MARUDI: Penulung Menteri ba Opis Kepala Menteri, Meratika Pengereja, Imigresen enggau Projek, Dato Gerawat Gala sereta bini iya Datin Ester Mujan Balan ngatur penemuai ngagai Palan Endur Nerima Vaksin (PPV) ba Perpustakaan Awam Marudi ke berengkah kena Hari Satu ke udah.
Bisi 120 iku nembiak mit beumur antara lima ngagai 11 taun dituchuk ngena dos keterubah vaksin Covid-19 ngena Program Immunisasyen Nembiak Mit (PICKids) ke diatur Opis Pengerai Pelilih Marudi.
Maya penemuai nya Dato Gerawat Gala diberi Pemesai Pengerai Pelilih Marudi Dr. Ruthashini R. Selvasingam penerang senentang vaksin ke diberi ngagai bala nembiak mit.
Ku Dr Ruthashini, Vaksin mRNA iya nya Comirnaty 10 mcg Concenttrate for Dispersion (PfizerBioNTech) deka diguna beserimbai maya program nya.
Iya mega madahka, ari asil pengawa mansik klinikal vaksin bisi meda iya efektif 90.7 pesen sereta ulih nambahka imun ke tinggi ngelaban penyakit Covid-19.
Ku iya, PICKids begunaka dua tuchuk dos vaksin ba takah lapan minggu ke ditagaka ba timpuh enam bulan.