SARIKEI 28 DECEMBER 2016 (KCH140N). Grafik menunjukkan tempat karamnya MV Pulau Kidjang. STR/KHALID LATIP
Tusun Ke-1
BERENGKAH ari minggu tu nyentuk ngagai empelima minggu ti deka datai, kitai deka berati, belematika enggau macha sebansa litaricha kitai Iban ti dikumbai Sada Bebuah.
Ngagai maya karang tu dichelak, dia lalu masih apin bisi seleka lekajaku ti ditemu engkeman dikena nyalin lekajaku Poem (English), tauka Puisi (Bahasa Malaysia) ngagai Jaku Iban. Ketegal nya, dia Yayasan Tun Jugah, jam ti diatu dulu nguna rambaijaku “Sada Bebuah” tauka “Jaku Bebuah” dikena nyalin lekajaku poem tauka puisi nya.
Raban bansa Iban sigi kenyau ari kelia menya bisi ngembuan lekamain lama ti tau dikumbai Sada Bebuah. Chunto lekamain lama nya baka Pengap/Timang, Jaku Tuai, Geliga, Jaku Bepanjap, Renung, Sampi, Sabak, Biau, Pelian, Timang Kenyalang, Dungai enggau Timang Jalung. Nyadi karang sekali ke tu, ukai alai mantaika lekamain nya sekia. Karang tu semina alai mantaika Sada Bebuah ti dikumbai “Sada Bebuah Moden.” Genre litaricha ti bansa tu, iya nya siti pemansang penemu Iban dalam litaricha ti pemadu baru. Disebut ke ukai berindik ari pansik, dipelabaka keterubah sada bebuah tu bisi ditemu ba raban bansa Iban iya nya iya ti dikarang niang Dunging anak Gunggu ari Nanga Ulai, Rimbas, Debak. Siti ari sada bebuah ti bisi dikarang iya menya urung taun 50, taja nadai diberi iya nama, tang karang nya meransang Iban nginsurka atur pengidup. Tu leka sada bebuah nya:
“Merinsa kitai Dayak pendiau enda diubah,
Bumai mayuh alai, pindah kelalu suah,
Langkau bekedugau dibuai agi manah,
Ngema pedis pala asai ti ka pechah ,
Bejalai tusah besai sampai kaki patah.
Patut kitai nguing, runding insur manah,
Ngaga pengawa ngena bumai anang mindah.
Numbak tanah luchak, anang takut kamah,
Nekat ai rarat, anang takut basah”.
JELANAN DIKENA NGENATAIKA RUNDING
Genre litaricha ti dikumbai Sada Bebuah nya tau dikumbai siti jelanan alai pengarang (lemambang sada bebuah) bibas ngelua enggau ngenataika runding diri pasal dunya enggau ulah jelekah enggau pengawa kereja mensia ke nyadi penguan dunya tu, ngena lambang enggau sempama. Di sepanjai kelingkar sejarah dunya, dia mayuh bisi ditemu lemambang/pengarang sada bebuah ti tebangkar, nguna asil buah-jamah (karang) sida jadika catalyst pengubah, lalu asil buah-jamah sida nya mengkang bisi pengamat sereta meruan beguna dikena meransang ati mensia kenyau ari menya nyentuk ke kemayaharitu. Dalam karang tu bisi dibantaika nam-belas genteran sada bebuah ti mungkur mayuh batang pekara di dunya tu. Sada bebuah ke enam-belas genteran tu nya sekeda ari sada bebuah ti dikarang penulis empu kenyau ari taun 2010 ngagai 2019.
“AKU TITI TALI PENGINGAT”
Tu mellinium baru, taun 2-0-0-9,
Ditu kaki bekenji bediri ngentam,
Di atas pasir luas, radas nyapan,
Ngimbai banchak, silak awak Batang Krian,
Ke keterubah alai aku nemuai,
Bemain memarin enggau pangan
Dalam taun 1-9-5-8,
Lebuh kami agi berebak biak
Ari rembak buluh payan,
Ngelanggai bayan ngindang terebai.
Aku tibarka perening adap ke kanan,
Mutik pechik gilik Tasik China Selatan,
Ke ngampar luar, radas luas baka emperan,
Betisika langit lati, kuning kunyit, mirah redam,
Panchar nyeratan panas padam,
Terunji terunjam, diperembam lemai.
Tasik China begaya reremba, linang leledung,
Jementang lelinang, giling lenggang, gumbang besabung,
Berai meili-ili, biru ngelepu, begelemang gadung.
Di buntut dalam iya, nadai pemandai aku meragam,
Nipan enggau ramban pelandai karung;
Ku orang, din minyak agi nanak nganti dilumbung.
Di atas, terebai deras, ngelayang bibas raban burung,
Sepi buku ali aku tak gelesi
Timpus umbak sekali, ke lundai pulai,
Enda sempat aku tanyaka pejalai.
Aku kilak kayang tampai jelai, perening lantang,
Ke banchak, silak awak Batang Rajang Nunggang,
Burak jayak iya dipandi riak, umbak majak, gumbang ngelinggang,
Tang, mih dalam aku berasai berendam nyedan,
Lempuang kusang bimbang;
Tekenangka pemidang kapal tambang
Pulau Kidjang, taun 1-9-7-6,
Diguyang gumbang, dientam lelangan,
Terus gasan iya karam berendam, lundai tesadai;
Nyentuk ke diatu pen masih meruan ngentam,
Indah enda baka tiang ninsan, tanda pendam, kelai bangkai.
Menua ke kiba, aku tampai peda ayas-ayas,
Nyentuk ke buka, radas, luas Nanga Saribas,
Ku cherita menya, ensera lama,
Adap kia ke alai Nuga, tuai kelia,
Mantap, mungga pala bena
Laban ati enggi orang laki kudi mati, balat nyida,
Mati asi anak engka
Dipangkaka bena, nyereta jerua pasang lemai.
Aku tanpa jauh ke mua,
Adap ke gilik tasik kuala,
Pandi pechik Sadung Nanga;
Disada enda didinga,
Ditinjau pan rapas mata,
Nya Pulau Burung Reremba,
Ku kenang, batang cherita,
Nya pulau tikau Petara,
Diinang belalang naga bisa,
Tapatka mensia betapa,
Ngiga guna ubat pengembai.
Aku tibarka perening lundai aku tachar,
Adap ke silak awak Nanga Batang Lupar,
Teleba dialun senggal umbak kapal
Enggi Tuan Rajah Tuai,
Selalu ga nya menya dilayar bidar Laut Layar
Pulai sampal ngarang jeremai.
Umbak ikak beriak, sesayak ngarak malam,
Bemain di betin, bemarin di beruan;
Lenggang semakin nyegang,
Pasang semakin dalam,
Ikan lelayar pepar liar,
Gerama kaban berumban nyereban,
Pulai teruan ke lubang dalam,
Ngereman di beruan pasir bungai.
Ku sepi mua aku berasai begeremai,
Liu dipampu jemu, ambun tuai;
Liut dikesut selulut ribut begadai;
Tang mih, tak apin sempat aku
Nanyaka penatai, tuju penemuai,
Alai iya tak nikal beguai, empulak pulai,
Datai ke dia pen,
Apin mih aku nemu ngasai,
ngelala mua, nemu nama.
PEMAJIK, PENARA RAMPA MENUA
Sada bebuah tu tadi ngambar pasal pemajik enggau penara rampa menua ba tebing Tasik China Selatan ba sentang endur ti dikumbai Pantai Alit, Kabong, muak ke kiba enti kitai bekapal nama nanga Sungai Krian ari Tasik China Selatan. Sada tu mega bisi ngambar pasal pemanah rampa menua adap ke Nanga Sungai Saribas, Batang Lupar, Nanga Sungai Sadung, Pulau Burung enggau Tasik China Selatan ti ulih tachar peda ari tebing tasik Alit nya. Buah-jamah ke tu dikena aku mulaika pengingat diri pasal kami seraban (nembiak Form 2 ari Saratok Secondary School, Saratok) diuluka dua iku pengajar bansa Orang Putih ari England, Mr. Mathew Mark enggau Mr. Paul Beavitt), ke nemuai memarin ngagai Pantai Alit dalam taun 1964 menya.
BETAMPUNG
Oleh JANANG ENSIRING