Kuching, Sarawak Malaysia. May 1994. Gawai Dayak is religious festival celebrated by the Borneo people of Sarawak and Kalimantan in order to express their joy and gratefulness for the rewarding harvest. Here at the parade you can see women with traditional clothes.
Tusun Ke-44
IBAN, MELAYU ENGGAU ASAL MENUA SARAWAK
Nitihka sejarah enggau jerita tuai, dulu kelia menua Sarawak tu mit aja ti beduduka ba nanga Sungai Sarawak lalu kena pegai perintah Sultan Berunei ti begelar Al-Marhum. Bansa Dayak Iban nyebut Sultan Berunei tu Raja Merom. Sultan Berunei Keenam ti benama Abdul Kahar lalu suah disebut orang Merhoum Keramat anak Sultan Bolkiah iya nya Sultan Berunei Kelima. Sultan Berunei ke penudi bendar ngena gelar marhum tauka Merhoum iya nya Sultan Omar Ali Saifudin I ti lebih tampak rita disebut orang Merhoum di Makam Besar. Iya nyadi Sultan Berunei Ke-18 lalu bekuasa berengkah ari taun 1740 ngagai 1795.
James Brooke datai di Sarawak jeman ichit Sultan Omar Ali Saifudin I ti benama Sultan Omar Ali Saifudin II; Sultan Berunei Ke-23 ti merintah Berunei berengkah ari taun 1828 ngagai 1852.
Menua Sarawak ti dipegai perintah Sultan Berunei jeman taun 1599 lalu bisi Sultan kediri empu ti benama Sultan Pengiran Tengah Ibnu Sultan Hassan. Maya Sultan Sarawak nya belayar ke menua Pahang enggau Johor iya maduka Datuk Patinggi Seri Setia, Datuk Shah Bandar Indera Wangsa, Datuk Amar Seri Diraja enggau Datu Temenggong Laila Wangsa ngemataka menua Sarawak. Pejalai Sultan Pengiran Tengah belayar ke menua tasik iya nya deka nemuai ngagai ibu iya Raja Bonda di Johor. Raja Bonda tu menyadi apai Sultan Tengah ti belaki jadi enggau Sultan Abdul Jalil ti bekuasa di Johor taun 1628 ngagai 1667. Maya di Johor Sultan Pengiran Tengah nampar seiku pemesai Sultan Johor lebuh iya dibai orang betanda ba sebengkah pengerami nikah. Maya nya mua Sultan Tengah kena biau perecha sida ke betanda enggau iya nya. Meda utai baka nya Sultan Johor ringat amat ngagai Sultan Tengah. Nya alai iya pan diasuh ibu iya pulai ke Sarawak tekala nya.
Lebuh ti deka belayar ke Sarawak, kapal iya tepawah ke menua Matan di Indonesia. Di Matan, Sultan Pengiran Tengah dipinta Sultan Matan jadi enggau anak indu iya ti benama Raja Baka lalu beranakka anak lelaki seiku ti begelar Pengiran Mangku Negara ti lalu nyadi Sultan Matan.
Ari Matan Sultan Tengah agi keras deka mulaika diri ke Sarawak. Lebuh iya ngetu di Sambas iya ditanka Ratu Sambas Wan Nugal, bini Sultan Sambas ti benama Sultan Anam lalu diasuh jadi enggau anak indu seduai iya. Sultan Tengah enggau anak Sultan Sambas nya beranakka Radin Bima. Maya di Sambas Sultan Tengah diberi gelar Merhoum Suleiman lalu anak iya begelar Merhoum Bima ti nyadi Sultan Sambas lalu ngena gelar Sultan Mohamed Jelal-Addi.
Maya di Sambas, Sultan Tengah agi keran deka pulai ke Sarawak. Datai di menua ti dikumbai Batu Baya semak nanga Santubong Sultan Tengah deka sangkai ke pantai menua nya. Iya ngena perau mit ti dikayuhka ulun iya ti benama Sakai enggau nembiak seiku ti ngibun keris Sultan Tengah. Datai di tebing enda mukai-mukai Sultan nya tadi pan direjang ulun iya ti benama Sakai nya ngena sangkuh. Nyepi diri pedis lalu nemu diri diachuk sangkuh ulun iya nya, tekala nya Sultan Tengah pan nyapai duku iya ti diibun nembiak nya tadi lalu dipumpung iya pala Sakai. Putus sekali pantap rekung tudah ulun iya nya tadi. Sultan Tengah madamka seput ba astana iya empu di Santubong, indu nengeri Sarawak maya nya taun 1641 lalu pendam iya agi meruan dipeda di Pantai Damai di Santubong nyentuk ke hari tu. Gelar Datuk Patinggi Seri, Datuk Amar Seri agi diguna di Sarawak datai ke maya hari diatu.
BEBALAS UTI NGAGAI SULTAN BRUNEI
Kenu ku sekeda jerita tuai, dalam kandang taun 1600, sekeda tanah menua di Nanga Kalaka, Nanga Saribas enggau menua nebing tasik nya kena pegai Perintah Johor ti peturun Sultan Parameswara (Sultan Sultan Abdul Ghafur Muhiyuddin Shah Ibnu Sultan Abdul Kadir Alauddin Shah) di Melaka. Lebuh Sultan Johor nyau lemi tegal ti selalu beperang enggau bansa Orang Putih, menua Sarawak pan diperintah Sultan Berunei ti ngujungka mayuh bala pemesai Sultan Berunei datai lalu ngambi indu bansa Dayak nyadi gundik (indu simpan astana) sebelah menua nya. Rita pasal ulah bala pemesai Perintah Sultan Berunei ti enda beradat nya datai ngerimbas pending bala tuai-tuai kayau bansa Dayak Iban baka Unggang “Lebur Menua”, Orang Kaya Pemancha Dana, “Bayang”, Beti “Berauh Gumbang” enggau sida ti bukai mega. Tegal nya tuai-tuai kayau bansa Iban nya deka bebalas lalu ngayau ke menua Sambas sereta nebing tasik Tanjung Datu.
Dalam taun 1823, Pengeran Bendahara di Berunei ti benama Pengeran Muda Hashim maduka pemesai peturun bansa Arab ti benama Sharif Sahap merintah menua pegai Sadong. Sebedau nya Sharif Sharap endang udah dipaduka Sultan Berunei merintah menua Skrang nganti tuai bansa Melayu ti benama Laksamana Aminuddin; iya nya apai Abang Aing ti nyadi pemesai Perintah Raja Brooke.
DAYAK BIDAYUH NGELABAN SULTAN BERUNEI
Dalam taun 1836, Sultan Berunei ti benama Sultan Omar Ali Saifuddin II udah maduka Pengiran Makota (Pengiran Indera Mahkota Mohamad Salleh) nyadi pengari iya merintah Sarawak (Kuching). Pengerin Mahkota mih keterubah orang muka pasar Kuching. Maya nya tuai asal bansa Melayu ke merintah Kuching iya nya Datuk Patinggi Ali, peturun Raja Jarum ari Datu Merpati Jepang. Bala Datuk Patinggi Ali mayuh diau di Siniawan enggau menua Dilah Tanah di Bau.
Kenu ku orang tuai kelia, Pengiran Mahkota nya enda tentu manah tempara ngagai bala Melayu, Bidayuh enggau China ti nyadi nembiak Datuk Patinggi Ali. Bala nembiak Datuk Patinggi Ali dipejal Pengiran Mahkota nyadi kuli kereja lombong emas di Bau. Barang sida baka padi, jelu, ikan, sarang burung, perau enggau asil ti ulih bala Datuk Patinggi Ali selalu dirampas bala Pengiran Mahkota. Mayuh mega bala nembiak Datuk Patinggi Ali ditangkap lalu dijual Pengeran Mahkota nyadi ulun. Sida ke indu-indu ti bajik-bajik ditangkap lalu dikurung nyadi gundik tauka indu simpan bala Pengiran Mahkota. Tegal nya Datuk Patinggi Ali enggau tuai-tuai bansa Dayak Bidayuh angkat ngelaban Perintah Sultan Berunei ti betuaika Pengeran Mahkota di Sarawak. Datuk Patinggi Ali dibantu Sultan Sambas.
Meda penyarut di Sarawak makin nyadi-senyadi, Sultan Berunei ngasuh aya iya Raja Muda Hashim ke Sarawak ngadu sereta madamka penyarut di Sarawak nya. Pengiran Mahkota enggai mendingka jaku lalau Raja Muda Hashim.
PEMESAI SULTAN BERUNEI NGEMELIKA IBAN
Bansa Dayak Iban di Batang Lupar, Saribas enggau Kalaka mega bisi kena rampit penyai pemesai Sultan Berunei nya kelia. Sida ukai semina ngakal bansa Iban ngena pasu mengut betunjang lapan tang suah nangkap bansa Iban ti enda ulih mayar pupu lalu diasuh nyadi ulun. Sida ke indu-indu diambi bala pemesai Sultan Berunei nyadi gundik (indu simpan) sida. Tegal nya mayuh sida ti ngumpul pupu di menua bansa Dayak Iban nyadi dengah bala bujang berani Iban maya nya. Libau “Rentap” suah bedengah sekeda ari sida nya. Ugat anak Libau “Buban” kala mantap pasu mengut ti dikena bala pemesai Sultan Berunei ngumpul padi ti nyadi chukai pintu maya nya. Dalam kandang taun 1600 Betie “Berauh Gumbang” ti diasuh antu Bunsu Petara jadi enggai Riti di Skrang, kala ditangkap bala pemesai Sultan Berunei lalu bini iya Riti ulih rari belalai. Tegal nya Kumang ngasuh anak dulu Betie “Berauh Gumbang” ti benama Maradana nyelamatka apai iya ari kurung dalam kapal bala pemesai Sultan Berunei nya. Bala Dayak Iban di menua Batang Rajang enda tentu ampit penyai pengumpul pupu Sultan Berunei tu laban Sharif Masahor ti dipaduka Sultan Berunei merintah kandang menua nya enda berani ngachau bansa Dayak Iban Batang Rajang tambah mega Sharif Masahor bebakih amai enggau Mujah “Buah Raya” seduai Libau “Rentap”. (Sources of Iban Tradisional History, Benedict Sandin, 1994)
(Betampung ba Tusun Ke-45 minggu nyin ila)
Nya mih asal penatai sekeda ari bansa Dayak “Ibanic Group” ti bukai ke menua Sarawak, ti bekaul jaul segulai sejalai enggau bansa Melayu Sarawak ari jeman kelia. Kenyau ari kelia dalam sejarah Sarawak, bansa Dayak (Iban) enda kala bemunsuh enggau Melayu Sarawak. Jeman kelia menya, di Batang Lupar, Saribas, Batang Rajang Iban semina bemunsuh enggau bansa Seru, Baketan, Beliun enggau Orang Ulu; nya pan tegal bansa Dayak ti ukai ‘Ibanic group’ nya mungkal nanjar bansa Iban maya sida bepindah ngiga menua baru endur bumai betaun. Terima kasih ngagai kaban FB ti udah ngirumka mayuh gambar bansa Dayak Borneo. Engka bala pemacha bisi tanya tauka deka ngirum gambar ti releven ngagai aku tau giga aku ba lumur whtssp tu: 013 8325146
DITULIS Harry Usup Umbar (B.Sc Hons. Human Development, UPM)