????????????????????????????????????
ENDANG amat mayuh orang madah mar agi ari meli mas. Iya sempama mas dalam ai. Taja pia, orang ti beduit sereta deka makai iya enda bedulika nya lalu sanggup mayar sepinggai sampai ngagai RM700 enti makai ba restoren di menggeri besai Kuching ditu.
Pia meh pengemar rega ikan Empurau ke mega jarang bisi ditemu dijual ba sturan besai laban nemu orang enda berani nguda ikan nya enti ukai orang kaya, orang ke bisi duit lalu keran deka makai ikan nya.
Tang taja iya mar, endang sigi bisi ga orang enda bedulika pengemar iya lalu tetap nguda tauka meli ikan nya laban keran deka ensepi penyamai iya – ngenang penyamai endang amat nyamai, laban bisi kaban penulis madah sekali bisi ampit makai ikan Empurau ke berega mina RM86 pemanah iya pemesai lebuh bisi dijual orang di pasar Julau dalam taun 1989 kelia.
“Ikan nya dipanduk kukus ba siti kedai makai di pasar Julau. Maya nya rega ikan Empurau nya agi urung RM90 sekilo tang jarang bisi dijual di menua Julau,” ku siku indu nya ti gawa ba siti opis di menua nya.
Jam diatu ikan Empurau abis nadai berega sampai ngagai RM700 sekilo ba makit. Nya alai orang ti bulih ikan nya di menua ulu din baka ba ulu ai Batang Rajang, Batang Balui, Batang Baleh enggau ai bukai endang lalu amat beduit.
Kebuah ti mar nya laban ikan tu sigi ikan dikelandik semua raban bansa, ukai bansa Iban aja tang sida menyadi kitai bansa China ke ngujungka ikan nya chukup berega. Enti dulu orang madah ikan Semah enggau Tengadak amat nyamai, tang diatu semua orang balat agi bekelandikka ikan Empurau ke bisi dua bansa, iya nya Empurau Burak enggau Empurau Mirah.
Nyadi Empurau Burak tu jarang agi ditemu tauka ulih mensia mayuh tang berega murah agi, iya nya urung RM600 sekilo diatu.
Beduduk ari tu, enti bisi jalai anang enda nguji ngiga jalai nginang ikan Empurau ambika jual sereta ungkupka empa diri empu. Enti alai nupi iya chun sereta ngena pemanah nadai kebuah iya enda ulih idup enggau likun sampai chukup besai lalu ngenataika untung besai enti dijual. Kitai pan tentu chukup puas hati ensepi penyamai iya enti udah datai ba pemesai ti chukup, kelebih agi Empurau Mirah. Taja pia, Empurau tupi ba ai matung baka dalam pegung tetap alah penyamai bebanding enggau Empurau ti idup ba endur pendiau asal iya baka dalam sungai endur ai rarat.
“Laban ke nyamai sereta berega meh mensia mayuh ke bisi awak endang keran ngulihka Empurau, iya nya sida ti nguan menua ulu, kelebih agi muak ngagai ulu Batang Rajang enggau pati iya baka Baleh enggau Balui.
Tang anang ngiga ba ai menua ili laban ai ti dikerinduka ikan Empurau nya ai menua ulu,” ku siku driba bilun (pilot) ba Hornbill Skyways, lebuh ditanya penemu ulih Sada Sarawak apin lama. Iya tu sigi berasal ari menua Kapit tang udah lama diau mendam di Kuching.
“Ikan baka Empurau enggau Semah endang ditemu beranak, betelesak ba Ulu Batang Rajang, Ulu Baleh, Ulu Katibas enggau Ulu Balui, ku driba bilun nya.
Perintah endang lama udah merambu sereta bejalaika pengawa deka terus ngidup sereta nambah pemayuh ikan Empurau enggau sekeda ikan ti nyamai agi baka Semah, Tapah, Tengadak enggau sekeda ikan menua ulu bukai. Siti ari jalai nupi nya ngena sistem tagang ti dipejalaika di Kapit enggau di Serian. Di Betong, di Kanowit enggau di Miri sereta di Limbang pan bisi ga udah sungai dilepaska sekeda bansa ikan awakka idup besai lalu dijaga enggau manah.
Reti sistem tagang nya, ikan ditupi ba sungai dalam bungkur sistem nya nadai tau diambi sengapa, laban sida ditejuka mansang besai lalu mina tau diulih, tauka diketau enti bisi guna tauka ungkup dijual.
Di menua Tarat, di Serian bisi mega orang betelesakka ikan Empurau. Nitih pemadah ari pemberita, bisi enam iti pegung di Tarat ditagaka alai nupi ikan Empurau.
Projek nya deka disungkakka manah agi sistem pejalai ai awakka ai enda matung tang ulih rarat kin kitu ngambika ikan nya asai ti diau dalam sungai. Sistem pejalai ai nya mega deka nyungkakka agi kapasiti (pemayuh peranak) enggau kualiti ikan Empurau, pia ku jaku Jabu maya bejadika palan alai nupi ikan nya.
“Kena nyapai tuju ati kitai deka ngidupka mayuh agi ikan Empurau ke tinggi agi kualiiti, infrastruktur ngagai sereta ngelingi palan alai nupi ikan tu deka disungkakka agi pemanah iya enda lama udah tu ila,” ku siku pemesai Opis Betanam Betupi lebuh ditanya Sada Sarawak.
Iya madah, maya musin kemarau deka pedis mimit nupi ikan laban ai numbas penalam lalu tusah deka ditikal pulai awakka pegung enda kelalu matung. Laban enti kelalu matung enda chukup angin enggau oksigen ti beguna bendar kena nentuka ikan nya nyamai enseput lalu idup meruan.
Nyadi ngagai diatu, Sada Sarawak nadai nerima berita pasal pengujung projek tu tang mina ninga projek tu bejalai enggau manah.
Di Kuching ditu, siku bansa Kelabit, Dr Elli Luhat, nya siku orang ditemu bisi nupi ikan Empurau kelimpah ari nguji nanam kayu gaharu.
Nitih padah Elli, pengawa nupi ikan tu chukup pedis. Kebuah pia laban ikan nya begunaka mayuh oksigen kena sida idup meruan, baka dalam endur asal sida, iya nya dalam sungai. Reti nya sida pedis deka idup dalam ai matung.
Nya alai nadai lebih manah agi ari sistem tagang ti alai benih tauka anak ikan nya dilepaska di sungai di serata menua kitai tu, lalu anang semina di Kapit, di Kanowit, di Limbang, di Betong enggau menua bukai. Anang nganti ikan nya udah deka punas, tang berengkah ari diatu. Sapa-sapa orang ke bisi kuasa, bisi daya, sida enda tau enda berengkah diatu ngepunka atur ngelepaska anak ikan ngagai sekeda sungai awakka sida idup meruan lalu ngenataika penguntung ngagai mensia mayuh.
Nyadi kitai mayuh tu pan tau ga nguji sama enggau orang ngeruh ai nguji nupi ikan Empurau, mirah tauka burak berengkah ari diatu. Sesebuah rumah panjai tauka sekeda rumah panjai ti bekunsi tauka nengali sungai tau mega nguji numbuhka sistem tagang sida empu lalu nguji minta anak ikan Empurau ari Opis Betanam Betupi engka sida bisi. Enti nadai, ulih ga nguji nanya kini tunga tau bulih anak ikan nya. Penulis apin bisi hari, naka nupi ikan Patin aja jam diatu. Dudi ila engka deka nguji nupi ikan Empurau, engka ulih nambah jereki.
Oleh TELESA EMPERAN