Belajar meh ari sekeda penyalah

NGAGA PENGAWA NGENA CHARA BUKAI

Genap iti jalai tauka chara ngaga pengawa jarang nadai chara sereta jalai bukai,  

lebih agi ngagai ulah enggau pengawa ke enda manah nyengkaum bisi tuju ati ke jai. Pengawa ke baka nya mega tau dikumbai chara dikena nyeliahka tauka ngerarika diri.

Ambika banding, enti penchuri enda ulih tama nengah pintu, sida selalu ngeluit penjan  tauka ngeluit singkap atap dikena sida tama ngagai siti rumah deka diserungkai sida iya.

Bala sida ke nginsap nya bakanya ga. Laban rega insap nyau majak mar datai ngagai RM18 sebungkus, sida lalu ngetu nginsap segerit baka Salem, Malboro, Camel, Dunhill tauka Benson & Hedges enggau chap ke mar tang ngubah insap sida ngagai chap baka Era, Parkway, Rave tauka LA  enggau sekeda chap bukai ke ulih dibeli ngena rega antara RM3.50 ngagai RM4.50 sebungkus. Ka tambah tu, mayuh mega insap datai ari menua Indonesia baka Kretek, Djarum enggau mayuh agi dijual ngena rega murah. Asal meh nginsap, chap nya nadai dikira, asal bisi nepuk asap.

Pia mega ai bisa baka beer tauka brandy enggau whiskey. Mayuh bendar bansa beer  chap baru ba pasar kelimpah bansa Heiniken, Carlberg, Anchor, San Miguel, Tsing Tao, Becks tuaka Stella Artois. Diatu nyau bisi Orangeboom enggau mayuh bansa beer bukai digaga ba Indonesia, Thailand enggau Malaysia.

MAYUH JALAI NYELIAH ADAT

Nya alai, kelimpah ari mai barang tama nengah jalai ke betul, mayar chukai barang, orang ke bisi jai tuju endang semampai bisi jalai nyeliahka diri mai barang tama ngagai  menua tu.

“Bala sida tu meh ke semampai begagai baka mayau ngagai chit enggau bala kami Kastam Diraja Malaysia (KDM) laban bala raban tu endang orang ke semampai ngerarika diri ari mayar chukai barang lalu ngichaka diri untung mayuh agi ari genap unit barang ke jual nya laban nadai mayar chukai barang nya tama ngagai menua kitai tu,” ku pemesai KDM ke minta nama iya enda disebut ditu.

Pemesai KDM umur 57 taun tu udah mayuh endur gawa ba sebelah bagi menua Sarawak tu. Diatu iya bepalan ba Padang Bilun Entarabansa Kuching.

“Kekadang bala sida ke ngemai barang tama nya ‘declare’, iya nulis bengkah barang ba pom nya enda sama enggau bansa barang ke dibai tama. Ambika banding, kekadang sida mai tama bansa ubat ke tinggi kelas berega mar, tang sida ‘declare’ barang nya bansa ubat ke mudah.  Ari nya sida mayar chukai ke mimit agi sereta ngujungka sida bulih untung ti besai agi.

Bakanya mega enggau bansa kain sereta gari baka baju enggau tanchut ke dibai tama kelimpah ari ke meruan jenama, sida mega ulih nipu madahka kain nya bansa murah, bansa ke jai kualiti ngambika mayar pupu ti mimit agi. Nya alai beduduk ari sida deka bulih untung ke mayuh sereta ngerugika perintah laban enda mayar chukai ke patut.

“Taja pia, tu pama ga ari sida ke terus ngemai tama barang chara belalai ngagai menua tu lalu terus nadai mayar chukai. Nya meh kebuah, enti sida ditangkap sereta diukum, nitihka Akta Kastam, sida deka diasuh mayar sepuluh kali lipat penyampau chukai ke diseliahka sida nya. Beduduk ari tu, dia kitai kala ninga sida ke ditangkap sereta didawa ba kut diukum nyentukka ngagai bejuta ringgit,” ku pemesai KDM nya madah ngagai pengarang berita lebuh ke ditanya apin lama.

Pemesai nya mega madahka, kelimpah ari KDM sida ke nguji deka nyeliahka diri ari  mayar chukai nya ditangkap pemesai neritka kuasa ari Opis Menteri Dagang Dalam Menua, Koperasi enggau Pekara Meli Barang (KPDNKK) ke ngatur operasyen meresa barang enggau rega.

Ku iya, tebal agi barang ke rampas kastam tauka KPDNKK dibai belalai bala orang jai tama chara nya baka insap sigarit, ai bisa baka arak, bia, minyak diesel sereta mega sekeda barang bukai nyengkaum dadah enggau pil layap.

Sada Sarawak endang semampai ngundan berita pasal kes tangkap kastam tauka tangkap KPDNKK laban kena meri ajar enggau lalau ngagai rayat mayuh pasal penyai ulah ngereja pengawa bakanya ti ukai mina ngelaban adat perintah tang mega pulai ke penusah diri empu, laban sida ke ditangkap nya jarang enda masuk jil.

Nyadi enti kitai mulaika pengingat, mayuh bendar kes tangkap kastam ke dibantai ungkupka penguntung pemacha mayuh ngelamatu ulih Sada Sarawak enggau surat berita bukai. Sekeda kes tu baka ke entudi tu.

Ambika banding dulu ari tu lebuh bejaku ngagai pengarang berita di Sibu,  KDM udah dipadah bisi ngatur dua bengkah pengawa ngerenchah ngenyit taun lepas lalu ngetan 36 iti kontena ngundan barang diba bai tama chara belalai berega RM3.83 juta nyengkaum chukai.

Pengudah semua kontena diperesa sida iya, 25 iti ditemu ngundan beras  653,850 kilogram (kg) (653.85 tan) pemerat ti dipelaba berega nyengkaum chukai manggai ba RM1,830,780. Kelimpah ari nya empat kontena ditemu ngundan bia (beer) berega (nyengkaum chukai) RM883,319.27; lalu bisi tujuh iti kontena agi ditemu ngundan tayar berega (nyengkaum chukai) RM1,124,936.82.

“Lebuh diperesa enggau silik, beras nya dipasukka sida ‘rengka guna rama’ tauka ‘hardware’ lalu tayar nya dipasukka sida ‘injin second hand’, lalu beer nya dipasukka sida nyadi ‘mixed groceries’ tauka ‘mayuh macham ruti enggau kuih’ dalam pom barang baka ke dirikut,” ku tua sida madah.

Semua barang nya dirampas sereta diambi perintah nitihka Genteran 114 Akta Kastam 1967.

UKUM BESAI

Baka ke bisi dipadahka pemesai kastam nya, beras nya barang ke dijaga tauka ‘prohibited import goods’ di baruh ‘Customs Order (Prohibited Imports) 2012’ enti nadai ‘permit’ (kemendar) ari Opis Menteri Betanam Betupi enggau Industri Agro Malaysia. Lalu beer nya pan barang ke ditagang dibai tama ngagai menua tu enti nadai pemenadar ari Tuai Pengarah KDM.

Semua barang tu sigi kena chukai barang tama tauka ‘import duties’, ku iya.

“Nyentukka diatu (maya aum media), nadai orang udah ditangkap lalu kes tu agi benung ditasat baruh Akta Kastam 1967 ketegal ngemai tama barang nadai ngena permit ti meruan.

“Enti ditemu salah, ungkup penyalah ti keterubah, orang ke salah nya deka diukum   enda kurang ari sepuluh kali penyampau tang enda  lebih ari 20 kali penyampau chukai barang nya tauka dijil enda lebih ari tiga taun tauka kedua-dua ukum nya sekali.

“Nyadi enti nya penyalah ti sama kedua kali tauka lebih, orang ti salah tau diukum enda kurang ari 20 kali penyampau tang enda lebih ari 40 kali penyampau chukai barang nya tauka dijil enda lebih ari lima taun tauka kedua-dua ukum nya sekali,” ku iya.

Beras 653,850 kg pemerat  ti dirampas KDM Sibu nya munyi ti enda dibuai tang dijual ngagai Padiberas Nasional Berhad (BERNAS) tang beer nya munyi ti deka dijual ngagai kompeni nyual beer tang tayar nya deka dibasau, dipenyati lalu dibuai.

Di menua Selangor ba taun 2019 suba KDM menua nya bisi nangkap 530,000 liter arak berega RM4.3 juta dibai tama ngagai nengeri nya berengkah ari bulan Satu taun nya. Nitihka riput, KDM menua nya ngerenchah ngengit ngagai 345 bengkah kedai sereta ngerampas 24 iti kontena. Sida mega mujur nangkap 111 iku orang lalu 96 iku ari sida nya dikompaun ti ngujungka perintah bulih penatai pemisia lebih ari RM200,000.

Kelimpah ari pengawa mai barang chara belalai baka ti udah disebut dulu ari tu, kitai mega suah bendar ninga kes orang ditangkap ngaga penyalah ketegal  mai minyak diesel chara belalai.

Nitihka penerang ari seiku pemesai KDNKK di Kuching, ukai semua opis tauka orang ulih meri pemendar ngereja pengawa ke baka tu.

Semina sida ti dikemendar aja ulih diberi subsidi diesel tu, iya nya serikat ke bisi bekaul enggau sektor betanam betupi aja, ke diberi antara 150 ngagai 200 liter diesel subsidi sehari sereta 50 liter sehari ungkup kerita dikena ngangkat sereta nusun barang (forklift),” ku iya madah ngagai bala pengarang berita maya aum media apin lama ke udah.

Pemesai nya mega madahka, seiku orang tauka serikat ke nadai surat pemendar ari KDNKK, nyengkaum gudang, penyual minyak diesel, palan ngaga rumah, stisin pemekal kuasa telekomunikasi, palan alai kuari, stisin nebuk ngiga mas enggau kem nebang kayu enda tau mai diesel lebih ari penyamapau baka ke udah ditetapka.

Ketegal pengawa ke baka nya mayuh amat kes udah ditangkap polis, kastam tauka sida ari opis KDNKK ke bisi  besangkut paut enggau pengawa nyeliahka diri ari mayar chukai. Semua pengawa ke baka tu ketegal pengamu deka ngulihka untung besai.

Pengamu runding ngasuh mensia ngaga penyalah ke baka tu. Ketegal serepan mata lalu kurang betatika undang-undang menua, sida terus ngemeranka pengamu diri ngujungka sida kena tangkap.

Taja pan pengawa nyeliah tauka enda nitihka atur sigi endang amat meri penguntung tang semua penyalah mega endang bisi ga tipak iya. Reti nya, nadai lebih manah agi ari kitai mensia ngasika atur lalu belalauka undang-undang, adat enggau atur perintah. Ngelaung jalai nadai salah, ngelaung adat sigi ngujungka tulah. Nya alai anang ngelaung adat!

Oleh TELESA EMPERAN