NGEPAN dikena Bujang Berani Iban maya nurun ngayau.
Tusun Ke-19
NGAYAU RAJA RIBAI
NYAU ketujuh hari, bala pungka laki sida di Batang Buluh Balau, Ke Belai Lega Langkang, di Batang Keranji Padi Ke Bebuah Rumbau Jadi Bintih Kesuwie Kunchau Benang udah betugung baka lempaung ngambungka batang. Sida udah besedia enggau senyata enggau ngepan chukup macham nadai ketimpang. Semua pengaruh udah dibai magang laban sida deka nyerang sida Raja Ribai diau di tasik Besai Ledung Lelinang nitihka Sugi laki Sedinang. Sida lalu nurun bebatak, nunda unak jelayan ngerang. Tak nurun mih sida nunda daun ke besebun belayar midang.
“Au dih Saum. Uji nuan ngeluanka berangai panjai semilan enggi aku tu kau Saum. Kaki nuan ke bediri anggu luan, nuan matak kayuh kitai nyerumba menuh pasang malam, ke nyeruran anang timpang laban nuan ganggam lengan ngunjamka taman turus penyakang,” ku Wat Bujang Sugi bejaku enggau Bujang Paku Lawang.
Udah sida iya semua nepan, dia sida iya lalu ngejangka pengkalan tanah landai enggau jelatung tampung tigai. Dia sida iya nyau kayuh kesai ngelimpas ari unai kajang sebidang. Lebuh sida iya ngejangka pengkalan sida iya lalu kayuh tumbak umpan, pegari sebayan di dalam tanah lang. Sida nyau kayuh tumbak ubi, pegari ati tanah nunggang. Dia tanjung nyurung abis dipuntang, tebing ninding abis diparang. Tak laju perau Sugi ari peluru leka senapang. Lasit perau Sugi ari sumpit laja pematang. Nya alai tak enda berasai alai sida datai di Lubuk Nanga Ulak Jawa ke beai beranti tiga puluh nanga ke tak sebaka sama seledentang. Nya nanga ai Panggau Libau orang ke Lebat Bebiau Takang Isang. Nya menua orang Berawa Lama Munyi Ke Berimba Bung Nebang. Dia sida iya lalu ngetu tengeju lelak tulang.
Sugi niki ke tebing lalu bejaku munyi Sebaru dulu ujung, berandau munyi Melanau nimbau bangkung. Iya mesanka selatan ribut nyabung, bua ke bepangka surung dayung, ujan ke nelian labuh ngerunung, hari kudi bebali kelam sabung lindung. Dia ribut tak balat bepuput beanjung-anjung lalu mangkaka menua Bunsu Antu, mangka menua sida Apai Enchulik ke berumah di Batu Ngelentik Neladan Urik Perabung Kajang, mangkaka menua sida Apai Migu, orang ke berumah di Munggu Duju Bukang. Ribut biau balai nya mangkaka menua Jali Jantau, menua Batu Mipau Senayau Tampak Terang, mangkaka menua sida Burung Amung, menua Kerupuk Nyumbuk Tau Ke Sangkar Manuk Menang, mangkaka menua sida di Gelung Batu Nakung Nyingit Nyingung Nyandar Nerabang lalu mangkaka menua Panggau Libau Ke Lendat Dibiau Takang Isang, rumah sida Sempurai peretang rumah panjai, ke sehari tajai terebai ngindang terebang.
Nya alai tak nyau gutak-gutak peretang rumah pandak sida Panggau Libau ke seketak nyilup remang. Dia Sempurai lalu bejalai ke punggai puting setak pemayam punggang.
NESAU ORANG PANGAU LIBAU
“Sapa dih kitai ditu ke tuyu ibu kaban mentua? Sapa kitai ditu ke dekaka aya tangkai berada ke ngudika ai ngachau dunya?” kemah ku jaku Sempurai.
Laban iya ke chakah balat gila, ke kering keredanding tulang dada, dia iya lalu ngenyakka sida ke nembiak ke nyau beketepak nyabak tingkil pending lalu nenchang sida ke bujang enggau simbang banting. Nya baru Indai Abang, laban iya ke tau tilit di burit kendi aji, tau meda di tapa dada jari lalu nilik ari kelawah besai mua, ari keretum indu benda. Dia dih iya meda Sugi ke bejaku kelulu nyampau dikenang, ngasuh selulut ribut kenchang bepadah nganyau mulau mansang nyerang. Dia Indai Abang lalu ngumbai Apai Aji Ke Berani Ati Tau Tampal, Apai Abang, manang ke tukang landik nejal.
“Au dih Orang Tuai, tu ukai ribut ngapa, ribut pia. Tu ga ribut dipesanka Sugi laki Sedinang mai kitai nganyau mulau mansang nyerang ke gilik tasik matang,” ku Indai Abang.
Angkat dih Apai Aji pansut ke ruai, lalu nerajang bedilang enggau api-api. Tak tumpu iya lesung ke tak bepeling apus hari. Begau dih orang kia nanyaka nama main aki nya baka nya. Dia dih iya lalu nyaut enggau singkut dabung jarang.
“Au, kitai mayuh, kitai banyak, semua kaban bujang. Ribut ke bepuput surung dayung, angin ke bepusin balat kenchang tu ribut pesan diasuh Sugi laki Sedinang mai kitai nganyau mansang nyerang.
Dia orang mayuh lalu besikap magang-magang; mantaika terabai rampai disimbang, mai bujak santuk pirak ulu tulang, mai isau lansau penampuk rian kijang, nangkin nyabur chudur pengundur darah lega langkang. Orang lalu nepan perau indu langkan, berangai panjai semilan. Orang lalu betekan bekayuh naka tulang. Dia tak enda berasai alai sida iya datai di Nanga Ulak Jawa ke benanga tujuh bepampang. Dia sida Sempurai tak nyau meda Sugi laki Sedinang.
“Au dih kau aka wai. Kumbai kami udah lesi nuan tu dih aka nengali hari. Kumbai kami udah danjan nuan nengali bulan. Kumbai kami udah terang nuan tu ngelama tu aka ke nengali bintang,” ku orang mayuh, orang banyak.
BETACHAH NGELABAN RAJA RIBAI
Dia mih sida Sempurai ninggalka perau sida laban sida lalu sama nepan perau Sugi. Dia sida sama bekayuh penaka tulang datai ke sida nyau rembus di gilik tasik langkang. Nya alai dia sida lalu nuntung di pengkalan besai enggi Ribai. Sida nanchangka berangai bangkung jungkang. Sida pan lalu betiki ari jalai ai ke begamal manah agi bepantika rangki sepenampang bujang.
Nya alai dia tak begau bala Ribai meda sida ke datai nuntung nyerang. Dia sida iya tak lalu betumbuk munyi nutuk tengah tegalan, lalu bepantap sida Sempurai tak munyi ke nesap tubu asam. Sugi duduk dugau-dugau ngemataka sida iya bepantap berandang rasau, ngemataka sida ke betumbuk munyi ngentung papan timbau. Sebarang perut ke buntas, lempai ke bau. Sebarang pala ke pechah, simpai enggau lelabu. Sebarang betis ke patah gembar enggau alu. Nya alai munsuh pan nyau jarang-jarang baka lantai para nyalai leka rian. Nyau jarang-jarang bala Ribai baka padi nawang belayan. Alah mih bala Ribai.
Dia sida iya pan lalu ngambi pala ke tak naka iya pemanah undan perau. Pala nya kelalu mayuh. Nya alai tak enda abis dibai sida Sugi. Enggi tudah Bujang Paku Lawang, ke endang manuk sabung orang di menua sida Sentukan Buban tak nadai dengah laban ke udah diajihka Sugi. Dia iya diberi Sugi pala anak mit ke baru memekit agi ganjang.
Nya alai bala sida Sugi pan nyau pulai. Lebuh sida nyau datai di Nanga Ulak Jawa ke benanga tujuh bepampang, semua bala sida Sempurai enggau sida bukai ke nulung Sugi pan pulai ngagai menua sida empu di baruh perambu rumah nyementang. Sida Sugi pan pulai ga ngagai menua sida Sedinang. Nyau bekayuh berumpak sida ke lelak ikak tulang. Tak nyau enda berasai alai sida datai ba penyangkai tempat betanchang. Dia Sugi manjung sigi kaung-kaung munyi burung tebali lelang. Tak manjung iya rangau-rangau munyi ngebuska senulau langit ngeruang.
Dia tak begau dih orang di rumah panjai munyi ke begawai ngidangka pengabang. Orang tak lalu ngadingka kemping piring letup penangkup bunga lepang, ngadu piring penganan baka bulan rerak rumpang. Dia sida ke indu begempuru magang-magang nyandik punggang ampang belantan ke bebuah manah macham, ngambi gambar anak Kayan Ulu Baram ngajat di luan bung jungkang. Nya alai tak angkat ga orang mai seliuk manuk labang, ngadingka kemping piring asi kuning ke perenching mandang lumpang. Nya alai Sedinang Dara Kering mantaika anak belulai kumbu iling. Iya ka nyambut pala ulih Sugi, orang ke pemadu kering bemata kuring beati kempang.
Udah orang indu nyambut antu pala, sida ke lelaki lalu ngaga ringka sega seluang. Udah nya, sida ke indu pan lalu naku antu pala niti sentali rumah panjang. Hari pan nyau terunji sabung petang. Orang semalam-malam bepakaika ganjai nyamai ngauk di bentai tajau bujang. Orang bepakaika tuak ngisi awak tandan lempuang. Hari nyau teberingkas tawas siang, bala orang mayuh, orang banyak pan sama ngetu magang-magang.
Oleh JANTAN UMBAT