![](https://utusansarawak.com.my/wp-content/uploads/2020/07/Pic4-1.jpg)
![](http://utusansarawak.com.my/wp-content/uploads/2020/07/Pic4-1.jpg)
Tusun Ke-48
KELING bisi menyadi – Endu Dara Kelinah ti selalu disebut orang Indai Abang ngembuan kuasa ajih ngidupka mensia ti luput, balat bakal tauka mati. Sekeda bujang berani Iban ti kala diidupka Kelinah iya nya: Linggir “Mali Lebu” lebuh ti luput ditimbak ngena bedil sida sedadu Raja Brooke di Nanga Maludam. Temenggong Tami “Rentap” ti mati belah wi maya ti besaruk rejang sangkuh enggau Pengiran Kesuma di Batang Tawang, Kalimantan Barat, Indonesia mega kala diidupka Indai Abang.
Menyadi Keling ti bukai iya nya: Kesatu, Endu Rikuk Papan Pelangka – jadi enggau Tutong. Kedua , Endu Sepantang Mayang Mara. Keling mega bisi menyadi lelaki ti mati lulus ti benama Kemping Padi ti bensumbar Keling Sebayan, Ampa Jawa Setangga Tali, Bujang Sempiang Padi, Ampang Jawa, Empiang Aling, Raung Nirau, Selanggai Kempat Tiang. Lebuh ti mansutka diri ke dunya mensia iya suah tama / ngerasuk tubuh ular Tedung Sinu Ngenang. Ari pemendar ‘izin’ Petara (God Almighty), tu mega kala jadi melaki bini ngena chara mistik enggau mensia dunya (Pok – indai Balang “Balai Nyabong”) laban bisi kebuah ti misteri lalu semina Iya aja nemu.
Laja – anak Sinja seduai Ensing Gima @ Sang Gima. Kedua bali nama disebut orang: Laja Lau Moa Penyapu Leka Balang Berang, Laja Sigat Serangkap Panau Jarang, Laja Batik Kelandik Kaban Dayang, Laja Lingga Tinggi Burang Merabung Kajang. Bini laja benama Lulong kedua bali nama iya nya; Lulong Tebuk Tangkung Burung Kenyalang. Laja bisi dua iku menyadi indu ti benama Endu Dara Lantan Sekumbang seduai Iyak Setikal Bidang. Lebuh pansut ke dunya mensia Laja kekadang tama / ngerasuk ular Kendawang.
Sempurai “Bungai Nuing” – Kedua bali nama disebut orang: Sempurai Munti Gerai Lancham Disimbang, Patu Buluh Antu Lanting Tekejang, Bungai Nuing Manuk Biring Disabung Mali Lenyang. Sempurai asal iya endang anak Antu Gerasi ti benama Nising @ Beduru. Kedua bali nama disebut orang Junan Beketan Tujuh Tunggal Tujuh Jengkal Ruang Belakang, Antu Kara Berua Tanam Tunsang. Sempurai diiru Manuk Sabung Sengalang Burong ti Si Ganti @ Sentebai ti bensumbar Ngingit Lemai Terebai Ari Dilah Matai Tuai Manang ti jadi enggau Nawin.
Tegal ti purih Bunsu Antu Gerasi, nya mih gamal selangkuh tubuh Sempurai endang besai, tinggi jejuau, kering tegap sereta besingkul buah isi. Mata iya kuring baka mata ular ‘serpent eyes’, chura kulit iya kuning choklat sebaka enggau chura kulit bansa Iban, bansa Dayak. Iya mega lengkar, mangah, kih, temil sereta rangkai jaku. Sempurai bebini jadi enggau menyadi Tutong ti benama Endu Selinggir Matahari.
Iya mega kala jadi enggau Endu Patri Rambu Benang adi Bulan Menyimbang ari Gelong. Iya mega kala jadi enggau menyadi Kumang seduai Tutong ti benama Indai Mendung Kupak Kundung Punggang Tembawang kedua bali nama Sebalu Indai Kampung.
Maya ti pansut ke dunya mensia Sempurai selalu tama tubuh ular Kendawang tauka Belalang. Sempurai mega mayuh ninggalka tanda di dunya mensia: batu pantap Bungai Nuing di Batang Ai, Sirat Bungai Nuing diibun Linggir Mali Lebu, Baju Kirai Bungai Nuing. Pungga anak Senteba ti bensumbar Sega Sedepa Kena Ngeringka Leka Balang. Kedua bali nama Pungga iya nya Pungga Aka Sebila Daun Sabang, Bujang Puntang Medang. Kumang – anak Sinjong seduai Bedang. Iya bisi tujuh bali nama / ensumbar; Jawai, Inya, Lenta, Kumbau, Sudan, Puyu.
Kumang ngembuan kuasa mistik ajih sebaka enggau laki iya Keling lalu nulung mayuh Tuai Kayau tauka bujang berani Iban baka: OKP Dana “Bayang”, Ngumbang “Berauh Langit”, enggau ti bukai. Kumang selalu ngayan kediri ba mensia dunya nyentuk ke maya hari diatu, sekali ke dalam mimpi tauka maya mensia kena ‘rasuk’ Bunsu Petara nya. Iya agi ngemataka sekeda kitai Iban ti agi megai pengarap asal Iban. Kumang mayuh ninggalka tanda / kelai di dunya mensia: Tempalai Kumang, Telaga @ Pemandi Kumang (Kapit). Kekadang maya ti ngaga kaul enggau mensia dunya Kumang suah bebali nyadi ular Tedung Bulan.
Tutong menyadi Kumang – anak Sinjong seduai Bedang. Bedang bensumbar Bujang Sebalu Ngenang, Batu Anggung Beruntung Mali Balang. Kedua bali nama Tutong iya nya Tutong Ulup Demong Bujang Lemandau Gendang, Lemandau Kesindau Lama Bujang.
Ngelai kedua bali nama disebut orang: Pau Tunggul Nugu Tumbang, Ngelai Tuai Orang Meligai Pungga Pungkang.
“Pemulai Keling ari menua tasik, iya dipaduka sida semenua nyadi Tuai Orang Panggau Libau nganti apai iya Si Gundi. Udah nya iya pan nguluka nembiak iya pindah ke langit “alam ghaib” mega laban ti deka ngiga endur Apai Sabit Bekait lalu bebalas. Sebedau ninggalka dunya mensia tu, Keling dulu ngajar bala aya, bala petunggal iya ti agi diau ba dunya mensia tu pasal adat tabuh Gendang Rayah tawak enggau ketebung.
“Taja kami Panggau Libau pindah ke langit, kita tau ngena tabuh tu maya begawai ngangauka kami, enti kita minta tulung, minta pandung maya bisi pengawa, bisi penusah. Kami sigi datai mantu kita,” pia ku Keling.
Ninga Keling enggau nembiak iya pindah ke langit, Tutong mega deka nitih nguluka bala iya di Gelong. Iya enggai ngelakka sida Panggau Libau kediri ngayau Apai Sabit Bekait laban iya mega deka nyelamatka apai iya Bedang ti ditangkap lalu dikurung bala Apai Sabit Bekait. Menyadi indu Tutong ti benama Kumang pan nesau bala sida ke bujang-bujang di Panggau Libau enggau Gelong.
“Barang sapa kita ti bujang berani, nyaing muting geraji, tajam nyemilu tisi ulih nyelamatka apai aku Bedang, nya mih dipilih aku ke pebayu sulu ambai perembam dalam ti tau enggau aku idup sekunsi ati.”
Ninga jaku tesau Kumang, nya mih ti ngasuh sida Keling, Sempurai, Laja enggau sida bukai makin gagit ati pindah ke langit, ambika sida ulih ngayau ke menua Apai Sabit Bekait lalu nyelamatka apai Kumang.
Tutong pindah mai sungai Batang Gelong tang laban ti berumban-rumban nitihka Keling, iya enda ingat mai Bukit Gelong di ulu Sungai Ketungau. Bukit nya agi bedau meruan tampak dipeda ari Tinting Kelingkang datai ke diatu.
Udah ti beserara enggau orang Panggau Libau-Gelong, bansa Dayak “Ibanic group” ti betuaika bala menyadi Apai Keling ti benama benama Retak Dai, Lalak Pala, Berenai Sugi, Kurong Mayang, Bui Nasi, Belangkat ngatur diri empu. Bala petunggal Keling baka Putong Kempat, Litan Lengan, Pulang Belawan, Bejit Manai mega baka nya. Sida bukai enda ulih dikeingatka sida ke tuai. Sida berasai amai tusah ati ditinggalka Keling “Gerasi Nading” taja Keling madah, sida agi ulih minta bantu enti maya bisi penanggul di dunya tu. Nya alai sida mega berengkah ngatur diri empu.”
Nya mih tibak cherita pasal kebuah / pemindah Orang Panggau Libau enggau Gelong ke dunya misteri Petara “alam ghaib”. Berindik ari nya mih bansa Dayak beserara enggau raban Bunsu Petara nya. Ingat…, bansa Iban tauka Dayak ti bukai ukai tusut peturun ari Orang Panggau Libau & Gelong tang semina saum aki ini.
Dalam cherita lama Iban dalam kategori novel klasik sekeda Orang Panggau Libau & Gelong tu nyadi karekter ‘watak’ lalu ditengkebang penulis nyadi cherita kreatif lalu mayuh nama bukai dalam cherita nya baka: Renggan, Kumpang Pali, Apai Balang Seribu, Apai Nawang Gundai, Apai Jangkam Bulan, Apai Sali, Apai Seumang-Umang, Juing Anting, Balu Juntan, Lua Limban, Entak Tagan @ Pandak Segatak, Apai Makam, Apai Migu, Lemambang Sampang Gading. Taja pia, cherita kreatif tengkebang baka nya enda ulih nyadi eviden ‘bukti’ pasal kaul Bunsu Petara / Bunsu Antu enggau bansa Iban.
Nyentuk ke maya hari diatu, Orang Panggau Libau ti agi betemu enggau kitai Iban ti agi megai agama Adat Iban lalu ayan segenda tauka dalam mimpi iya nya: Keling, Kumang seduai Lulong, Sempurai “Bungai Nuing” enggau Laja. Sekali agi, nya mih eviden ‘bukti’ ti nunjukka sida empat iku tu endang seraban ari Bunsu Petara ti sama kategori tauka tikas enggau gods / goddess, dewa, diety bansa bukai di dunya tu.
Artikel tu befokus ba pengarap kitai Iban ti nguna piring ading maya ti nyembah dua raban Bunsu Petara: Orang Panggau Libau enggau Gelong enggau Tujuh Iku Sengalang Burong Diri Menyadi.
“Spiritual Practice” baka bedara tauka begawai ti betuaika Manang tauka Lemambang endang disempulang enggau sampi ti disebut dalam leka biau, pelian, timang tauka pengap. Udah ambis macha artikel tu ila, arapka kitai Iban tau bebasaka agama orang bukai taja diri empu udah megai agama Kristian, Islam, Hindu, enggau ti bukai.
Tetiap iku mensia dunya bisi penemu kediri empu milih pengarap ti patut ba diri empu, tang anang bejai agama orang bukai, enggai ke kitai dianu Petara, Bunsu Petara tauka Antu. Pemaik, pengelantang meruan enggau kitai semua, gayu guru gerai nyamai. Awakka berekat Iya enggau kitai belama-lama.
Ulih Harry Usup Umbar