![](https://utusansarawak.com.my/wp-content/uploads/2022/05/image-6-1024x779.png)
MENUA IBAN … Kar menua Sarawak ti nunjuka menua kampung jerung dulu kelia ti di perimba bansa Iban.
Tusun Ke-35
LEKA jaku, Iban / “Sea Dayak” dikena sida pemansik antropologis nyebut seraban bansa ti bejaku ngena jaku Iban (Ibanic speaking people). Leka jaku “Ibanic” ditengkebang Alfred B Hudson (1970), Professor Emeritus| University of Massachusetts, Amherst, Department of Anthropology. Nitihka pansik analisis “HVS-I region (12.4.2011)”, nunjukka Iban @ Ibanic Group nadai bida ari raban orang asal menua “indigenous people”. Kenu ku sida pemansik antropologis, bepelasarka cytochrome b gene, bansa Dayak @ Ibanic Group, endang seraban enggau orang asal menua (Orang Asli) di menua bukai. Nya alai, Iban nya seraban ari peturun Dayak Borneo ti datai ari menua Yunnan di China enggau Kemboja baka ti udah disebut dulu agi ari tu. Kenu ku sekeda penulis Orang Putih, leka jaku “Iban” datai ari jaku bansa Kayan “Hivan” ti mai reti orang ti udah pindah ari menua bukai tauka orang ti udu bejalai kin kia. Bisi mega sida ke tuai madah, bansa Iban bulih nama ‘Iban’ ari cherita Tindin “Bragah Ngindang” seduai Entinggi “Keti Aur Tulang”. Amai tauka enda, dua iti teori nya, ukai pekara ti berat lalu nyadi batang kelikuh bansa Iban Sarawak. Utai ti bendar iya nya, bansa Iban Sarawak endang seperugan, saum peturun aki ini, lalu bisi tanda amat bepelasarka jaku @ Ibanic languages ti dikena IbanSarawak ke diatu.
PADANG PINDAH KE SUNGAI STRAP
Udah bulih ular sawa nya, Munan mupuk irau ati laban tauka burung ti baka nya. Lebuh nya Munan ninga pasal Apai Paau ba Ulu Skrang ti pandai pasal laba engggau burung ti baka nya. Nya alai, Munan pan ngasuh dua iku nembiak iya betanya ba Apai Paau pasal reti laba tauka burung nya. Sekumbang sida tu ti agi di ulu Skrang, Munan enda ngasuh sida serumah turun ba umai sida empu. Datai nembiak Munan nya di Ulu Skrang, sida pan nusui pasal sida ke munuh ular sawa nya.
“Nitihka penemu aku, burung nya enda bisa. Nadai ngawa. Utai nya nadai ngachau nyawa kita. Laban nya mih ulih muai semua sumpah Bunsu Bintang Banyak ti ngasuh kita ke peturun Padang lapar pungkang datai ke tujuh serak. Udah tu ila kita mesti diau tujuh hari, enda tau gawa ba umai tauka ba endur bukai. Maya nya mega kita patut begawai lalu ngaga piring tujuh itu ti dienselan ngena tujuh iku babi bindu tujuh sepa. Udah gawai nya ila, nya baru peturun kita diau senang lantang,” pia ku Apai Paau.
Pemulai dua iku nembiak Munan nya ari Ulu Skrang, seduai pan nusui semua utai ti diasuh Apai Paau kereja Munan. Ninga munyi nya Munan pan berumban nirika gawai nitihka semua utai ti diasuh Apai Paau nya. Berengkah ari nya Munan sereta semua nembiak iya pan diau senang lantang kaya raja, bulih padi, bulih reta tengkira.
LEPAS ARI SUMPAH BUNSU BINTANG BANYAK
Betaun-taun udah ti lepas sereta selamat ari sumpah Bunsu Bintang Banyak bala peturun Padang nya pan makin mayuh-semayuh, beranak telesak datai ke nyau lebih mayuh ari bansa Seru ti endang bansa asal menua nya. Meda baka nya bansa Seru pan nyau bisi ati dengki lalu munuh bala Munan ngena chara kayau anak. Meda utai baka nya bala Munan pan betesau madahka kaban belayan sida ari Skrang, Saribas lalu ngayau bansa Seru. Nya ti ngujungka sida belaya lalu bemunsuh enggau bansa Seru. Bansa Seru alah kayau lalu rari ke menua bukai lalu tanah sida nya diempu bala Munan. Udah nya makin mayuh bala Dayak Iban datai-sedatai ari dua iti menua nya nitihka Munan ngiga menua baru di Krian. Ari nanga Sungai Babu nya Munan matak bala iya pindah baru tunga ke Utara Barat lalu diau mendam di Melupa, pati kiba Sungai Krian.
IBAN BERIMBA MENUA SUNGAI KRIAN
Bala Dayak Iban kelia ti dulu mungkar berimba menua Krian datai ari menua Saribas. Sekeda sida nya bala Iban Paku ti dulu rembus ba Sungai Krian ari Rimbas. Sekeda sida nya nengah ili Krian berengkah ari Sekundong tauka Kerangan Pinggai di Sungai Paku, mansa menua Rimbas di Debak, Deit, Belasau, Undai enggau Rapong ke Melupa lalu undur ngena perau ke ili Sungai Krian. Di Melupa sida tu diau mendam bumai betaun; tang sekeda sida nya terus ke Awik, Sebetan enggau Sabelak.
Seraban agi bansa Dayak Iban ti dulu mungkar menua Krian betuaika Radin. Sida pindah ke menua nya ari Samu di Sungai Paku. Datai sida di Rimbas ba Tembawai Surok Lelabi dalam menua Teru, sida ngulu sebatang sungai Teru lalu melunggang ke sepiak Batang Krian di Bayor. Datai di Bukit Penajar raban Radin bepechah dua. Seraban ke ili lalu matau menua Kawang enggau Batang Rimbas nyentuk ke Sungai Gerenjang, pati Ulu Krian. Seraban da matau menua Babang enggau Pilai. Sida undur nitihka penganyut ai sungai nya lalu sangkai di Nanga Maras, Krian. Dia sida diau mendam bumai betaun di menua nya.
Seraban agi Dayak Iban bukai ti datai ari Samu enggau Anyut lalu pindah ke Sungai Paku datai ke Meroh ti alai sida limpang ke kiba ngulu Sungai Ketoh pati Sungai Paku datai di entigis ba kaki Bukit Medang ti endur Linggir “Mali Lebu” luput lebuh tepedaka ular kendawang.
LINGGIR LUPUT MEDA ULAR KENDAWANG
Sekali lebuh ti pulai nemuai ari Ulu Krian, Linggir mansa tuchung Bukit Medang antara Ulu Krian enggau Ulu Paku. Maya nya Linggir tekenyit lalu luput meda seiku ular kendawang ba mua iya ti entachang ngagai iya. Maya iya luput, iya asai ke betemu enggau Bungai Nuing.
“Ambi nuan sirat aku nya Linggir, kena nuan matak serang. Sirat nya tau ke empelias nuan. Nuan enda ulih dipantap tauka ditimbak munsuh,” ku Bungai Nuing.
Dani iya luput, peda iya sirat amai bisi ngimbai iya ti gali ba tanah dia. Sirat nya pan dibai iya pulai lalu ditaruh iya teguh-teguh.”
Raban bansa Iban nya majakka pejalai sida nurun Bukit Medang lalu diau mendam sebelah kaki bukit nya di ulu Sungai Gerenjang. Sekeda sida bepechah ari raban besai nya lalu majak ngiga menua baru di Ulu Krian enggau Awas.
IBAN DI SUNGAI MELUPA
Kenu ku orang tuai kelia, bansa Dayak Iban tu endang seraban bansa ti rindu, keras sereta gagit ati ngiga, berimba lalu diau ba menua baru. Ukai tuju sida deka ngayau. Taja pia, enti seiku pan sida udah kena bunuh orang di menua baru sida nya, kaban belayan orang ti mati nya semua angkat magang lalu datai-sedatai deka bebalas sebarang maya baka bala Munan ti dibunuh bansa Seru di Krian nya mega.
Lebuh raban bansa Dayak Iban matau menua, berimba bumai betaun ba endur sida diau mendam di tanah Batang Krian, sida suah betemu enggau bansa Seru ti udah lama nguan menua nya. Bansa Seru tu jarang bumai nanam padi tang udu agi beridup enggau mulung. Sekeda bisi ga ulih berimbai umai, kebun sereta rumah enggau bansa Iban. Sekeda raban Seru suah ngachau lalu munuh sekeda bala bansa Dayak Iban. Nyepi diri selalu diuti, dikachau lalu dibunuh bansa Seru baka nya, bala Iban pan bepadah sereta betesau diri semenua ngayau bansa Seru. Nya ti ngujungka sida beambu munsuh enggau bansa Seru.
Kenu ku sekeda pengingat tuai, bisi seiku tuai bansa Dayak Iban ti benama Daji mai bala iya bebalaska pemarai seiku ari nembiak iya lalu ngayau bansa Seru di Nanga Diso. Maya ti beamuk enggau munsuh dia Bujang Berani Iban ti benama Nanggai ari menua Rimbas mujur bedengah tuai Seru ti benama Genalus. Udah nya makin mayuh-semayuh bansa Iban ari Saribas datai lalu ngempu tanah di menua Batang Krian.
Nya alai menua Melupa pan lalu diperimba Daji. Sida tu datai ke Melupa nengah kempung jerung ti mungkur kaki bukit Sibirong di entigis Sungai Sulau, pati Sungai Assam di Melupa. Tegal sida tu ti dulu datai ba menua Sibirong lalu bumai betaun ba tanah ti dipansa sida, nya mih kebuah bukit nya dikumbai orang Bukit Sibirong Pesok. Pesuk @ Pesok reti iya rembus. Raban bansa Iban tu diau bumai betaun enda lama di Sibirong. Udah nya Unggang “Kumpang Pali” pan nguluka bala Iban ari Saribas pindah ke Krian nengah tanah Sungai Undai di Rimbas lalu ke ili Melupa. Unggang enggau bala nembiak iya pan diau mendam di Temudok di tengah menua Krian.
(Referen maya & kolobrasyen: Tetuan Alexander Mering – Kabupaten Sintang (Bachelor of Law, UNTAN, Pontianak, Indonesia & The Encyclopaedia of Iban Studies, Volume III, Joanne and Vinson H. Sutlive.) The Sarawak Journal 1994-The Source of Iban History, Benedict Sandin)
(Betampung ba Tusun Ke-36 minggu nyin ila)
Artikel ti deka nyadi bup tu ila endang deka befokus ba senentang perugan Dayak @ Ibanic Group aja, ukai reti kitai ngelaung tauka enggai begulai enggau bansa Dayak bukai, tang mih awakka mudah agi dipansik laban mit agi rampa. Bansa Dayak bukai awakka sida empu ga mansik. Nitihka pansik Litericha enggau Sains Spiritual, Dayak @ Ibanic Group tu ukai semina kala diau begulai enggau Bunsu Petara (Dewa) – Sengalang Burung tujuh iku diri menyadi, Orang Panggau Libau enggau mayuh bansa Antu, dulu kelia; tang bansa Dayak Borneo @ Ibanic Group mega datai ari peturun Bunsu Petara (Dewa, Dewi) ti bechampur enggau mensia dunya (1) Bunsu Petara (Dewa) + Mensia (i2) Antu + Mensia + Bunsu Petara. Ila kita meda lenak agi, amat tauka enda utai tu. Pia mega, bala tuai Iban Sarawak dulu kelia endang dipilih Bunsu Petara, atas pemendar ari Petara (Tuhan, God Almighty). Pechaya tauka enda, bepanggai ba pemacha empu. Engka bisi ga pemacha deka nemu pasal referen artikel tu, endang enda ulih dirintai ditu laban kelalu mayuh, lalu deka ditulis dalam bup maya dichelak ila. Nya alai, Iban patut nemu asal penatai peturun diri empu, ambika kitai ulih serakup lalu begempung enggau bansa bukai di Sarawak mega. Engka bala pemacha bisi utai tanya tauka deka ngirum infomasyen enggau gambar ti releven ngagai aku tau giga aku ba lumur WhatsApp tu: 013 8325146 tauka SMS 0111 401 9115.
Oleh HARRY USUP UMBAR