Tusun Ke-55
BA tusun ti dulu ari tu karang tu semina ngelansa aja pasal adat jadi mali nitihka atur agama Adat Iban. Hari tu karang tu dikerembaika dalam agi pasal ajar Bunsu Petara Sengalang ba senentang adat jadi mali: sebedau nya uji belematika tibak cherita tu: “Maya penemuai Sera Gunting ngagai rumah panjai aki iya Sengalang Burong ti kedua nya, iya diau sebilik enggau aki seduai ibu iya Endu Dara Chempaka Tempurong Alang; iya nya menyadi bunsu indai iya Dara Tinchin Temaga. Sera Gunting seduai ibu iya nya endang serambau; nya alai jampat amai seduai teleba sereta begulai bebakih enggau pangan diri. Kelimpah ti diau sebilik baka nya seduai mega nyau enggai jauh ari pangan diri; main begulai, makai seretai begulai, gawa dini-dini endur pan begulai. Nyau kelama-lama ti diau begulai baka nya, ujung-ujung seduai nyau belabuh rindu sereta sayauka pangan diri; besulu, beambai lalai mih seduai nya.
JADI MALI
Meda seduai nya begulai kin kia nyau baka diri melaki bini, Sengalang Burong pan bejaku. “Sera Gunting, nuan uchu aku. Endu Dara Chempaka Tempurong Alang, nuan anak pengkuan aku. Endu nya ibu nuan, Sera Gunting, lalu Sera Gunting nya anak menyadi nuan, Endu. Seduai enda patut begulai enggai jauh ari pangan diri; nyau baka diri melaki bini baka tu. Mali seduai ngaga ulah baka tu.”
Kira-kira sebulan udah nya Endu Dara Chempaka Tempurong Alang pan temu sida sebilik betubuh bisi; ngandung. Begau sida sebilik, sida serumah nya. Sengalang Burong pan ngangauka sida serumah nya baum.
“Endu Dara Chempaka Tempurong Alang tu betubuh bisi sebulan lalu iya mega udah ngaku ba mua aku, lalu ngambu uchu aku, Sera Gunting ti beleman enggau iya ngelama tu,” pia ku Sengalang Burong ngepunka aum. “Ulah seduai tu besai amai pemali lalu ba pemali bansa kitai tu dikumbai Pemali Ngudi Menua. Nya alai aku deka ninga penemu ari kita bukai baka ni chara kitai ngukum seduai tu.”
“Ngelama tu nuan ti ngatur penyalah ti baka tu. Nya alai ni ku nuan mih ngatur penyalah seduai tu, tuai. Kami bukai nadai mantah.” Semua sida serumah ti datai ba aum nya nyebut munyi nya magang.
“Enti pia, nitihka adat pemali bansa kitai kedua-dua seduai tu patut diukum bunuh ngena chara pantang enggau aur,” ku timbal Sengalang Burong.
PEMALI NGUDI MENUA
Tang ku kaban menantu Sengalang Burong. “Nya amat aya, Sera Gunting endang amat uchu nuan. Iya ke diau ba nuan ditu semina nemuai aja. Nya alai enti iya dibunuh, nadai mai berita pulai ke menua iya empu. Kelimpah ari nya, enti iya dibunuh kitai ditu, apai indai iya din enda nemu tunga iya. Kitai enda patut mantang seduai iya ngena aur, tang seduai enda tau enda diukum ngena adat pemali bukai, barang ku dek empu empu mih, Tuai.”
Nya alai ninga runding kaban menantu iya munyi nya, Sengalang Burung pan bejaku baru. “Enti munyi nya penemu kita, bunuhka babi lapan iku ke ganti darah seduai, nyabur lapan bilah ke tungkat dunya ambika enda berenyang laban kudi menua. Kena nasih menua enggi lelaki sigi tajau rusa, enggi indu sigi tajau alas ngerang, tang anak seduai enda tau enda dibunoh, enggaika ngachau menua.”
Udah nya Sengalang Burong nangkan uchu iya Sera Gunting ngingatka adat kena ngaduka menua sida din ngelanggar adat jadi mali. Baka tu ku adat ti diajar Bunsu Petara Sengalang Burung.
(1) Enti beleman / butang enggau anak (ukai jadi), kena pantang ngena aur juring.
(2) Enti jadi melaki bini enggau entua, indai bini tauka apai laki, kena pantang ngena aur juring.
(3) Enti beleman / butang enggau anak kandung tauka anak iru, tauka anak tiri, enti udah nyadi anak kitai, kena pantang ngena aur juring.
(4) Enti beleman / butang enggau entua, menyadi indai bini tauka apai laki kitai; lelaki kena ukum babi siku, sangkar babi sembilan, enggi indu babi siku, sangkar babi, tujuh igi jabir; udah nya seduai tau jadi melaki bini; enti semua ukum pemali udah diisi.
(5) Enti serak satu enggau serak dua, babi siku ari lelaki, benda sembilan igi jabir; enggi indu babi siku benda tujoh igi jabir. Seduai tau jadi. Babi bunuh enggau nyabur.
(6) Nyadi enti serak dua enggau serak tiga ari lelaki babi siku benda sigi alas ngerang; enggi indu babi siku, benda sigi panding. Babi patut dibunuh enggau nyabur ti dikena ngisi ukum nya tadi.
(7) Enti serak tiga enggau serak empat, lelaki babi siku, benda sigi panding, tu ke benama “bekalih” di darat. Babi patut dibunuh enggau duku ti bebutuhkundingka beliung.
BERAUH NGUMBANG
Serak ti lebih ari tu semina agi bisi adat kena ngeringka semengat. Adat tu dikena tujuh serak. Nya alai datai ba tuboh Beti “Berauh Ngumbang” orang ti beleman lalu deka jadi melaki bini baka Abang seduai Dayang Tali Bunga. Utai ke bendar nya, Tali Bunga nya anak petunggal Abang. Seduai tu patut disapat, tang enda tisika adat pemali. Nya alai seduai deka diukum beti pantang ngena aur juring. Kejang deka mantang, tedingaka jaku orang nyapa: “ Beti…! Enti baka nya jalai dek ngukum mensia ti jadi mali, abis semua mensia mati.”
“Kati ku adat bukai, dih?” pia ku Beti nimbal jaku orang nya.
“Kena adat ukum; babi dua iku bunuh kita; siku bunuh di ai kena nasih ai, siku buhuh di pantai kena nasih tanah. Nyadi benda enggi lelaki sembilan igi jabir, enggi indu tujuh igi jabir, laban Abang jadi enggau anak petunggal iya empu ke baru sekali petunggal enggau iya. Berindik ari ari ajar Bunsu Petara nya mih, nitihka agama Adat Iban kitai Iban nadai agi ukum bunuh pantang ngena aur juring, enti beleman / jadi melaki bini salah serak tauka mali nitihka tusut.
DILANCHAM ENGGAU BULUH
Ukum pantang ngena aur juring tauka buluh ti dilancham enda lama udah enda diasuh Bunsu Petara / Antu, laban ukum nya kelalu resa sereta kasar. Enti orang beleman / jadi mali maya hari diatu, sida nya patut didawa ngagai perintah lalu diukum nitihka agama Adat Iban ti agi diibun Opis Majlis Adat Istiadat Sarawak.
Maya hari diatu, nitihka agama Adat Iban, orang ti patut ngeletak ukum jadi mali iya nya; Tuai Iban ari opis Majlis Adat Istiadat menua Sarawak. Adat ukum tu patut disebakaka – digaga standard (sebaka) di semua menua Sarawak; laban kitai Iban “Ibanic Group” endang datai ari peturun, Bunsu Petara-Mensia ti sama sebedau bepechah lalu diau mendam di serata menua Sarawak. Enti adat ukum enda chukup atur, enda chukup penyampau, nitihka adat ti diletak Bunsu Petara, penyalah nya ukai semina deka nyadi ba dua iku diri melaki bini tauka orang ti beleman tadi, tang di serata menua ti endur seduai nya diau.
Nya alai, Tuai-Tuai Iban baka Penghulu, Tuai Rumah mega patut baum bepelasarka adat ari Opis Majlis Adat Istiadat Sarawak. Taja pia utai tu bisi lebas, putarka penanggul kitai Iban ke jadi melaki bini ti salah serak, ti agi megai pengarap / agama Adat Iban aja. Bansa Iban ti udah megai agama Kristian, Islam tauka agama bukai enda ibuh disengkaum laban sida bisi adat diri empu nitihka atur gerija / agama diri empu. Nitihka penerening ti dipeda kitai sebelah mayuh macham media, atur / adat ti diguna bansa Iban ba sesebengkah menua / ai sungai endang lama udah bebida. Nama kebuah? Nitihka pansik litericha, adat / atur ti bebida baka nya mudah nyadi ukai tegal ari peturun akai ini tauka menua ti bebida, tang mih tegal salah tampung enggau ubah sida ke tuai-tuai, lebih agi sida Manang tauka Lemambang. Tambah mega adat / atur nya nadai kala ditulis dalam bup (jeman nya nadai Iban ulih nulis tauka macha kelimpah ari papan turai tauka tulis Dunging).
(Betampung ba Tusun Ke-56)
Nya mih atur / adat jadi mali nitihka pengarap / agama Adat Iban. Terima kasih ke gambar ti dikirumka kita ngagai aku ke guna dalam Sada Sarawak tu. Engka nyema bala pemacha bisi utai tanya, tujuka ngagai whatsApp tu: 013 8325146.