TERIMA KASIH … Salehah Hid (empat kanan) nyuaka replika chek ngagai Kong Chiong Hui maya Pengerami Nyuaka Geran OSC MIDS empai lama ke udah.
SIBU: Bisi 93 bengkah sekula primari nerima geran penyampau RM93,000 ari Komiti Neritka Kuasa Aktiviti Ngena Dadah Chara Salah enggau Substance (OSC MIDS) empai lama ke udah.
Geran nya diberi ngena Program Pelajar Nagang Dadah (PPDa) ke alai genap sekula sama bela nerima penyampau RM1,000.
Check nya disuaka Pemangku Pemesai Pelilih Sibu Salehah Hid ngagai Sapit Pemesai Pelajar Pelilih (PPD) Sibu Kong Chiong Hui ba siti pengerami ke diatur ba Bilik Aum Opis Pelilih Sibu.
Dulu ari nya PPD bisi minta agih dikena mutarka isu dadah enggau substance ba institusyen pelajar.
Maya pengerami nya Kong mega nyuaka chek geran nya ngagai bala kepala pengajar ke bisi nyereta pengerami nya.
Kepala pengajar ke nerima chek nya Kepala Pengajar Sekolah Kebangsaan (SK) Bahagia Jaya ti mega Chairman Kunsil Kepala Pengajar Pelilih Sibu Sharkawi Hamdan, Kepala Pengajar SK Rantau Panjang ti mega Chairman Gerempung Educator Dayak Sarawak Ahpong Enteri enggau Kepala Pengajar SJKC Su Lai ti mega Chairman Gerempung Pengajar China Sibu Chan Siah Kuong.